ՀՍՀ/ԱԿՐՈԼԵԻՆ

ԱԿՐՈԼԵԻՆ (<լատ. acer – սուր, կծու + oleum – յուղ), պրոպենալ, ակրիլալդեհիդ, ${\ce {CH2 = CH - CHO}}$, ալիֆատիկ շարքի չհագեցած ալդեհիդ։ Անգույն, սուր հոտով, արցունքաբեր հեղուկ, հալման ջերմաստիճանը՝ –87,7° C, եռմանը՝ 52,5° C, խտությունը՝ 841,0 կգ/մ³։ Լուծվում է ջրում և օրգ. լուծիչներում։ Օդում հեշտությամբ օքսիդանում է՝ առաջացնելով ակրիլաթթու և պոլիմերվում՝ առաջացնելով ապակենման զանգված (դիսակրիլ)։ Մտնում է միացման և դիենային սինթեզի ռեակցիաների մեջ։ Արդ–յան մեջ ստացվում է պրոպիլենը օքսիդացնելով։ Ա. օգտագործվում է գլիցերինի և մի շարք կարևոր օրգանական միացությունների (մեթիոնին ևն) սինթեզի համար։