ՀՍՀ/ԿՅՈՒՐԻՈՒՄ

ԿՅՈՒՐԻՈՒՄ (լատ. Curium), Cm, արհեստականորեն ստացված ռադիոակտիվ քիմիական տարր: Ակտինիդ է, կարգահամարը՝ 96: Կայուն իզոտոպներ չունի: Առաջինը ստացել են ամերիկացիներ Գ. Սիբորգը, Ռ. Ջեյմսը և Ա. Գիորսոն, 1944-ին, ըստ

$^{239}{94}{\text{Pu}}(\alpha ,n)^{242}{96}{\text{Cm}}$

միջուկային ռեակցիայի: Անվանվել է ի պատիվ Պ. Կյուրիի և Մ. Սկլոդովսկայա-Կյուրիի: Հայտնի են Կ-ի 238—250 զանգվածային թվերով իզոտոպները, որոնցից առավել երկարակյացը ²⁴⁷Cm (T₁/₂ = 1,64.10⁷ տարի): Կ. արծաթափայլ մետաղ է, հալ. ջերմաստիճանը՝ 1340°C, խտությունը՝ մոտավորապես 13000 կգ/մ³, օքսիդացման աստիճանը՝ +3: Այլ ակտինիդներից անջատում են իոնափոխանակման եղանակներով: ²⁴²Cm և ²⁴⁴Cm իզոտոպները կիրառվում են էլեկտրական հոսանքի փոքրածավալ աղբյուրներ ստեղծելու համար: