ՀՍՀ/ԱՆՀՈՒՇ
< ՀՍՀ
ԱՆՀՈՒՇ, հին բերդ Իրանի հարավ–արևմուտքում, Խուժաստան (Խոզեստան) նահանգի Դիզֆուլ քաղաքի մոտ։ Սասանյան թագավորները Ա–ում ցմահ բանտարկում էին անհնազանդ վասալներին, առավել ծանր հանցագործներին։ Պարսից Շապուհ II արքան խաբեությամբ Ա–ում բանտարկել է նաև Հայոց Արշակ Բ թագավորին և Վասակ սպարապետին։ Մովսես Խորենացին բերդն անվանել է «Անհուշ», Փավստոս Բուզանդը հիշում է «Անդմըշն, որ Անհուշ բերդն են կոչում»։Պարսից պատմագրության մեջ հիշվում է նաև «Ղասրե Ֆարամուշ» անունով, որ բառացի նշանակում է Անհուշ բերդ։