Վիքիդարանից՝ ազատ գրադարանից
Օ՜, որքան մոտ են սրտիս լարերին
Օ՛, որքան մոտ են սրտիս լարերին
Երկինքը դժնին, մռայլ, ամպամած,
Մրրկածուփ ծովն՝ ահեղ, մթնագին,
Գոռ փոթորիկը՝ ամեհի, անսանձ...
Օ՛, որքան վեհ է օվկիանը ազատ,
Հորձանքը հզոր, կայծակը ուժեղ,
Փոթորիկ, մրրիկ, մռայլ անապատ,
Շռնդադղորդ որոտը ահեղ...
Օ՛, որքան վեհ է տարերքը հուժկու,
Երբ ծովն ու երկինք գոտեմարտում են,
Թե՛ շանթ, թե՛ կայծակ ահեղ, ահարկու
Արյուն֊աշխարհը շանթահարում են...
Օ՛, որքան մոտ են սրտիս լարերին
Խրոխտ բողոքը աշխատավորի,
Արդար պահանջը, քանց որոտ ուժգին,
Ջլուտ բռունցքը՝ վե՛հ, սպառնալի՛...
Օ՛, որքան վեհ է հիմնը պայքարի,
Շարքերը՝ անահ, խրոխտ, անսասան,
Քայլերգը ցասկոտ հզոր վրեժի,
Սարսափ գրոհը՝ հաստատ, առնական։
Օ՛, որքան վեհ է տարերքը կյանքի,
Սուրբ ազատության ահաբեկիչ մարտ,
Կյանքի օրհասը, տագնապը կռվի,
Կռվող բանվորի ազատ մահն հպարտ...
1908, ապրիլ
|
|
