Վերջին մոմը

Երկրամասը, անունները, գործողության վայրը պայմանական են

Գործող անձինք՝

• ՍԱՄԱՆԻ
• ԷՐԻՄՈ
• ՏՈՍԱ

Անընդմեջ երկրաշարժերի հետևանքով Յակու թերակղզին ավերվել ու ամայացել է: Բնակչության 50 տոկոսը զոհվել է, փրկվածների կեսը վերաբնակվել է այլ վայրերում, մնացածը հաշտվելով, կամ լավ ապագայի հույսը չկորցնելով, մնացել է թերակղզում: Բեմը ներկայացնում է կիսամութ բնակարան, ուր մանկության երեք ընկերուհիներն արթուն անցկացնում են գիշերները մոմի լույսի տակ: Տագնապի զգացումը չի լքում թե՛ հերոսներին, թե՛ հանդիսատեսին:

• ՍԱՄԱՆԻ — (սարսափահար): Երկրաշարժ է…

• ԷՐԻՄՈ — (ուշադիր հետևելով): Չէ, գնացքն էր:

• ՏՈՍԱ — Ի՞նչ ես ասում, երկաթուղին վաղուց ավերված է:

• ԷՐԻՄՈ — Առավոտյան տեսա… վերանորոգել են:

• ՍԱՄԱՆԻ — Դու առավոտյան տնից դուրս չես եկել:

• ԷՐԻՄՈ — Դուք դեռ քնած էիք՝ դուրս եկա մաքուր օդ շնչելու:

• ՏՈՍԱ — Քնա՞ծ էինք… Բայց մենք քանի՜ գիշեր է՝ չենք քնում:

• ԷՐԻՄՈ — Այո, իզուր տանջում ենք մեզ: Ինձ թվում է՝ վտանգն անցել է:

• ՍԱՄԱՆԻ — Հիմարությո՛ւն: Եթե անցած լիներ, գոնե էլեկտրացանցը կաշխատեր:

• ՏՈՍԱ — Էլ մոմ չկա: Սա… վերջինն է:

• ԷՐԻՄՈ — Առավոտյան այդ մասին կհոգամ:

• ՍԱՄԱՆԻ — Առավոտյա՜ն… Այդքան հեռավոր պլաններ մի կազմիր, գուցե սա մեր վերջին գիշերն է:

• ԷՐԻՄՈ — Դու ամեն գիշեր կյանքի հետ փակում ես հաշիվներդ, իսկ երբ առավոտյան պարզվում է, որ ողջ ես, դա վերագրում ես երջանիկ պատահականությանը: Այդ կերպ կարելի է մեռնել մինչև աղետը:

• ՍԱՄԱՆԻ — Որն ավելի նախընտրելի է:

• ՏՈՍԱ — Սը՜ս… Ի՞նչ ձայն է, ինչ-որ մեկը կարծես լալիս է:

• ՍԱՄԱՆԻ — Երեխա է:

• ԷՐԻՄՈ — Չէ, կատու է:

• ՏՈՍԱ — Կատուները ձմեռը չեն վայում:

• ՍԱՄԱՆԻ — Երեխա՛ է:

• ՏՈՍԱ — Մութ է, ոչինչ չի երևում:

• ԷՐԻՄՈ — Լռեց…

• ՏՈՍԱ — Ռադիոն միացնե՞մ:

• ՍԱՄԱՆԻ և ԷՐԻՄՈ — (միասին, տագնապով): Ո՛չ:

• ՏՈՍԱ — Ինչո՞ւ վախեցաք, միևնույն է՝ գիծ չկա:

• ԷՐԻՄՈ — (դադարից հետո): Հիշում եմ, անցյալ ամառ ծովում քիչ մնաց՝ խեղդվեի, երկու անգլիացի փրկեցին, ասացին՝ երջանիկ աստղի տակ եմ ծնվել:

• ՍԱՄԱՆԻ — Անգլիացիների ասածը լուրջ մի՛ ընդունիր, նրանք կատակելու առիթը բաց չեն թողնում:

• ՏՈՍԱ — Գոնե ռադիոն աշխատեր:

• ԷՐԻՄՈ — Ավելի լավ, կորած երեխաների մասին հոգեմաշ հայտարարություններ չենք լսի:

• ՍԱՄԱՆԻ — Եկեղեցուց մի պատ է մնացել կանգուն.

• ՏՈՍԱ — Այդ եկեղեցին պատերազմից հետո էր ավերվել:

• ՍԱՄԱՆԻ — Ինձ մի սովորեցրու, պատերազմից հետո երեք պատ էր մնացել, իսկ հիմա՝ մեկն է

• ԷՐԻՄՈ — Ձեր այդ եկեղեցու տեղում արդեն տասնյակ տարիներ գարեջրատուն է կանգնած:

• ՏՈՍԱ — Ուզում ես ասել գարեջրատունը եկեղեցու տեղ եմ դրել և ամեն կիրակի այնտեղ մո՞մ եմ վառել:

• ՍԱՄԱՆԻ — Երևի մենք տարբեր եկեղեցիների մասին ենք խոսում:

• ՏՈՍԱ — Ոչ, եկեղեցին մեկն է, մեր ընկալումներն են տարբեր: Ի դեպ, ես մտադիր եմ վաղն ևեթ այցելել այդ քանդված եկեղեցին և աղոթել հոգուս փրկության համար: Չէի՞ք միանա ինձ:

• ԷՐԻՄՈ — Մեր հոգին անմահ է և չի մեռնի, երբ մարմինը սպանվի, հոգու համար գոյություն չունի ոչ ծնունդ, ոչ մահ: Մենք շունչ-հոգի ենք և որպես այդպիսին հավիտենական ենք: Այնպես որ, հոգիս փրկելու փորձեր չեմ անի:

• ՏՈՍԱ — Այդ անմահությունը կատարյալ հոգիներին է վերաբերում, որոնք բարձր են կանգնած խղճից, տգիտությունից, վայելքներից:

• ԷՐԻՄՈ — Վայելքը ծնունդով իմ իրավունքն է և ես նրանից բարձր կանգնելու ցանկություն չունեմ:

• ՏՈՍԱ — Ուրեմն շտապիր եկեղեցի՝ հոգուդ փրկության վերջին աղոթքն անելու:

• ՁԱՅՆ վարագույրի հետևից — Դե բավակա՛ն է, թողեք քնենք, ամեն գիշեր նույն հիմարություններն ենք ստիպված լսում:

• ՍԱՄԱՆԻ — Իսկ դու ականջներդ մի՛ սրի, քնիր, եթե համոզված ես, որ վաղը կարթնանաս:

• ԷՐԻՄՈ — Մի բորբոքիր հարևաններին, թե չէ երեքիս էլ դուրս կշպրտեն ինչպես անցյալ գիշեր:

• ՏՈՍԱ — Անցյալ գիշեր երկրաշարժը կրկնվեց, այդ պատճառով դուրս թռանք:

• ՍԱՄԱՆԻ — Այս անգամ ես դուրս չեմ գա, չսպասեք:

• ԷՐԻՄՈ — Ես էլ կմնամ, չեմ ուզում դրսում սառցակալել:

• ՏՈՍԱ — Իսկ ես, համենայնդեպս, դուրս կգամ:

• ՍԱՄԱՆԻ — Ինչ է, դու իրո՞ք ուզում ես փրկվել:

• ԷՐԻՄՈ — Դեռ երիտասարդ է, ապրել է ուզում, մի՛ մեղադրիր նրան:

• ՍԱՄԱՆԻ — Տանե՛լ չեմ կարող, երբ մի օր ավելի ապրելու համար գլուխ են ջարդում:

• ԷՐԻՄՈ — Թող ապրի, ի՞նչ ես կպել նրանից, գուցե նրան դուր է գալիս այսպես ապրելը:

• ՍԱՄԱՆԻ — Կուզենայի ողջ մնալ միայն մի բան համար, որ կուշտ ծիծաղեմ նրա վրա:

( այդ պահին սեղանը թեթևակի ցնցվում է):

• ԷՐԻՄՈ — (սարսափած) Երկրաշարժ է:

• ՍԱՄԱՆԻ — Չէ, գնացքն է:

• ԷՐԻՄՈ — Երկրաշա՛րժ է:

( Սամանին ինքնամոռաց փորձում է դուրս փախչել )

• ՏՈՍԱ — (մեղավոր): Այդ ես դիպա սեղանին… պատահմամբ…

• ՍԱՄԱՆԻ — (շփոթահար նստում է): Մոմը վերջանում է:

• ԷՐԻՄՈ — Այլևս մոմ չկա: Սա… վերջինն էր:

(մթություն ):