Ամենից առաջ

Վիքիդարանից՝ ազատ գրադարանից
Ամենից առաջ

Ռոբերտ Բըրնս

Թարգմանությունը՝ Հակոբ Հակոբյանի

Ամենից առաջ


Չքավոր, եղիր դու աշխատասեր,
Հպարտ ու ազնիվ ամենից առաջ․
Թե ստրուկ տեսնես, շուռ տուր երեսդ,
Նա ատելի է ամենից առաջ։

Հարուստ իշխանի նվաճող ուժից,
Տե՛ս, չվախենա՛ս— ամենից առաջ,
Հարստությունը չէ՞ որ ընկեր է
Անազնվության— ամենից առաջ։

Թող ցամաք հացը լինի կերածդ,
Վերնաշապիկդ կոշտ վուշից կարած․
Ուրիշը թեկուզ թավի՛շ է հագած,
Բայց սրիկա՛ է ամենից առաջ։

Ամենից առաջ, չքավոր եղբայր,
Տիտղոսը չէ՞ որ հնչյուն է դատարկ,
Բայց թե ազնիվ ես— կունենաս միշտ հարգ,
Ազնիվն արքա է ամենից առաջ։

Ահա ա՛յլ հարուստ գոռոզ ու փքված,
Մեզ ի՜նչ օգուտ, թե ոսկումն է թաղված,
Թո՛ղ հպարտանա իր հարստությամբ,
Բայց որ հիմա՜ր է ամենից առաջ․

Ամենից առաջ, ամենից առաջ
Մե՛զ— աշխատանքի որդկերանց համար
Նրանց ժապավեն ու շուքը տխմար
Ծիծաղելի՜ է ամենից առաջ․․․