Աստուածաշունչ (1805)/Ելք

1 · 2 · 3 · 4 · 5 · 6 · 7 · 8 · 9 · 10 · 11 · 12 · 13 · 14 · 15 · 16 · 17 · 18 · 19 · 20 · 21 · 22 · 23 · 24 · 25 · 26 · 27 · 28 · 29 · 30 · 31 · 32 · 33 · 34 · 35 · 36 · 37 · 38 · 39 · 40

Գլուխ 1

¹ Ա՜յս են անուանք որդւոցն Իսրայէլի մտելոցն յԵգիպտոս հանդերձ Յակոբաւ հարբն իւրեանց. իւրաքանչիւր ըստ համօրէն տանց իւրեանց մտանէին:
² Ռոբէն. Շմաւոն. Ղևի. Յուդա.
³ Իսաքար. Զաբուղոն. և Բենիամին:
⁴ Դան. և Նեփթաղիմ. Գադ. և Ասեր:
⁵ Եւ էին ամենայն ոգիք ելեալք 'ի Յակոբայ, եւթանասուն և հինգ ոգի. և Յովսէփ էր յԵգիպտոս:
⁶ Վախճանեցաւ Յովսէփ՝ և ամենայն եղբարք նորա, և ամենայն ազգն այն:
⁷ Եւ որդիքն Իսրայէլի աճեցին և յոռացան. բազմանային և զօրանային յոյժ. զի բազմացուցանէր զնոսա երկիրն: Բ
⁸ Եկաց ա՛յլ թագաւոր՝ որ ո՛չ գիտէր զՅովսէփ:
⁹ Եւ ասէ ցազգն իւր. Ահա ազգ որդւոցն Իսրայէլի մե՛ծ է զօրութեամբ, և զօրանա՛յ քան զմեզ:
¹⁰ Արդ՝ եկայք հնարեսցուք ինչ նոցա. գուցէ՝ բազմանայցեն. և յորժամ դիպեսցի մեզ պատերազմ, յաւելուցուն և նոքա 'ի թշնամիսն. և մարտուցեալ ընդ մեզ, ելանիցե՛ն յերկրէ աստի:
¹¹ Եւ կացո՛յց 'ի վերայ նոցա գործավարս, զի չարչարեսցեն զնոսա 'ի գործ: Եւ շինեցին քաղաքս ամուրս փարաւոնի, զՓիդոն, և զՌամեսէ, և զՈվն՝ որ է Արեգ քաղաք:
¹² Եւ որչափ ճնշէին զնոսա, այնչափ առաւե՛լ բազմանային և զօրանային յոյժ:
¹³ Եւ գարշեցուցանէին Եգիպտացիքն զորդիսն Իսրայէլի: Եւ յաղթահարէին Եգիպտացիք զորդիսն Իսրայէլի բռնութեամբ:
¹⁴ Եւ կեղէին զկեանս նոցա 'ի գործ խիստ կաւոյ և աղիւսարկի, և յամենայն գործ դաշտաց. ըստ ամենայն գործոյ իւրեանց՝ որով ծառայեցուցանէին զնոսա բռնութեամբ: Գ
¹⁵ Եւ խօսեցա՛ւ արքայն Եգիպտացւոց ընդ ծնուցիչսն Եբրայեցւոց. ընդ միում որում անուն էր Սեփովրա, և անուն երկրորդին Փուա.
¹⁶ և ասէ. Յորժամ ծնուցանիցէք զկանայս Եբրայեցիս, և իցեն մերձ 'ի ծնունդս. թէ արո՛ւ իցէ՝ սպանջի՛ք զնա, և թէ էգ՝ ապրեցուցանիջիք:
¹⁷ Եւ երկեա՛ն ծնուցիչքն յԱստուծոյ. և ո՛չ արարին՝ որպէս և հրաման ետ նոցա արքայն Եգիպտացւոց. և ապրեցուցանէին զարուսն:
¹⁸ Կոչեա՛ց արքայն Եգիպտացւոց զծնուցիչսն՝ և ասէ ցնոսա. Զի՞ է զի արարէք զիրսն զայնոսիկ և ապրեցուցէք զարուս:
¹⁹ Եւ ասեն ծնուցիչքն ցփարաւոն. Ո՛չ իբրև զկանայս Եգիպտացիս են Եբրայեցիքն. քանզի նա՛խ ծնանին մինչ չև՛ մտեալ առ նոսա մանկաբարձաց: Եւ ծնանէին:
²⁰ Եւ բարի առնէր Աստուած մանկաբարձացն: Եւ բազմանայր յոյժ ժողովուրդն, և զօրանայր յոյժ:
²¹ Յորմէհետէ երկեան մանկաբարձքն յԱստուծոյ, արարին իւրեանց տունս:
²² Հրամա՛ն ետ փարաւոն ամենայն ժողովրդեան իւրում, և ասէ. Զամենայն արու որ ծնանիցի Եբրայեցւոց, 'ի գետ ընկեսջիք, և զամենայն էգ՝ ապրեցուցանիջիք:

Գլուխ 2

¹ Եւ է՛ր անդ ոմն յազգէ Ղևեայ, որ ա՛ռ իւր կին 'ի դստերաց անտի Ղևեայ:
² Եւ յղացաւ՝ ծնաւ արու: Եւ տեսանէին զնա կայտա՛ռ. և թաքուցին զնա ամիսս երիս:
³ Եւ իբրև ո՛չ ևս կարէին թաքուցանել, ա՛ռ մայրն նորա տապանակ պրտուեայ, և ծեփեաց զնա կպրաձիւթով. և ե՛դ 'ի նմա զմանուկն, և ընկէ՛ց զայն 'ի խաղ մի առ ափն գետոյն:
⁴ Եւ դիտէր քոյրն նորա 'ի հեռաստանէ, տեսանել թէ զի՞նչ անցք անցանիցեն ընդ նա:
⁵ Եւ իջեալ դուստրն փարաւոնի լուանա՛լ 'ի գետն. և նաժիշտք նորա շրջէին առ գետովն: Եւ տեսեալ զտապանակն 'ի խաղի անդ, առաքեաց զնաժիշտ մի առնուլ զնա:
⁶ Եբաց՝ և ետես զմանուկն. և լայր մանուկն 'ի տապանակի անդ: Խանդաղատեցաւ զնովաւ դուստրն փարաւոնի, և ասէ. 'Ի մանկա՞նց Եբրայեցւոց է դա:
⁷ Եւ ասէ քոյրն նորա ցդուստրն փարաւոնի. Կամի՞ս զի կոչեցից քեզ կին մի դայեակ 'ի Հեբրայեցւոց անտի. և սնուցանիցէ՛ քեզ զմանուկդ:
⁸ Ասէ դուստրն փարաւոնի. Ե՛րթ: Գնաց աղջիկն և կոչեաց զմայր մանկանն:
⁹ Եւ ասէ ցնա դուստրն փարաւոնի. Ա՛ռ զմանուկդ, և սնո՛ ինձ զդա. և ես տաց քեզ զվարձս քո: Եւ ա՛ռ կինն զմանուկն՝ և սնոյց զնա: Եւ իբրև հաստատեցաւ մանուկն, ած զնա առ դուստրն փարաւոնի,
¹⁰ և եղև նմա յորդեգիրս: Եւ անուանեաց զանուն նորա Մովսէ՛ս. ասէ. 'Ի ջրո՛յ անտի հանի զդա: Ե
¹¹ Եւ եղև յետ աւուրց բազմաց, իբրև եղև մե՛ծ Մովսէս, ե՛լ առ եղբարս իւր որդիսն Իսրայէլի, հայեցեալ 'ի չարչարանս նոցա. ետես այր մի Եգիպտացի, զի հարկանէր զոմն Եբրայեցի յեղբարց իւրոց՝ յորդւոցն Իսրայէլի:
¹² Հայեցեալ յա՛յս կոյս յայն կոյս՝ ո՛չ զոք տեսանէր. եհա՛ր զԵգիպտացին, և ծածկեաց զնա ընդ աւազով:
¹³ Եւ ելեալ յերկրորդում աւուր, տեսանէր երկուս արս Եբրայեցիս ընդ միմեանս մարտուցեալս. և ասէ ցայրն որ զրկէրն. Ընդէ՞ր հարկանես զընկերդ:
¹⁴ Եւ նա ասէ. Ո՞ կացոյց զքեզ # այր իշխան և դատաւոր 'ի վերայ մեր. եթէ սպանանե՞լ զիս կամիցիս որպէս երէկ սպաներ զԵգիպտացին: Զահի՛ հարաւ Մովսէս՝ և ասէ, թէ. Այնպէս յայտնի՛ եղև բանն:
¹⁵ Եւ լուաւ փարաւոն զբանն, և խնդրէր սպանանել զՄովսէս: Եւ փախեաւ Մովսէս յերեսաց փարաւոնի, և բնակեաց յերկրին Մադիամու: Զ Եւ եկեալ յերկրին Մադիամու՝ նստաւ առ ջրհորի միում:
¹⁶ Եւ քրմին Մադիանացւոց էին դստերք եւթն, որ արածէին զխաշինս հօրն իւրեանց, և եկեալ էին հանել ջուր, մինչև լցին զաւազանսն, արբուցանել խաշանց հօրն իւրեանց:
¹⁷ Եւ եկեալ ա՛յլ հովիւք՝ մերժեցին զնոսա 'ի բաց: Յարուցեալ Մովսէս թափեաց զնոսա. և եհան նոցա ջուր, և արբոյց զխաշինս նոցա:
¹⁸ Եւ եկին առ Հռագուէլ հայրն իւրեանց: Եւ նա ասէ ցնոսա. Զի՞ է զի յարևու եկիք այսօր:
¹⁹ Եւ նոքա ասեն. Այր մի Եգիպտացի փրկեաց զմեզ 'ի հովուաց անտի. և եհան ջուր և արբոյց խաշանց մերոց:
²⁰ Եւ նա ասէ ցդստերսն իւր. Եւ ո՜ւր է, ընդէ՞ր թողէք զայրն. արդ՝ կոչիցէ՛ք զնա՝ զի կերիցէ հաց:
²¹ Եւ բնակեցաւ Մովսէս առ առնն, և ետ զՍեպփովրա դուստր իւր Մովսիսի կնութեան:
²² Յղացաւ կինն՝ և ծնաւ որդի. և անուանեաց զանուն նորա Մովսէս՝ Գերսամ. ասէ՝ զի պանդո՛ւխտ եմ ես յօտար երկրի: Է
²³ Եւ յետ աւուրց բազմաց մեռաւ թագաւորն Եգիպտացւոց. և տառապէին որդիքն Իսրայէլի 'ի գործոյ անտի, և աղաղակէին 'ի վեր: Եւ ել աղաղակ նոցա առաջի Աստուծոյ 'ի գործոյ անտի:
²⁴ Եւ լուաւ Աստուած հեծութեան նոցա: Եւ յիշեաց Աստուած զուխտ իւր որ ընդ Աբրաամու և Սահակայ և Յակոբայ:
²⁵ Եւ հայեցաւ Աստուած յորդիսն Իսրայէլի. և ծանուցա՛ւ նոցա:

Գլուխ 3

¹ Եւ Մովսէս արածէր զխաշինս Յոթորայ աներոյ իւրոյ՝ քրմին Մադիանացւոց. և ած զխաշինսն յանապատ. և եկն 'ի լեառնն Աստուծոյ 'ի Քորէբ:
² Եւ երևեցաւ նմա հրեշտակ Տեառն բոցով հրոյ 'ի միջոյ մորենւոյ: Եւ տեսանէր զի մորենին վառեալ էր հրով, և ո՛չ այրէր մորենին:
³ Եւ ասէ Մովսէս. Անցեալ տեսի՛ց զտեսիլն զայն մեծ, զի՞ է՝ զի ո՛չ այրի մորենին:
⁴ Իբրև ետես Տէր եթէ մերձենա՛յ տեսանել, կոչեաց զնա Տէր 'ի միջոյ մորենւոյն, ասէ. Մովսէ՛ս Մովսէ՛ս: Եւ նա ասէ. Զի՞ է:
⁵ Եւ ասէ. Մի՛ մերձենար այսր. լո՛յծ զկօշիկս քո՝ յոտից քոց. զի տեղիդ յորում կա՛ս դու 'ի դմա՝ երկիր սո՛ւրբ է:
⁶ Եւ ասէ ցնա. Ես եմ Աստուած հօր քոյ, Աստուած Աբրաամու. և Աստուած Սահակայ. և Աստուած Յակոբայ: Եւ դարձոյց Մովսէս զերեսս իւր, քանզի երկնչէր հայել առաջի Աստուծոյ:
⁷ Եւ ասէ Տէր ցՄովսէս. Տեսանելո՛վ տեսի զչարչարանս ժողովրդեան իմոյ՝ որ յԵգիպտոս.
⁸ և լուայ աղաղակի նոցա 'ի գործավարացն իւրեանց, զի գիտե՛մ զվիշտս նոցա. և իջի փրկել զնոսա 'ի ձեռաց Եգիպտացւոցն, և հանել զնոսա յերկրէն յայնմանէ, և տանել զնոսա յերկիրն բարի՝ և յընդարձակ. յերկիր՝ որ բղխէ զկաթն և զմեղր. յերկիրն Քանանացւոց, և Քետացւոց, և Ամովրհացւոց, և Փերեզացւոց, և Խևացւոց, և Գերգեսացւոց, և Յեբուսացւոց:
⁹ Եւ արդ՝ աւասիկ աղաղակ որդւոցն Իսրայէլի հասեալ է առ իս, և տեսի ես զնեղութիւնն՝ զոր նեղեն զնոսա Եգիպտացիքն:
¹⁰ Եւ արդ՝ ե՛կ առաքեցից զքեզ առ փարաւոն արքայ Եգիպտացւոց, և հանցե՛ս զժողովուրդ իմ զորդիսն Իսրայէլի յերկրէն Եգիպտացւոց: Ը
¹¹ Եւ ասէ Մովսէս ցԱստուած. Ո՞վ եմ ես՝ զի երթայցեմ առ փարաւոն արքայ Եգիպտացւոց, և հանիցեմ զորդիսն Իսրայէլի յերկրէն Եգիպտացւոց:
¹² Եւ ասէ. Ե՛ս եղէց ընդ քեզ. և ա՛յս եղիցի քեզ նշան թէ ե՛ս առաքեցի զքեզ հանել զժողովուրդ իմ յԵգիպտոսէ, պաշտեսջիք զԱստուած 'ի լերինս յայսմիկ:
¹³ Եւ ասէ Մովսէս ցԱստուած. Ահա ես երթեալ առ որդիսն Իսրայէլի, ասիցեմ ցնոսա. Աստուած հարցն ձերոց առաքեաց զիս առ ձեզ. և հարցանիցեն զիս՝ թէ զի՞նչ անուն է նորա, զի՞նչ ասացից ցնոսա:
¹⁴ Եւ ասէ Աստուած ցՄովսէս. Ես եմ Աստուած որ Է՛ն: Եւ ասէ. Ա՛յսպէս ասասցես ցորդիսն Իսրայէլի, որ Է՛ն առաքեաց զիս առ ձեզ:
¹⁵ Եւ ասէ դարձեալ Աստուած ցՄովսէս. Ա՛յսպէս ասասցես ցորդիսն Իսրայէլի: Տէր Աստուած հարցն ձերոց, Աստուած Աբրաամու, և Աստուած Սահակայ, և Աստուած Յակոբայ, առաքեաց զիս առ ձեզ: Ա՛յս է անուն իմ յաւիտենական, և յիշատակ ազգաց յազգս:
¹⁶ Արդ՝ երթեալ ժողովեսցես զծերակոյտ որդւոցն Իսրայէլի, և ասասցես ցնոսա: Տէր Աստուած հարցն ձերոց երևեցաւ ինձ. Աստուած Աբրաամու, և Աստուած Սահակայ, և Աստուած Յակոբայ՝ և ասէ. Այցելութեամբ ա՛յց արարից ձեզ. և որ ինչ անցք անցին ընդ ձեզ յԵգիպտոս,
¹⁷ և ասեմ. Հանի՛ց զձեզ յերկրէ չարչարանաց Եգիպտացւոցն, յերկիրն Քանանացւոց, և Քետացւոց, և Ամովրհացւոց, և Փերեզացւոց, և Գերգեսացւոց, և Խևացւոց, և Յեբուսացւոց. յերկիր՝ որ բղխէ զկա՛թն և զմեղր:
¹⁸ Եւ լուիցեն ձայնի քում: Եւ մտցես դու, և ծերակոյտ որդւոցն Իսրայէլի առ փարաւոն արքայ Եգիպտացւոց, և ասասցես ցնա. Տէր Աստուած Եբրայեցւոց կոչէ՛ զմեզ առ ինքն. արդ՝ երթիցուք մեք երից աւուրց ճանապարհ յանապատ. զի զոհեսցուք Տեառն Աստուծոյ մերում:
¹⁹ Եւ ես գիտեմ, եթէ ո՛չ թողուցու զձեզ արքայն Եգիպտացւոց գնալ, եթէ ո՛չ հզօ՛ր ձեռամբ:
²⁰ Եւ ձգեալ զձեռն իմ հարից զԵգիպտոս ամենայն սքանչելեօք իմովք՝ զոր արարից 'ի նոսա. և ապա արձակեսցէ զձեզ:
²¹ Եւ տաց շնորհս ժողովրդեան իմոյ առաջի Եգիպտացւոցն. և յորժամ ելանիցէք, մի՛ ելանիցէք դատարկք:
²² Այլ խնդրեսցէ կին 'ի դրացւոյ և յերդակցէ իւրմէ անօթս ոսկւոյ և անօթս արծաթոյ, և հանդերձս. և զարդարեսջի՛ք զուստերս և զդստերս ձեր. և դաւաճանեսջիք զԵգիպտացիսն:

Գլուխ 4

¹ Պատասխանի ետ Մովսէս՝ և ասէ. Եթէ չհաւատայցեն ինձ, և ո՛չ լուիցեն ձայնի իմում, քանզի ասիցեն, թէ չի՛ք երևեալ քեզ Աստուծոյ. զի՞նչ ասացից ցնոսա:
² Ասէ ցնա Տէր. Զի՞նչ է այդ որ 'ի ձեռին քում է: Եւ նա ասէ. Գաւազան:
³ Եւ ասէ. Ընկեա՛ զդա 'ի գետին: Եւ ընկէց զնա 'ի գետին: Եւ եղև օձ, և փախեաւ Մովսէս 'ի նմանէն:
⁴ Եւ ասէ Տէր ցՄովսէս. Ձգեա՛ զձեռն քո՝ և բո՛ւռն հար զտտանէն: Եւ ձգեաց Մովսէս զձեռն իւր, և բուռն եհար զտտանէն. և եղև գաւազան 'ի ձեռին նորա:
⁵ Զի հաւատասցեն քեզ՝ թէ երևեալ է քեզ Տէր Աստուած հարցն նոցա. Աստուած Աբրաամու, և Աստուած Սահակայ, և Աստուած Յակոբայ:
⁶ Ասէ ցնա դարձեալ Տէր. Ա՛րկ զձեռն քո 'ի ծոց քո: Եւ արկ զձեռն իւր 'ի ծոց իւր, և եհան զնա 'ի ծոցոյ իւրմէ, և եղև ձեռն նորա բորոտ իբրև զձիւն:
⁷ Եւ ասէ ցնա. Ա՛րկ զձեռն քո 'ի ծոց քո: Եւ արկ զձեռն իւր 'ի ծոց իւր: Եւ եհան զնա 'ի ծոցոյ իւրմէ, և դարձեալ անդրէն 'ի նոյն հաստատեցաւ 'ի գո՛յն մարմնոյ իւրոյ:
⁸ Եթէ ո՛չ հաւատայցեն քեզ՝ և ո՛չ լուիցեն ձայնի առաջնոյ նշանին, հաւատասցեն քեզ ձայնի երկրորդի՛ նշանիդ:
⁹ Եւ եղիցի եթէ ո՛չ հաւատասցեն երկոցունց նշանացդ այդոցիկ, և ո՛չ լուիցեն ձայնի քում, առցես դու 'ի ջրոյ գետոյն՝ և հեղցես 'ի ցամաքի. և եղիցի ջուրն՝ զոր առնուցուս 'ի գետոյն, արիւն 'ի ցամաքին:
¹⁰ Եւ ասէ Մովսէս ցՏէր. Աղաչե՛մ զքեզ Տէր, չե՛մ բաւական, որպէս թէ յերեկէ և յեռանտէ, և ո՛չ յորմէհետէ սկսար խօսել ընդ ծառայի քում. զի նրբաձա՛յն և ծանրալեզո՛ւ եմ ես:
¹¹ Եւ ասէ Տէր ցՄովսէս. Ո՛վ ետ բերան մարդոյ, կամ ո՛վ արար զխուլն և զհամր, զականին և զկոյր, ո՛չ ապաքէն ե՞ս Աստուած:
¹² Եւ արդ՝ ե՛րթ, և ե՛ս բացից զբերան քո. և խելամո՛ւտ արարից զքեզ՝ զոր պա՛րտ իցէ խօսել:
¹³ Եւ ասէ. Աղաչե՛մ զքեզ Տէր. ա՛ռ քեզ 'ի ձեռն զա՛յլ ոք զօրաւոր՝ զոր առաքիցես:
¹⁴ Եւ բարկացաւ Տէր սրտմտութեամբ 'ի վերայ Մովսիսի՝ և ասէ. Ո՞չ աւանիկ կայ Ահարոն եղբայր քո Ղևտացի. գիտեմ զի խօսելո՜վ խօսեսցի նա ընդ քեզ: Եւ ահա նա ելցէ ընդ առաջ քո, և 'ի տեսանելն զքեզ բերկրեսցի՛ 'ի միտս իւր:
¹⁵ Եւ խօսեսցի՛ս ընդ նմա, և տացե՛ս զպատգամս իմ 'ի բերան նորա. և ես բացից զբերան քո և զբերան նորա, և խելամո՛ւտ արարից զձեզ՝ զի՞նչ առնիցէք:
¹⁶ Եւ նա՛ խօսեսցի առ 'ի քէն ընդ ժողովրդեանն: Եւ նա եղիցի քեզ բերան. և դու եղիցես նմա յաստուածակոյս կողմանէ:
¹⁷ Եւ զգաւազանդ որ դարձաւ յօձ՝ առցե՛ս 'ի ձեռին քում, որով արասցես նշանս:
¹⁸ Գնա՛ց Մովսէս՝ և դարձաւ առ Յոթոր աներ իւր՝ և ասէ ցնա. Դարձայց և երթայց առ եղբարս իմ որ յԵգիպտոս, և տեսից, թէ տակաւին կենդանի՞ իցեն: Եւ ասէ Յոթոր ցՄովսէս. Ո՛ղջ երթ: ԺԱ
¹⁹ Եւ յետ աւուրցն բազմաց այնոցիկ վախճանեցա՛ւ արքայն Եգիպտացւոց: Եւ ասէ Տէր ցՄովսէս 'ի Մադիամ. Գնա՛ և երթ յԵգիպտոս, զի մեռան ամենայն արք որ խնդրէին զանձն քո:
²⁰ Եւ առեալ Մովսիսի զկին իւր և զմանկունս # իւր, և եհան զնոսա 'ի գրաստս, և դարձաւ յԵգիպտոս: Ա՛ռ Մովսէս զգաւազանն որ յԱստուծոյ՝ 'ի ձեռին իւրում:
²¹ Եւ ասէ Տէր ցՄովսէս. Յերթալդ քո և 'ի դառնալդ յԵգիպտոս. տեսջի՛ր զամենայն նշանս զոր ետու 'ի ձեռս քո՝ արասցես առաջի փարաւոնի. և ես խստացուցից զսիրտ նորա, և ո՛չ արձակեսցէ զժողովուրդ իմ:
²² Եւ դու ասասցես ցփարաւոն. Ա՛յսպէս ասէ Տէր. Որդի անդրանիկ իմ Իսրայէլ:
²³ Ասացի՛ ցքեզ՝ արձակեա՛ զժողովուրդ իմ, զի պաշտեսցեն զիս. ապա թէ ո՛չ կամիցիս արձակել զդա, ե՛ս եմ ապաքէն որ սպանանիցեմ զորդի քո զանդրանիկ:
²⁴ Եւ եղև 'ի ճանապարհի յիջավանս, պատահեաց նմա հրեշտակ Տեառն, և խնդրէր սպանանե՛լ զնա:
²⁵ Եւ առեալ Սեպփովրայի գայլախազ, թլփատե՛աց զանթլփատութիւն որդւոյն իւրոյ. և անկեալ առ ոտս նորա՝ ասէ. Ահա եկա՛ց արիւն թլփատութեան մանկան իմոյ:
²⁶ Եւ գնաց հրեշտակն 'ի նմանէ. քանզի ասաց եթէ՝ Եկաց արիւն թլփատութեան մանկան իմոյ: ԺԲ
²⁷ Եւ ասէ Տէր ցԱհարոն. Ե՛րթ ընդ առաջ Մովսիսի յանապատն: Եւ գնաց և պատահեաց նմա 'ի լերինն Աստուծոյ. և համբուրեաց զնա:
²⁸ Եւ պատմեաց Մովսէս Ահարոնի զամենայն պատգամսն, որ առաքեաց զնա Տէր. և զամենայն նշանսն զոր պատուիրեաց նմա:
²⁹ Գնացին Մովսէս և Ահարոն և ժողովեցին զամենայն ծերակոյտ որդւոցն Իսրայէլի:
³⁰ Եւ խօսեցաւ Ահարոն զամենայն պատգամսն՝ զոր խօսեցաւ Տէր ընդ Մովսիսի. և արար նշանս առաջի ժողովրդեանն:
³¹ Եւ հաւատա՛ց ժողովուրդն և ուրա՛խ եղև, զի արար Աստուած ա՛յց որդւոցն Իսրայէլի. և զի հայեցա՛ւ 'ի նեղութիւն նոցա: Խոնարհեցաւ ժողովուրդն՝ և երկի՛ր եպագ:

Գլուխ 5

¹ Եւ ապա մտին Մովսէս և Ահարոն առաջի փարաւոնի, և ասեն ցնա. Ա՛յսպէս ասէ Տէր Աստուած Իսրայէլի. Արձակեա՛ զժողովուրդ իմ, զի արասցեն ինձ տօն յանապատի:
² Եւ ասէ փարաւոն. Ո՞վ է նա, որում լուայց ձայնի նորա արձակել զորդիսն Իսրայէլի: Ո՛չ գիտեմ զՏէրն՝ և զԻսրայէլ ո՛չ արձակեմ:
³ Եւ ասեն ցնա. Աստուածն Եբրայեցւոց կոչեաց զմեզ առ ինքն. արդ՝ երթիցուք երից աւուրց ճանապարհ յանապատն, զի զոհեսցուք Տեառն Աստուծոյ մերում. գուցէ պատահիցէ մեզ մա՛հ կամ սպանումն:
⁴ Եւ ասէ ցնոսա արքայն Եգիպտացւոց. Ընդէ՞ր դու Մովսէս և Ահարոն խափանէք զժողովուրդն 'ի գործոյ իւրեանց. երթա՛յք յիւրաքանչիւր գործ իւր:
⁵ Եւ ասէ փարաւոն. Ահա բազմանայ յոյժ ժողովուրդն յերկրիս. արդ՝ մի՛ հանդարտեցուսցուք զնոսա 'ի գործոյ:
⁶ Եւ հրամայեաց փարաւոն յաւուր յայնմիկ գործավարաց ժողովրդեանն, և դպրաց նորա, ասէ.
⁷ Մի՛ ևս յաւելուցուք տալ յարդ ժողովրդեանն յաղիւսարկութիւն, որպէս յերէկն և յեռանտ. ինքե՛անք երթիցեն և ժողովեսցեն իւրեանց յարդ:
⁸ Եւ զսակ աղիւսարկին որպէս գործէին հանապազ՝ արկէ՛ք 'ի վերայ նոցա. մի՛ հատանիցէք ինչ անտի. զի դատարկացան, և վասն այնորիկ աղաղակեն՝ և ասեն. Երթիցուք զոհեսցուք Աստուծոյ մերում:
⁹ Ծանրասցի՛ գործ մարդկանն, և ա՛յնմ հոգասցեն. և մի՛ հոգասցեն 'ի բանս տարապարտս:
¹⁰ Եւ ստիպէին զնոսա գործավարք ժողովրդեանն՝ և դպիրք նորա. և խօսէին ընդ ժողովրդեանն և ասէին. Ա՛յսպէս ասէ փարաւոն. Ո՛չ ևս տաց ձեզ յարդ.
¹¹ դուք ձեզէն երթա՛յք ժողովեցէք ձեզ յարդ՝ ուստի և գտանիցէք. զի ո՛չ թողասցի ձեզ 'ի սակէն ձերմէ՝ և ո՛չ ինչ:
¹² Եւ սփռեցա՛ւ ժողովուրդն ընդ ամենայն երկիրն Եգիպտացւոց ժողովել եղէգն՝ առ 'ի յարդ:
¹³ Եւ գործավարքն ստիպէին զնոսա և ասէին. Բովանդակեցէ՛ք զգործն ձեր ըստ հանապազորդ սակին, որպէս մինչ յարդն տային ձեզ:
¹⁴ Եւ տանջեցան դպիրք ազգի որդւոցն Իսրայէլի, որ կային 'ի վերայ նոցա՝ 'ի վերակացուացն փարաւոնի: զի ասէին, թէ ընդէ՞ր ո՛չ բովանդակեցէք զսակ աղիւսոյն ձերոյ որպէս յերէկն և յեռանտ՝ և զա՛յսր աւուրդ:
¹⁵ Եւ մտեալ դպրաց որդւոցն Իսրայէլի՝ բողո՛ք կալան առաջի փարաւոնի և ասեն. Ընդէ՞ր առնես ա՛յսպէս ընդ ծառայս քո:
¹⁶ Յարդ ո՛չ տան ծառայից քոց, և զաղիւսն հրամայեն մեզ գործել. և ահա ծառայք քո 'ի տանջա՛նս են. բո՛ւռն առնես ժողովրդեան քում:
¹⁷ Եւ ասէ ցնոսա. Դատա՛րկ էք պարապո՛րդ էք. վասն այնորիկ ասէք. Երթիցուք զոհեսցուք Աստուծոյ մերում:
¹⁸ Արդ՝ երթա՛յք գործեցէ՛ք. քանզի յարդ ո՛չ ոք տայ ձեզ: և զսակ աղիւսոյն բովանդա՛կ տայցէք: ԺԴ
¹⁹ Տեսանէին դպիրք որդւոցն Իսրայէլի զանձինս իւրեանց 'ի չարչարանս՝ և ասէին. Ո՛չ ոք թողու մեզ զսակ հանապազորդ աղիւսաթուին:
²⁰ Պատահեցին Մովսիսի և Ահարոնի, զի գային հանդէպ նոցա ելեալք յերեսաց փարաւոնի:
²¹ Եւ ասեն ցնոսա. Տեսցէ՛ Աստուած, և դատեսցի զձեզ. զի գարշեցուցէք զհոտ մեր առաջի փարաւոնի, և առաջի ծառայից նորա. տա՛լ սուր 'ի ձեռին նորա կոտորել զմեզ:
²² Դարձաւ Մովսէս առ Տէր՝ և ասէ. Տէր, ընդէ՞ր չարչարեցեր զժողովուրդն քո. և ընդէ՞ր առաքեցեր զիս:
²³ Եւ յորմէ հետէ մտի առ փարաւոն խօսել յանուն քո, չարչարեաց զժողովուրդն: և փրկելով ո՛չ փրկեցեր զժողովուրդ քո:

Գլուխ 6

¹ Եւ ասէ Տէր ցՄովսէս. Այժմ տեսցե՛ս զինչ արարից ընդ փարաւոն. զի հզօր ձեռամբ արձակեսցէ զդոսա, և բարձրացեալ բազկաւ հանցէ զդոսա յերկրէ իւրմէ:
² Խօսեցաւ Աստուած ընդ Մովսիսի, և ասէ ցնա. Ե՛ս եմ Տէր.
³ և երևեցա՛յ Աբրաամու Սահակայ և Յակոբայ. Աստուած նոցա եմ, և անուն իմ Տէր. և ո՛չ յայտնեցի նոցա:
⁴ Եւ հաստատեցից զուխտ իմ առ նոսա. տա՛լ նոցա զերկիրն Քանանացւոց՝ ուր պանդխտեցանն:
⁵ Եւ ես լուայ հեծութեան որդւոցդ Իսրայէլի զոր Եգիպտացիքդ ծառայեցուցանեն. և յիշեցի զուխտն ձեր:
⁶ Ե՛րթ խօսեա՛ց ընդ որդիսն Իսրայէլի, և ասասցես. Ե՛ս եմ Տէր. և հանից զձեզ 'ի բռնութենէ Եգիպտացւոցդ, և փրկեցից զձեզ 'ի ծառայութենէ դոցա, և ապրեցուցից զձեզ բա՛րձր բազկաւ և մեծամեծ դատաստանօք:
⁷ Եւ առից զձեզ ինձ 'ի ժողովուրդ. և եղէց ձեզ Աստուած. և ծանիջիք թէ ե՛ս եմ Տէր Աստուած ձեր, որ հանեմ զձեզ յերկրէ Եգիպտացւոցդ:
⁸ Եւ տարայց զձեզ յերկիրն՝ յոր ձգեցի զձեռն իմ տալ զնա Աբրաամու Սահակայ և Յակոբայ. և տաց զնա ձեզ վիճակաւ, զի ե՛ս եմ Տէր:
⁹ Խօսեցաւ Մովսէս ա՛յնպէս ընդ որդիսն Իսրայէլի. և ո՛չ անսացին նմա 'ի կարճմտութենէ, և 'ի խիստ գործոյն: ԺԵ
¹⁰ Խօսեցաւ Տէր ընդ Մովսիսի՝ և ասէ.
¹¹ Մուտ խօսեա՛ց ընդ փարաւոնի արքային Եգիպտացւոց. զի արձակեսցէ զորդիսն Իսրայէլի յերկրէն Եգիպտացւոց:
¹² Խօսեցաւ Մովսէս առաջի Տեառն՝ և ասէ. Ահա որդիքն Իսրայէլի ո՛չ լուան ինձ. և զի՞արդ լսիցէ ինձ փարաւոն. և ես չե՛մ խօսօղ ոք:
¹³ Եւ խօսեցաւ Տէր ընդ Մովսիսի և ընդ Ահարոնի. և ե՛տ նոցա հրաման առ որդիսն Իսրայէլի, և առ փարաւոն արքայ Եգիպտացւոց. հանե՛լ զորդիսն Իսրայէլի յերկրէն Եգիպտացւոց:
¹⁴ Եւ այս են նահապետք տանց ազգաց նոցա. որդիք Ռուբինի անդրանկանն Իսրայէլի. Ենոք, և Փաղ’ղ’ուս. Սարսոն, և Քարմի: ա՛յս ցեղ՝ Ռուբինի:
¹⁵ Եւ որդիք Շմաւոնի. Յամուէլ, և Յամին, և Ահովդ, և Յաքին, և Սահառ, և Սաւուղ որ 'ի Փիւնիկեցւոյ անտի էր: այս ցեղք են որդւոցն Շմաւոնի:
¹⁶ Եւ այս անուանք են որդւոցն Ղևեայ, ըստ ազգս իւրեանց. Գեթսովն, Կահաթ, և Մերարի: և ամք կենաց Ղևեայ հարիւր երեսուն և եւթն ամ:
¹⁷ Եւ ա՛յս են որդիք Գեթսոնի. Ղ’ոբենի, և Սեմէի. տունք նահապետաց նոցա:
¹⁸ Եւ որդիք Կահաթու. Ամրամ, և Սահառ, և Քեբրոն, և Ոզիէլ. և ամք կենաց Կահաթու, հարիւր և երեսուն և երեք ամ:
¹⁹ Եւ որդիք Մերարեայ. Մոովղի և Մովսի. ա՛յս են տունք նահապետաց Ղևեայ ըստ ազգաց իւրեանց:
²⁰ Եւ ա՛ռ Ամրամ զՅովքաբէթ դուստր եղբօր հօր իւրոյ իւր 'ի կնութեան: և ծնաւ նմա զԱհարոն, և զՄովսէս, և զՄարիամ քոյր նոցա. և ամք կենաց Ամրամայ հարիւր և երեսուն և եւթն ամ:
²¹ Եւ որդիք Սահառայ. Կորխ, և Նագեբ, և Զեքրի:
²² Եւ որդիք Ոզիէլայ. Միսայէլ, և Եղիսափան, և Սեթրի:
²³ Եւ ա՛ռ Ահարոն զԵղիսաբեթ դուստր Ամինադաբայ զքոյր Նաասոնի իւր կնութեան. և ծնաւ նմա զՆաբադ, և զԱբիուդ, և զԵղ’իազար, և զԻթամար:
²⁴ Եւ որդիք Կորխայ. Ասիր, և Եղկանայ, և Բիասափ. սոքա են ազգք Կորխայ:
²⁵ Եւ Եղ’եազար Ահարոնեան ա՛ռ 'ի դստերաց անտի Փուտիէլի իւր կնութեան, և ծնաւ նմա զՓենէէս: այս են իշխանք նահապետաց Ղևտացւոցն ըստ ազգս իւրեանց:
²⁶ Եւ ա՛յս Ահարոն և Մովսէս, ցորս ասաց Աստուած՝ հանել զորդիսն Իսրայէլի յերկրէն Եգիպտացւոց հանդերձ զօրութեամբ իւրեանց:
²⁷ Եւ սոքա՛ են որ վիճէին ընդ փարաւոնի արքային Եգիպտացւոց, հանել զորդիսն Իսրայէլի յԵգիպտոսէ: ա՛յս է Մովսէս և Ահարոն:
²⁸ Յաւուր յորում խօսեցաւ Տէր ընդ Մովսիսի յերկրին Եգիպտացւոց:
²⁹ Եւ խօսեցաւ Տէր ընդ Մովսիսի՝ և ասէ. Ե՛ս եմ Տէր. խօսեա՛ց ընդ փարաւոնի արքային Եգիպտացւոց զամենայն ինչ զոր ասեմ քեզ:
³⁰ Եւ ասէ Մովսէս առաջի Տեառն. Ահաւասիկ ես նրբաձա՛յն եմ. և զիա՞րդ լսիցէ ինձ փարաւոն:

Գլուխ 7

¹ Եւ ասէ Տէր ցՄովսէս. Ահա ետու զքեզ Աստուա՛ծ փարաւոնի. և Ահարոն եղբայր քո եղիցի քեզ մարգարէ՛:
² Դու խօսեսցիս ընդ նմա զամենայն ինչ՝ զոր պատուիրեմ քեզ: և Ահարոն եղբայր քո խօսեսցի՛ ընդ փարաւոնի, արձակել զորդիսն Իսրայէլի յերկրէ իւրմէ:
³ Եւ ես խստացուցից զսիրտն փարաւոնի. զի յաճախեցից զնշանս իմ և զարուեստս յերկրիդ Եգիպտացւոց:
⁴ Եւ ո՛չ լուիցէ ձեզ փարաւոն: և արկի՛ց զձեռն իմ յԵգիպտոս. և հանից հանդերձ զօրութեամբ իմով զժողովուրդ իմ, զորդիսն Իսրայէլի յերկրէդ Եգիպտացւոց, մեծա՛ւ վրէժխնդրութեամբ:
⁵ Եւ ծանիցեն Եգիպտացիքն, թէ ե՛ս եմ Տէր. և ձգեցից զձեռն իմ յԵգիպտոս, և հանից զորդիսն Իսրայէլի 'ի միջոյ նոցա:
⁶ Եւ արարին Մովսէս և Ահարոն. որպէս և պատուիրեաց նոցա Տէր, նո՛յնպէս և արարին: ԺԶ
⁷ Եւ Մովսէս էր ամաց ութսնից. և Ահարոն էր որդի ամաց ութսուն և երից, յորժամ խօսեցան ընդ փարաւոնի:
⁸ Եւ խօսեցաւ Տէր ընդ Մովսիսի և ընդ Ահարոնի՝ և ասէ.
⁹ Եթէ խօսեսցի ընդ ձեզ փարաւոն՝ և ասասցէ. Տո՛ւք մեզ նշան կամ արուեստ, ասասցես ցԱհարոն եղբայր քո. Ա՛ռ դու զգաւազանդ, և ընկեա՛ զդա 'ի գետին առաջի փարաւոնի և ծառայից նորա, և եղիցի վիշա՛պ: ԺԷ
¹⁰ Մտին Մովսէս և Ահարոն առաջի փարաւոնի, և արարին ա՛յնպէս, որպէս պատուիրեաց նոցա Տէր: Եւ ընկէց Ահարոն զգաւազանն առաջի փարաւոնի և առաջի ծառայից նորա, և եղև վիշապ:
¹¹ Եւ կոչեաց փարաւոն զիմաստունս Եգիպտացւոց և զկախարդս. և արարին գէտքն Եգիպտացւոց կախարդութեամբ իւրեանց նո՛յնպէս:
¹² Եւ ընկէ՛ց իւրաքանչիւրոք զգաւազան իւր և եղեն վիշապք: և եկո՛ւլ գաւազանն Ահարոնի զգաւազանս նոցա:
¹³ Եւ կարծրացա՛ւ սիրտն փարաւոնի, և ո՛չ լուաւ նոցա՝ որպէս խօսեցաւ Տէր: ԺԸ/ա
¹⁴ Եւ ասէ Տէր ցՄովսէս. Կարծրացեա՛լ է սիրտն փարաւոնի չարձակե՛լ զժորովուրդն:
¹⁵ Ե՛րթ առ փարաւոն ընդ առաւօտն. ահա նա ելանէ 'ի ջուրն. և կացցե՛ս հանդէպ նորա առ եզերբ գետոյն. և զգաւազանն որ դարձաւ յօձ՝ առցես 'ի ձեռին քում:
¹⁶ Եւ ասասցես ցնա. Տէր Աստուած Եբրայեցւոց առաքեա՛ց զիս առ քեզ՝ և ասէ. Արձակեա՛ զժողովուրդ իմ զի պաշտեսցե՛ն զիս յանապատի. և ահա ո՛չ լուար ինձ մինչև ցայժմ:
¹⁷ Այսպէս ասէ Տէր. Այլ դո՛ւ գիտասցես՝ թէ ե՛ս եմ Տէր. ահաւասիկ ես հարկանեմ գաւազանաւս որ 'ի ձեռին իմում է՝ զջուր գետոյդ, և դարձցի յարի՛ւն:
¹⁸ Եւ ձկունք որ 'ի գետ այդր են, սատակեսցի՛ն, և նեխեսցի գետդ. և ո՛չ կարասցեն Եգիպտացիք ըմպել ջուր 'ի գետոյ այտի:
¹⁹ Եւ ասէ Տէր ցՄովսէս. Ասա՛ ցԱհարոն. Ա՛ռ զգաւազանդ և ձգեա՛ զձեռն քո 'ի վերայ ջրոցդ Եգիպտոսի, և 'ի վերայ գետոց նոցա. և 'ի վերայ լճաց նոցա, և 'ի վերայ խաղից նոցա, և 'ի վերայ ջրակուտաց նոցա. և եղիցի արի՛ւն: Եւ եղև արիւն յամենայն երկրին Եգիպտացւոց, 'ի փայտս և 'ի քարինս:
²⁰ Եւ արարին Մովսէս և Ահարոն՝ որպէս և պատուիրեաց նոցա Տէր. և վերացուցեալ զգաւազանն իւր՝ եհա՛ր զջուր գետոյն առաջի փարաւոնի և առաջի ծառայից նորա: և դարձոյց զամենայն ջուրս գետոյն յարիւն:
²¹ Եւ ձկունք որ 'ի գետ անդր էին՝ սատակեցան, և նեխեցաւ գետն. և ո՛չ կարէին Եգիպտացիքն ըմպել ջուր 'ի գետոյ անտի: և էր արի՛ւն յամենայն երկրին Եգիպտացւոց:
²² Եւ արարին ա՛յնպէս և գէտքն Եգիպտացւոց կախարդութեամբն իւրեանց: և խստացաւ սիրտն փարաւոնի և ո՛չ լուաւ նոցա՝ որպէս ասաց Տէր:
²³ Դարձաւ փարաւոն և եմուտ 'ի տուն իւր, և ո՛չ հաստատեաց զմիտս իւր և ո՛չ այնո՛ւ ևս:
²⁴ Եւ փորեցին ամենայն Եգիպտացիքն շուրջ զգետով ջուր ըմպելոյ. և ո՛չ կարէին ըմպել ջուր 'ի գետոյն:
²⁵ Եւ լցան աւուրք եւթն յետ հարկանելոյ Տեառն զգետն:

Գլուխ 8

¹ Եւ ասէ Տէր ցՄովսէս. Մո՛ւտ առ փարաւոն՝ և ասասցե՛ս ցնա. Այսպէս ասէ Տէր. Արձակեա՛ զժողովուրդ իմ, զի պաշտեսցեն զիս:
² Ապա թէ ո՛չ կամիս դու արձակել. ահա ես հարի՛ց զամենայն սահմանս քո գորտիւ:
³ Եւ բղխիցէ գետդ գո՛րտ. և ելեալ մտանիցեն 'ի տունս քո, և 'ի շտեմարանս սենեկաց քոց, և 'ի գահոյս քո, և 'ի տունս ծառայից քոց, և ժողովրդեան քո. և 'ի թոնիրս քո, և 'ի զանգուածս քո:
⁴ Եւ 'ի վերայ քո, և 'ի վերայ ժողովրդեան քո, և 'ի վերայ ծառայից քոց ելանիցեն գորտքն:
⁵ Եւ ասէ Տէր ցՄովսէս. Ասա՛ ցԱհարոն եղբայր քո. Ձգեա՛ ձեռամբ քո զգաւազանդ քո 'ի վերայ գետոյն, և 'ի վերայ ջրադարձից, և 'ի վերայ խաղից. և հանցես գո՛րտ 'ի վերայ երկրիդ Եգիպտացւոց:
⁶ Եւ ձգեա՛ց Ահարոն զձեռն իւր 'ի վերայ ջրոց Եգիպտացւոցն, և եհան գո՛րտ: ե՛լ գորտն և ծածկեաց զերկիրն Եգիպտացւոց:
⁷ Արարին նոյնպէս և գէտքն Եգիպտացւոց կախարդութեամբքն իւրեանց. և հանին գորտ յերկրին Եգիպտացւոց:
⁸ Կոչեա՛ց փարաւոն զՄովսէս և զԱհարոն՝ և ասէ. Աղօ՛թս արարէք առ Տէր, և 'ի բա՛ց արասցէ զգորտս յինէն՝ և 'ի ժողովրդենէ իմմէ. և արձակեցի՛ց զժողովուրդդ, և զոհեսցեն Տեառն:
⁹ Եւ ասէ Մովսէս ցփարաւոն. Ժա՛մ դիր ինձ, առ ե՞րբ արարից աղօթս վասն քո, և ծառայից քոց՝ և ժողովրդեան քոյ. սատակել զգորտդ 'ի քէն և 'ի ժողովրդենէ քումմէ, և 'ի տա՛նց ձերոց. բայց միայն 'ի գե՛տ անդր մնասցեն:
¹⁰ Եւ նա ասէ. Առ վաղի՛ւ: Եւ սա ասէ. Որպէս ասացերդ եղիցի՛. զի գիտասցես եթէ չի՛ք այլ ոք բա՛ց 'ի Տեառնէ Աստուծոյ մերմէ:
¹¹ Եւ բարձցին գորտքդ 'ի քէն և 'ի տանց քոց, և 'ի ծառայից քոց, և 'ի ժողովրդենէ քումմէ, բայց միայն 'ի գե՛տ անդր մնասցեն:
¹² Եւ ելին Մովսէս և Ահարոն 'ի փարաւոնէ: և աղաղակեաց Մովսէս առ Տէր՝ վասն ժամադրութեան գորտոյն, որպէս ժամադիր եղև փարաւոնի:
¹³ Եւ արար Տէր՝ որպէս և ասացն Մովսէս. և սատակեցաւ գորտն 'ի տանց և 'ի սրահից և յանդոց:
¹⁴ Եւ ժողովեցին զնոսա կո՛յտս կոյտս. և նեխեցա՛ւ երկիրն:
¹⁵ Իբրև ետես փարաւոն թէ եղև դիւրութիւն, ծանրացա՛ւ սիրտ նորա. և ո՛չ լուաւ նոցա՝ որպէս և խօսեցա՛ւ Տէր: Ի/գ
¹⁶ Եւ ասէ Տէր ցՄովսէս. Ասա՛ ցԱհարոն, թէ ձգեա՛ ձեռամբ քով զգաւազանդ և հա՛ր զհող երկրիդ. և եղիցի մո՛ւն 'ի մարդ և յանասուն, և յամենայն երկիրդ Եգիպտացւոց:
¹⁷ Եւ արարին ա՛յնպէս. ձգեաց Ահարոն ձեռամբ իւրով զգաւազանն և եհա՛ր զհող երկրին: և եղև մուն՝ 'ի մա՛րդ և յանասուն, և յամենայն հո՛ղ երկրին Եգիպտացւոց:
¹⁸ Արարին նո՛յնպէս և գէտքն Եգիպտացւոց կախարդութեամբքն իւրեանց հանել մուն, և ո՛չ կարէին: և եղև մուն 'ի մա՛րդ և յանասուն:
¹⁹ Եւ ասեն գէտքն ցփարաւոն. Մա՛տն Աստուծոյ է այդ: Եւ խստացաւ սիրտն փարաւոնի. և ո՛չ լուաւ նոցա՝ որպէս և խօսեցաւ Տէր: ԻԱ/դ
²⁰ Եւ ասէ Տէր ցՄովսէս. Կանխեա՛ ընդ առաւօտն և կա՛ց առաջի փարաւոնի. և ահա նա ելանէ 'ի ջուր անդր: և ասասցես ցնա. Ա՛յսպէս ասէ Տէր. Արձակեա՛ զժողովուրդ իմ զի պաշտեսցեն զիս:
²¹ Ապա թէ ո՛չ կամիցիս արձակել զժողովուրդ իմ. Ահա ե՛ս առաքեմ 'ի վերայ քո՝ և 'ի վերայ ծառայից քոց, և 'ի վերայ ժողովրդեան քոյ, և 'ի վերայ տա՛նց ձերոց շանաճանճ: և լցցին տունք Եգիպտացւոցդ շանաճանճիւ. և երկիրն յորում իցեն 'ի նմա:
²² Եւ սքանչելի՛ արարից յաւուրն յայնմիկ զերկիրն Գեսեմ, յորում ժողովուրդն իմ իցէ. և մի՛ լիցի անդ շանաճանճ. զի գիտասցես թէ ե՛ս եմ Տէր. Տէր ամենայն երկրի:
²³ Եւ տաց խտրո՛ց 'ի մէջ ժողովրդեան իմոյ՝ և 'ի մէջ ժողովրդեան քոյ: և վաղի՛ւ եղիցին շանաճանճդ այդ 'ի վերայ երկրիդ:
²⁴ Եւ արա՛ր Տէր այնպէս. և եկն շանաճանճ բազում 'ի տունս փարաւոնի, և 'ի տունս ծառայից նորա. և յամենայն երկիրն Եգիպտացւոց: և սատակեցա՛ւ երկիրն 'ի շանաճանճէ անտի:
²⁵ Եւ կոչեա՛ց փարաւոն զՄովսէս և զԱհարոն, և ասէ. Երթայք զոհեցէ՛ք Տեառն Աստուծոյ ձերում աստէն 'ի սմի՛ն երկրիս:
²⁶ Եւ ասէ Մովսէս. Չէ՛ մարթ այդմ լինել եթէ զգարշելիս Եգիպտացւոցդ զոհիցեմք Տեառն Աստուծոյ մերում: քանզի եթէ զոհիցեմք զգարշելիս Եգիպտացւոցդ առաջի նորա, քարկո՛ծ առնեն զմեզ:
²⁷ Այլ երթիցուք երեքօրեայ ճանապարհ յանապատ, և զոհեսցուք Տեառն Աստուծոյ մերում, որպէս և ասա՛ց մեզ Տէր:
²⁸ Եւ ասէ փարաւոն. Ե՛ս արձակեմ զձեզ, և զոհեսջիք Տեառն Աստուծոյ ձերում յանապատի. այլ մի՛ ուրեք հեռի ձգիցիք երթալ: և արդ՝ աղօ՛թս արարէք վասն իմ առ Տէր:
²⁹ Եւ ասէ Մովսէս. Ես ելի՛ց 'ի քէն, և աղօթս արարից առ Աստուած, և փարատեսցէ՛ շանաճանճդ 'ի փարաւոնէ, և 'ի ծառայից իւրոց, և 'ի ժողովրդենէ իւրմէ՝ վաղիւ: բայց մի՛ ևս խաբեսցէ փարաւոն առ 'ի չարձակելոյ զժողովուրդդ զոհել Տեառն:
³⁰ Ել Մովսէս 'ի փարաւոնէ. և եկաց յաղօթս առ Աստուած:
³¹ Եւ արար Տէր՝ որպէս և ասացն Մովսէս. և փարատեա՛ց շանաճանճն 'ի փարաւոնէ, և 'ի ծառայից նորա, և 'ի ժողովրդենէ նորա. և ո՛չ մնաց և ո՛չ մի:
³² Եւ ծանրացո՛յց փարաւոն զսիրտ իւր 'ի ժամանակին յայնմիկ. և ո՛չ կամեցաւ արձակել զժողովուրդն:

Գլուխ 9

¹ Եւ ասէ Տէր ցՄովսէս. Մո՛ւտ առ փարաւոն և ասասցես ցնա. Ա՛յսպէս ասէ Տէր Աստուածն Եբրայեցւոց արձակեա՛ զժողովուրդ իմ զի պաշտեսցեն զիս:
² Ապա թէ ո՛չ կամիս արձակել զժողովուրդ իմ, այլ տակաւին ունիցիս զդա:
³ Ահա ձեռն Տեառն եղիցի 'ի խաշինս քո որ 'ի դաշտի են, և 'ի ձիս, և յէշս և յուղտս, և յարջառ, և յոչխար՝ մահո՛ւ մեծաւ յոյժ:
⁴ Եւ արարից ե՛ս սքանչելիս 'ի մէջ խաշանցն Եգիպտացւոց, և 'ի մէջ խաշանցն Իսրայէլի. և ո՛չ ծախեսցի յամենայն որդւոցն Իսրայէլի կռինչն:
⁵ Եւ ժամանակեա՛ց Աստուած և ասէ. Վաղի՛ւ արասցէ քեզ Տէր զբանդ զայդ՝ 'ի վերայ երկրիդ:
⁶ Եւ արար Տէր զբանն զայն 'ի վաղիւ անդր: և սատակեցաւ ամենայն անասուն Եգիպտացւոցն. բայց յանասնոց որդւոցն Իսրայէլի ո՛չ ծախեցաւ՝ և ո՛չ ինչ:
⁷ Իբրև ետես փարաւոն, թէ ո՛չ ծախեցաւ յանասնոց որդւոցն Իսրայէլի և ո՛չ ինչ. ծանրացա՛ւ սիրտ նորա, և ո՛չ արձակեաց զժողովուրդն: ԻԳ/զ
⁸ Խօսեցաւ Տէր ընդ Մովսիսի և ընդ Ահարոնի՝ և ասէ. Առէ՛ք դուք լի՛ ձեռօք ձերովք մոխիր հնոցի, և ցանեսցէ՛ զայն Մովսէս ընդ երկինս առաջի փարաւոնի՝ և առաջի ծառայից նորա.
⁹ և եղիցի փոշի՛ ընդ ամենայն երկիրդ Եգիպտացւոց: Եւ եղիցի 'ի մարդ և յանասուն կե՛ղ, և եռասցեն խաղաւարտք 'ի մարդ և յանասուն յամենայն երկիրդ Եգիպտացւոց:
¹⁰ Եւ առին զմոխիր հնոցին առաջի փարաւոնի. և ցանեա՛ց զայն Մովսէս ընդ երկինս: և եղև կե՛ղ և խաղաւարտք եռացեալք 'ի մարդ և յանասուն:
¹¹ Եւ ո՛չ կարէին կախարդքն կալ առաջի Մովսիսի վասն կեղոյն. քանզի եղև կեղն և 'ի կախարդսն, և յամենայն երկիրն Եգիպտացւոց:
¹² Եւ խստացոյց Տէր զսիրտն փարաւոնի, և ո՛չ լուաւ նոցա՝ որպէս և ասաց Տէր ցՄովսէս: ԻԴ/է
¹³ Եւ ասէ Տէր ցՄովսէս. Կանխեա՛ ընդ առաւօտն, և կա՛ց առաջի փարաւոնի, և ասասցես ցնա. Ա՛յսպէս ասէ Տէր Աստուած Եբրայեցւոց, արձակեա՛ զժողովուրդ իմ զի պաշտեսցեն զիս:
¹⁴ Քանզի յայսմ ժամանակի առաքեցից ես զամենայն պատահարս 'ի սիրտ քո՝ և ծառայից քոց և ժողովրդեան քոյ. զի գիտասցես թէ չի՛ք ոք իբրև զիս յամենայն երկրի:
¹⁵ Քանզի ձգեալ զձեռն իմ հարի՛ց զքեզ՝ և զժողովուրդ քո մահուամբ, և սատակեսցի՛ս յերկրէ:
¹⁶ Եւ վասն ա՛յնորիկ պահեցար, զի 'ի քե՛զ ցուցից զզօրութիւն իմ. և զի պատմեսցի՛ անուն իմ ընդ ամենայն երկիր:
¹⁷ Եւ դու՝ տակաւին թևարկե՞ս զժողովրդեամբ իմով չարչարե՞լ զդոսա:
¹⁸ Եւ ես ահա տեղացի՛ց վաղիւ յայսմ ժամու կարկուտ սաստի՛կ յոյժ. որպիսի ո՛չ եղև յԵգիպտոս յօրէ յորմէ հաստատեցաւ մինչև ցայսօր:
¹⁹ Եւ արդ՝ փութա՛ ժողովել զանասուն քո, և որ ինչ իցէ քո 'ի դաշտի: զի ամենայն մարդ և անասուն որ գտցի 'ի դաշտի՝ և ո՛չ մտցէ 'ի տուն, անկցի 'ի վերայ նոցա կարկուտն՝ և սատակեսցէ՛:
²⁰ Որ միանգամ երկեա՛ւ 'ի բանէ Տեառն 'ի ծառայիցն փարաւոնի, ժողովեաց զծառայս իւր և զանասուն 'ի տուն:
²¹ Եւ որ ոչն անսաց 'ի միտս իւր բանիցն Տեառն, եթող # զծառայս իւր՝ և զանասուն իւր 'ի դաշտի:
²² Եւ ասէ Տէր ցՄովսէս. Ձգեա՛ զձեռն քո յերկինս. և եղիցի կարկո՛ւտ 'ի վերայ երկրիդ Եգիպտացւոց 'ի վերայ մարդկան և անասնոյ, և 'ի վերայ ամենայն բանջարոյ որ է 'ի դաշտի երկրիդ Եգիպտացւոց:
²³ Եւ ձգե՛աց Մովսէս զձեռն իւր յերկինս. և ե՛տ Տէր բարբառս և կարկուտ. և ընթանայր հուր ընդ երկիրն: և տեղեաց Տէր կարկուտ 'ի վերայ ամենայն երկրին Եգիպտացւոց:
²⁴ Էր կարկուտ և հո՛ւր բորբոքեալ 'ի մէջ կարկտին: և կարկուտն սաստի՛կ էր յոյժ. որպիսի ո՛չ եղև յամենայն երկրին Եգիպտացւոց, յորմէ հետէ եղեալ էր 'ի վերայ նորա ազգ:
²⁵ Եհա՛ր կարկուտն յամենայն երկիրն Եգիպտացւոց զամենայն որ ինչ է՛ր 'ի դաշտի՝ 'ի մարդոյ մինչև յանասուն. և զամենայն բանջար որ 'ի դաշտի էր՝ եհա՛ր կարկուտն. և զամենայն փայտ որ 'ի դաշտս՝ մանրեաց:
²⁶ Բայց յերկիրն Գեսեմ, ուր էին որդիքն Իսրայէլի՝ ո՛չ եղև կարկուտ:
²⁷ Եւ առաքեալ փարաւոնի կոչեաց զՄովսէս և զԱհարոն՝ և ասէ ցնոսա. Մեղա՛յ. այսուհետև Տէր արդա՛ր է. և ես՝ և ժողովուրդ իմ ամպարիշտ:
²⁸ Կացէ՛ք յաղօթս վասն իմ առ Տէր՝ և դադարեսցեն 'ի լինելոյ ձայնքն Աստուծոյ, և կարկուտն և հուր. և արձակեցի՛ց զձեզ, և ո՛չ ևս յաւելուցուք մնալ:
²⁹ Եւ ասէ ցնա Մովսէս. Այժմ իբրև ելի՛ց ըստ քաղաքս, ձգեցի՛ց զձեռս իմ առ Աստուած. և ձայնքն դադարեսցեն, և կարկուտն և անձրև ո՛չ ևս լիցի. զի ծանիցես թէ Տեառն է երկիր:
³⁰ Եւ դու և ծառայք քո՝ գիտեմ թէ չև՛ ևս երկերուք 'ի Տեառնէ Աստուծոյ:
³¹ Կտաւն և գարին հարա՛ւ. զի գարին յոճ կայր, և կտաւն սերմանացեալ էր:
³² Եւ ցորեանն և հաճար ո՛չ հարան. զի անագան էին:
³³ Եւ ել Մովսէս 'ի փարաւոնէ արտաքս քան զքաղաքն, և ձգեաց զձեռն իւր առ Տէր. և դադարեցին ձայնքն և կարկուտն. և անձրև ո՛չ ևս կաթեաց յերկիր:
³⁴ Իբրև ետես փարաւոն եթէ դադարեաց անձրևն և կարկուտ և ձայնքն, յաւել 'ի մեղանչել. և ծանրացոյց զսիրտ իւր և զծառայից իւրոց:
³⁵ Եւ խստացաւ սիրտն փարաւոնի՝ և ո՛չ արձակեաց զորդիսն Իսրայէլի՝ որպէս խօսեցաւ Տէր 'ի ձեռն Մովսիսի:

Գլուխ 10

¹ Խօսեցաւ Տէր ընդ Մովսիսի՝ և ասէ. Մո՛ւտ առ փարաւոն՝ զի ե՛ս խստացուցի զսիրտ նորա և զսիրտ ծառայից նորա. զի կարգա՛ւ եկեսցեն նշանքն իմ 'ի վերայ նոցա:
² Որպէս զի պատմիցէք յականջս որդւոց ձերոց, և որդւո՛ց որդւոց ձերոց, ո՛րչափ խաղացի ես ընդ Եգիպտացիսդ. և զնշանս իմ զոր արարի 'ի նոսա. և ծանիջիք՝ թէ ե՛ս եմ Տէր:
³ Մտին Մովսէս և Ահարոն առաջի փարաւոնի, և ասեն ցնա. Ա՛յսպէս ասէ Տէր Աստուածն Եբրայեցւոց. Մինչև յե՞րբ ո՛չ կամիցիս ամաչել յինէն, արձակեա՛ զժողովուրդ իմ զի պաշտեսցեն զիս:
⁴ Ապա թէ ո՛չ կամիցիս դու արձակել զժողովուրդ իմ, ահաւասիկ ես ածի՛ց 'ի սոյն ժամու վաղիւ մարա՛խ սաստիկ 'ի վերայ ամենայն սահմանաց քոց:
⁵ Եւ ծածկեսցէ՛ զամենայն երեսս երկրիդ, և ո՛չ կարիցես տեսանել զերկիր: և կերիցէ՛ զամենայն նշխարսն զոր եթող ձեզ կարկուտն. և կերիցէ զամենայն փայտ բուսեալ ձեզ 'ի վերայ երկրի:
⁶ Եւ լցցին տո՛ւնք քո, և տունք ծառայից քոց. և ամենայն տունք յամենայն երկրիդ Եգիպտացւոց. զոր ո՛չ երբէք տեսին հարք ձեր, և ո՛չ հաւք նոցա, յորմէ օրէ եղեն յերկրի մինչև ցայսօր: և խոյս տուեալ՝ ել 'ի փարաւոնէ:
⁷ Ասեն ցնա ծառայքն փարաւոնի. Մինչև ե՞րբ իցէ մեզ խոչդ այդ. արձակեա՛ զմարդիկն՝ զի պաշտեսցեն զՏէր Աստուած իւրեանց. եթէ գիտե՞լ կամիցիս՝ զի կորեա՛ւ Եգիպտոս:
⁸ Եւ դարձուցին զՄովսէս և զԱհարոն առ փարաւոն. և ասէ ցնոսա. Երթա՛յք պաշտեցէ՛ք զՏէր Աստուած ձեր. բայց ո՞վ և ո՛վ իցեն որ երթայցեն:
⁹ Եւ ասէ Մովսէս. Երիտասարդօք հանդերձ՝ և ծերովք մերովք երթիցուք. ուստերօք և դստերօք մերովք. արջառով և ոչխարով մերով երթիցուք. զի տօ՛ն է Տեառն Աստուծոյ մերոյ:
¹⁰ Եւ ասէ ցնոսա. Եղիցի՛ այդպէս. Տէր ընդ ձեզ. քանզի արձակե՛մ զձեզ, միթէ և զստացուա՞ծս ձեր: Տեսանէ՞ք զի չարիք կան 'ի ձեզ:
¹¹ Մի՛ այդպէս. այլ երթիցեն ա՛րք ևեթ, և պաշտեսցեն զԱստուած. քանզի զայդ իսկ խնդրէիք դուք: Եւ հանին զնոսա յերեսաց փարաւոնի:
¹² Եւ ասէ Տէր ցՄովսէս. Ձգեա՛ զձեռն քո 'ի վերայ երկրիդ Եգիպտացւոց, և ելցէ մարա՛խ 'ի վերայ երկրիդ Եգիպտացւոց, և կերիցէ զամենայն բանջար երկրիդ. և զամենայն պտուղ ծառոց զոր եթող կարկուտն:
¹³ Եւ ամբա՛րձ Մովսէս զձեռն իւր յերկինս. և ա՛ծ Տէր հողմ հարաւոյ յերկիր զտիւն ամենայն՝ և զգիշերն ամենայն: իբրև առաւօտ եղև, և հողմ հարաւոյ ա՛ռ զմարախն,
¹⁴ և եհան յամենայն երկիրն Եգիպտացւոց. և դադարեցոյց 'ի վերայ ամենայն սահմանացն Եգիպտացւոց: Յառաջ քան զայն ո՛չ եղև այնպիսի մարախ. և յետ այնորիկ ո՛չ եղև այնպիսի:
¹⁵ Եւ ծածկեա՛ց զամենայն երեսս երկրին. և ապականեցա՛ւ երկիրն. և եկեր զամենայն բանջար երկրին. և զամենայն պտուղ ծառոց, ուր մնա՛ց 'ի կարկտէ անտի. և ո՛չ մնաց կանաչ, ո՛չ 'ի ծառս և ո՛չ յամենայն բանջար դաշտի յամենայն երկրին Եգիպտացւոց:
¹⁶ Եւ փութացա՛ւ փարաւոն կոչել զՄովսէս և զԱհարոն, և ասէ. Մեղա՛յ առաջի Տեառն Աստուծոյ ձերոյ և ձեզ:
¹⁷ Արդ՝ ներեցէ՛ք այսմ ևս յանցանաց իմոց. և աղաչեցէ՛ք առ Տէր Աստուած ձեր, և փարատեսցէ՛ յինէն զմարախս զայս:
¹⁸ Եւ ել Մովսէս 'ի փարաւոնէ. և եկաց յաղօթս առ Աստուած:
¹⁹ Եւ դարձոյց Տէր հողմ սաստիկ 'ի ծովէ, և ա՛ռ զմարախն և ամաց 'ի ծովն Կարմիր. և ո՛չ մնաց մարախ յամենայն երկիրն Եգիպտացւոց:
²⁰ Եւ խստացոյց Տէր զսիրտն փարաւոնի, և ո՛չ արձակեաց զորդիսն Իսրայէլի: ԻԶ/թ
²¹ Եւ ասէ Տէր ցՄովսէս. Ձգեա՛ զձեռն քո յերկինս. և եղիցի խաւա՛ր 'ի վերայ երկրիդ Եգիպտացւոց. խաւար՝ շօշափելի՛:
²² Ձգեաց Մովսէս զձեռն իւր յերկինս. և եղև խաւա՛ր և մէգ և մութ 'ի վերայ ամենայն երկրին Եգիպտացւոց զերի՛ս աւուրս:
²³ Եւ ո՛չ ոք տեսանէր զեղբայր իւր զերիս աւուրս: և ո՛չ ոք յարեաւ յանկողնոյ իւրմէ զերիս աւուրս: բայց ամենայն որդւոցն Իսրայէլի լո՛յս էր յամենայն բնակութիւնս իւրեանց:
²⁴ Եւ կոչեաց փարաւոն զՄովսէս և զԱհարոն և ասէ ցնոսա. Երթա՛յք պաշտեցե՛ք զՏէր Աստուած ձեր, բայց զարջառ և զոչխար ձեր աստէ՛ն թողէք. և այլ աղխդ ձեր՝ երթիցե՛ն ընդ ձեզ:
²⁵ Եւ ասէ Մովսէս. Նա և դո՛ւ ևս տացես մեզ ողջակէզս և զոհս՝ զոր առնիցեմք Տեառն Աստուծոյ մերում:
²⁶ Այլ մեր անասո՛ւն իսկ երթիցէ ընդ մեզ, և ո՛չ թողուցումք և ո՛չ կճղա՛կ մի. քանզի 'ի նոցանէ՛ առնուցումք պաշտել զՏէր Աստուած մեր. և մեք ո՛չ գիտեմք զինչ մատուցանիցեմք Տեառն Աստուծոյ մերում մինչև ա՛նդր հասանիցեմք:
²⁷ Եւ խստացոյց Տէր զսիրտն փարաւոնի. և ո՛չ կամեցաւ արձակել զնոսա:
²⁸ Եւ ասէ փարաւոն. 'Ի բա՛ց գնա յինէն. զգո՛յշ լեր անձին քում. մի՛ ևս յաւելուցուս տեսանել զերեսս իմ. զի յորում աւուր երևիս դու ինձ՝ մեռանի՛ս:
²⁹ Եւ ասէ Մովսէս. Ասացեր՝ ո՛չ ևս երևեցայց երեսաց քոց:

Գլուխ 11

¹ Եւ ասէ Տէր ցՄովսէս. Ա՛յլ մևս ևս հարուածս ածից 'ի վերայ փարաւոնի և 'ի վերայ Եգիպտոսի. և ապա՛ արձակեսցէ զձեզ աստի. այլ յորժամ արձակեսցէ զձեզ, ամենևին հանցէ զձեզ աստի:
² Արդ՝ խօսեաց գաղտ յականջս ժողովրդեանն, և խնդրեսցեն իւրաքանչի՛ւր ոք յընկերէ իւրմէ, և կին 'ի դրացւոյ իւրմէ անօթս ոսկեղէնս և անօթս արծաթեղէնս, և հանդերձս:
³ Եւ ետ Տէր շնորհս ժողովրդեան իւրում առաջի Եգիպտացւոցն. և ետուն նոցա 'ի զարդ: Եւ այրն Մովսէս մեծարո՛յ եղև յոյժ առաջի Եգիպտացւոցն, և առաջի փարաւոնի, և առաջի ամենայն ծառայից նորա. և յաչս ժողովրդեանն:
⁴ Եւ ասէ Մովսէս. Ա՛յսպէս ասէ Տէր. Զհասարակ գիշերաւ ե՛ս մտից 'ի մէջ Եգիպտոսի:
⁵ Եւ սատակեցի՛ց զամենայն անդրանիկ յերկրէդ Եգիպտացւոց, յանդրանկէ անտի փարաւոնի որ նստի յաթոռ նորա, մինչև ցանդրանիկ աղախնոյն որ կայցէ առ երկանս, և մինչև ցանդրանիկ ամենայն անասնոց:
⁶ Եւ եղիցի աղաղա՛կ մեծ յամենայն երկրիդ Եգիպտացւոց. որպիսի ո՛չ եղև, և ո՛չ ևս յաւելուցու լինել նոյնպիսի:
⁷ Եւ 'ի մէջ ամենայն որդւոցն Իսրայէլի ո՛չ կռնչեսցէ և ո՛չ շուն մի լեզուաւ իւրով, և ո՛չ 'ի մարդոյ մինչև յանասուն. զի գիտասցես ո՞րչափ ինչ սքանչելիս արասցէ՛ Տէր 'ի մէջ Եգիպտացւոցդ՝ և 'ի մէջ Իսրայէլի:
⁸ Եւ իջցեն ամենայն ծառայքս քո այսոքիկ առ իս. և երկի՛ր պագցեն ինձ և ասասցեն. Ե՛լ դու և ամենայն ժողովուրդ քո, որում դուդ առաջնորդես. և ապա՛ ելից:
⁹ Եւ ել Մովսէս 'ի փարաւոնէ լի՛ բարկութեամբ: Եւ ասէ Տէր ցՄովսէս. Ո՛չ լուիցէ ձեզ փարաւոն, զի յաճախեցից զնշանս և զարուեստս յերկրիդ Եգիպտացւոց:
¹⁰ Եւ Մովսէ՛ս և Ահարոն արարին զամենայն նշանս և զարուեստս զայսոսիկ յերկրին Եգիպտացւոց առաջի փարաւոնի: Եւ խստացոյց Տէր զսիրտն փարաւոնի, և ո՛չ կամեցաւ արձակել զորդիսն Իսրայէլի յերկրէն Եգիպտացւոց:

Գլուխ 12

¹ Եւ խօսեցաւ Տէր ընդ Մովսիսի և ընդ Ահարոնի յերկրին Եգիպտացւոց, և ասէ.
² Ամիսս այս եղիցի ձեզ սկիզբն ամսոց, առաջին եղիցի ձեզ յամիսս տարւոյ:
³ Խօսեա՛ց ընդ ամենայն ժողովրդեան որդւոցն Իսրայէլի և ասասցես. 'Ի տասներորդում ամսեանս այսորիկ առցեն իւրեանց իւրաքանչիւր ոչխար ըստ տունս ազգաց իւրեանց. ոչխար ըստ երդ:
⁴ Եւ եթէ սակաւք իցեն 'ի տանն, որպէս թէ չիցե՛ն բաւական լինել ոչխարին՝ առցէ՛ ընդ իւր զդրացի իւր և զընկեր իւր ըստ մարդաթուի. իւրաքանչիւր ըստ բաւականի իւրում համարեսցի յոչխարն:
⁵ Ոչխար կատարեալ՝ արու, տարևոր, անարա՛տ լիցի ձեզ: յօդեա՛ց և յայծեաց առնուցուք.
⁶ և եղիցի ձեզ պահեալ մինչև 'ի չորս և 'ի տասն աւուր ամսոյս այսորիկ: և զենցեն զնա ամենայն բազմութիւն ժողովրդեան որդւոցն Իսրայէլի ընդ երեկս:
⁷ և առցեն յարենէ անտի և դիցեն 'ի վերայ երկուց սեմոցն և բարաւորին տանցն յորս ուտիցեն զնա 'ի նոսա:
⁸ Եւ կերիցեն զմիսն 'ի գիշերիս յայսմիկ խորովեալ հրով. և բաղարջ ընդ եղիգի կերիցեն:
⁹ Եւ ո՛չ ուտիցէք 'ի նոցանէ հում, և ո՛չ պախ եփեալ ջրով. այլ խորովեալ հրով. զգլուխն ոտիւքն հանդերձ, և զփորոտին նորա:
¹⁰ Եւ ո՛չ թողուցուք 'ի նմանէ յայգ. և ոսկր մի՛ բեկանիցէք 'ի նմանէ: և որ ինչ մնայցէ 'ի նմանէ յայգ՝ հրո՛վ այրեսջիք:
¹¹ Եւ ա՛յսպէս ուտիցէք, գօտիք ձեր ընդ մէջս, և կօշիկք ձեր յոտս, և ցուպ ձեր 'ի ձեռին: փութանակի ուտիցէք, զի զատիկ Տեառն է:
¹² Եւ անցից ընդ ամենայն երկիրդ Եգիպտացւոց 'ի գիշերիս յայսմիկ, և հարից զամենայն անդրանիկ երկրիդ Եգիպտացւոց 'ի մարդոյ մինչև յանասուն: և յամենայն դիսն Եգիպտացւոց արարից վրէժխնդրութիւն, զի ե՛ս եմ Տէր:
¹³ Եւ եղիցի ձեզ արիւնդ նշանակեալ 'ի վերայ տանց՝ յորս ուտիցէք դուք անդ: և տեսից զարիւնդ և ապրեցուցի՛ց զձեզ. և ո՛չ լինիցին 'ի ձեզ հարուածք 'ի սատակել՝ յորժամ հարկանիցեմ յերկրիդ Եգիպտացւոց:
¹⁴ Եւ եղիցի ձեզ արիւնդ այդ 'ի յիշատա՛կ, և տօնեցէք զդա՝ տօ՛ն Տեառն յազգս ձեր. օրէն յաւիտենակա՛ն տօնեցէք զդա:
¹⁵ Զեւթն օր բաղա՛րջ ուտիցէք, յառաջնմէ իսկ օրէ անտի՝ անհե՛տ առնիջիք զխմոր 'ի տանց ձերոց: ամենայն որ ուտիցէ խմորեալ՝ սատակեսցի՛ անձնն այն յԻսրայէլէ:
¹⁶ Յառաջնմէ օրէն մինչև յօ՛րն եւթներորդ. և օրն եւթներորդ նուիրեա՛լ եղիցի ձեզ սո՛ւրբ. զամենայն գործ սպասու մի՛ գործիցէք 'ի նմա, բայց միայն որ գործիցի ամենայն անձին՝ այն միա՛յն գործեսցի ձեզ:
¹⁷ Եւ պահեսջի՛ք զպատուիրանս իմ զայս, զի յաւուր յայսմիկ հանի՛ց զզօրութիւն ձեր յերկրէս Եգիպտացւոց. և առնիցէք զօրս զայս յազգս ձեր օրէ՛ն յաւիտենական:
¹⁸ 'Ի սկսանել չորեքտասաներորդի աւուր ամսոյն առաջնոյ. յերեկորեայ բաղա՛րջ ուտիցէք, մինչև ցքսա՛ն և մի օր ամսոյն ցերեկոյ:
¹⁹ Զեւթն օր մի՛ գտցի խմոր 'ի տունս ձեր. ամենայն որ ուտիցէ խմորեալ՝ սատակեսցի՛ անձն այն յԻսրայէլէ: յեկա՛ց և 'ի բնակաց երկրին
²⁰ խմորեալ մի՛ ուտիցեն. յամենայն բնակութեան ձերում ուտիցէք բաղա՛րջ: ԻԸ
²¹ Եւ կոչեաց Մովսէս զամենայն ծերակոյտ որդւոցն Իսրայէլի. և ասէ ցնոսա. Երթա՛յք առէք ձեզ ոչխար ըստ ազգս ձեր, և զենջի՛ք 'ի զատիկ:
²² Եւ առնուցուք մշտիկ զոպայի թաթաւեալ յարեան որ առ դրօքն իցէ, և սրսկեսջի՛ք զբարաւորաւն և զերկոքումբք սեմովքն յարենէ անտի որ առ դրօքն. բայց դուք մի՛ ելանիցէք իւրաքանչիւր ընդ դուռն տան իւրոյ մինչև ցառաւօտ:
²³ Եւ անցցէ Տէր հարկանել զԵգիպտացիսդ: Եւ տեսանիցէ զարիւնն որ 'ի վերայ բարաւորին և 'ի վերայ երկուց սեմոց, և զանց առնիցէ Տէր զդրօքն. և ո՛չ տայցէ թոյլ սատակչին մտանե՛լ 'ի տունս ձեր և հարկանել:
²⁴ Եւ պահեսջի՛ք զբանս զայս՝ օրէ՛ն յաւիտենական քե՛զ և որդւոց քոց, մինչև ցյաւիտեան:
²⁵ Եւ եթէ մտանիցէք յերկիրն զոր տացէ ձեզ Տէր՝ որպէս և խօսեցաւն, պահեսջի՛ք զպաշտօնդ զայդ:
²⁶ Եւ եղիցի եթէ ասիցեն ցձեզ որդիք ձեր. Զի՞նչ է պաշտօնս այս ձեզ.
²⁷ ասասջիք նոցա, եթէ զո՛հ զատկի Տեառն է այս. յորժամ պահեաց զտունս որդւոցն Իսրայէլի յԵգիպտոս. մինչ հարկանէր զԵգիպտացիսն, և զտունս մեր ապրեցոյց: Եւ խոնարհեցաւ ժողովուրդն` և երկի8}}ր եպագ:
²⁸ Եւ գնացեալ որդիքն Իսրայէլի արարի՛ն որպէս պատուիրեաց Տէր Մովսիսի և Ահարոնի, նոյնպէս և արարին:
²⁹ Եւ եղև 'ի հասարա՛կ գիշերի՝ և Տէր եհար զամենայն անդրանիկս յերկրին Եգիպտացւոց. յանդրանկանէ՛ անտի փարաւոնի որ նստէր յաթոռ նորա, մինչև յանդրանիկ գերւոյն որ կայր 'ի վիրապի. և զամենայն անդրանիկ անասնոց:
³⁰ Եւ յարեաւ փարաւոն գիշերայն, ի՛նքն և ամենայն ծառայք իւր, և ամենայն Եգիպտացիք. և եղև աղաղա՛կ մեծ յամենայն երկրին Եգիպտացւոց. զի ո՛չ գոյր տուն յորում ո՛չ գոյր մեռեալ 'ի նմա:
³¹ Եւ կոչեաց փարաւոն զՄովսէս և զԱհարոն գիշերայն, և ասէ ցնոսա. Արիք և ելէ՛ք 'ի ժողովրդենէ իմմէ. և դուք և որդիքն Իսրայէլի, երթա՛յք պաշտեցէ՛ք զՏէր Աստուած ձեր. որպէս ասացէք:
³² Եւ զարջառ և զոչխար ձեր առեալ գնացէ՛ք՝ որպէս և ասացէք. բայց և զիս օրհնեցէ՛ք:
³³ Եւ բռնադատէին Եգիպտացիքն զժողովուրդն փութանակի՛ հանել զնոսա յերկրէ անտի. քանզի ասէին՝ թէ ամենեքեան իսկ մեռանիմք: Լ
³⁴ Եւ ա՛ռ ժողովուրդն զհայսն իւրեանց մինչ չև՛ խմորեալ էր. զզանգուածս իւրեանց ծրարեալ 'ի կտաւս իւրեանց՝ 'ի վերայ ուսոց իւրեանց:
³⁵ Եւ որդիքն Իսրայէլի արարի՛ն որպէս և հրաման ետ նոցա Մովսէս. և խնդրեցին յԵգիպտացւոցն անօթս ոսկեղէնս և անօթս արծաթեղէնս, և հանդերձս:
³⁶ Եւ ետ Տէր շնորհս ժողովրդեան իւրում առաջի Եգիպտացւոցն, և ետուն նոցա 'ի զարդ՝ և կողոպտեցին զԵգիպտացիսն:
³⁷ Եւ չուեցին որդիքն Իսրայէլի յՌամեսեայ 'ի Սոկքովթ, վեց հարիւր հազար այր հետևակ, թո՛ղ զայլ աղխ:
³⁸ Եւ խառնիճաղանճ բազում ե՛լ ընդ նոսա. և արջառ և ոչխար և անասուն բազում յոյժ:
³⁹ Եւ եփեցին զհայսն զոր հանին յԵգիպտոսէ, նկա՛նս բաղարջս, քանզի ո՛չ խմորեցաւ. զի հանին զնոսա Եգիպտացիքն՝ և ո՛չ կարէին մնալ, և ո՛չ պաշար արարին իւրեանց ճանապարհին:
⁴⁰ Եւ բնակութիւն որդւոցն Իսրայէլի զոր բնակեցին յերկրին Եգիպտացւոց և յերկրին Քանանացւոց, ինքեանք և հարք իւրեանց. ամք չորեք հարիւր և երեսուն: Եւ եղև յետ չորեքհարիւր և երեսուն ամի,
⁴¹ յաւուր յայնմիկ ելին ամենայն զօրութիւնք Տեառն յերկրէն Եգիպտացւոց
⁴² գիշերի. որ է յառաջապահե՛ստ Տեառն հանել զնոսա յերկրէն Եգիպտացւոց. ա՛յն գիշեր յառաջապահե՛ստ Տեառն լինել ամենայն որդւոցն Իսրայէլի յազգս նոցա: ԼԱ
⁴³ Խօսեցաւ Տէր ընդ Մովսիսի և ընդ Ահարոնի՝ և ասէ. Ա՛յս է օրէն զատկի. ամենայն այլազգի մի՛ կերիցէ 'ի նմանէ:
⁴⁴ Եւ զամենայն ծառայ ուրուք և զարծաթագին թլփատեսցե՛ս, և ապա՛ կերիցէ 'ի նմանէ:
⁴⁵ Պանդուխտն և վարձկանն մի՛ կերիցէ 'ի նմանէ:
⁴⁶ 'Ի տան միում կերիցի. և մի՛ հանիցէք 'ի մսոյ անտի արտաքս քան զտունն: և Ոսկր մի՛ բեկանիցէք 'ի նմանէ:
⁴⁷ Ամենայն ժողովուրդ որդւոցն Իսրայէլի առնիցեն զայն:
⁴⁸ Ապա թէ մերձենայցէ առ ձեզ եկամուտ՝ և առնիցէ զզատիկն Տեառն, թլփատեսցե՛ն զամենայն արու մանուկ նորա, և ապա՛ մերձեսցի առնել զնա և եղիցի իբրև զբնա՛կ երկրին: ամենայն անթլփատ մի՛ կերիցէ 'ի նմանէ:
⁴⁹ Օրէն՝ մի և նո՛յն կացցէ բնակին և եկին՝ որ գայցէ մերձենա՛լ 'ի ձեզ:
⁵⁰ Եւ արարին ամենայն որդիքն Իսրայէլի՝ որպէս պատուիրեաց Տէր Մովսիսի և Ահարոնի, նոյնպէս և արարին:
⁵¹ Եւ եղև յաւուր յայնմիկ՝ եհա՛ն Տէր զորդիսն Իսրայէլի յերկրէն Եգիպտացւոց հանդերձ զօրութեամբ իւրեանց:

Գլուխ 13

¹ Խօսեցա՛ւ Տէր ընդ Մովսիսի՝ և ասէ.
² Սրբեա՛ դու ինձ զամենայն անդրանիկս նախծին որ բանայ զամենայն արգանդ 'ի մէջ որդւոցն Իսրայէլի. 'ի մարդո՛յ մինչև յանասուն՝ քանզի ի՛մ է:
³ Եւ ասէ Մովսէս ցժողովուրդն. Յիշեսջի՛ք զօրս զայս յորում ելէք յԵգիպտոսէ 'ի տանէ ծառայութեան. զի հզօ՛ր ձեռամբ եհան զձեզ Տէր աստի. և ո՛չ ուտիցէք խմորուն:
⁴ Զի յայսմ աւուր ելէք դուք յամսեանս կանխոց:
⁵ Եւ եղիցի յորժամ եթէ տանիցի զքեզ Տէր Աստուած քո յերկրին Քանանացւոց, և Քետացւոց, և Ամովրհացւոց, և Խևացւոց, և Յեբուսացւոց, և Փերեզացւոց և Գերգեսացւոց. զոր երդուա՛ւ հարցն քոց տալ քեզ, երկիր որ բղխէ՛ զկաթն և զմեղր. և արասցե՛ս զպաշտօնս զայս յամսեանս յայսմիկ:
⁶ Զեւթն օր բաղա՛րջ կերիջի՛ք. և յաւուրն եւթներորդի տօ՛ն Տեառն:
⁷ Բաղարջ կերիջիք. զեւթն օր ո՛չ երևեսցի առ քեզ խմորուն. և ո՛չ եղիցի խմոր յամենայն սահմանս քո:
⁸ Եւ պատմեսցես որդւոյ քում յաւուր յայնմիկ և ասասցես. Վասն ա՛յնորիկ արար ինձ Տէր Աստուած. մինչ ելանէի յԵգիպտոսէ:
⁹ Եւ եղիցի քեզ նշա՛ն 'ի ձեռին քում, և յիշատակ առաջի աչաց քոց. զի լինիցին օրէնք Տեառն 'ի բերա՛ն քում. զի հզօր ձեռամբ եհան զքեզ Տէր յԵգիպտոսէ.
¹⁰ և պահեսջիք զօրէնս զայս 'ի ժամանակաց 'ի ժամանակս, և աւուրց յաւուրս:
¹¹ Եւ եղիցի յորժամ տանիցի զքեզ Տէր Աստուած քո յերկիրն Քանանացւոց՝ որպէս երդուաւ քեզ և հարցն քոց. և տացէ զնա քեզ.
¹² զատուսցե՛ս Տեառն զամենայն արու որ բանայ զարգանդ. և զամենայն որ բանայ զարգանդ յանդէոց և յանասնոց քոց որ լինիցի քեզ. արուքն սո՛ւրբ Տեառն լինիցին:
¹³ Եւ զամենայն որ բանայցէ զարգանդ իշոյ, փոխանակեսցես ընդ ոչխարի. և եթէ ո՛չ փոխանակեսցես, փրկեսցե՛ս զնա. զամենայն անդրանիկս որդւոց քոց փրկեսցե՛ս:
¹⁴ Եւ եթէ հարցանիցէ զքեզ որդին քո յետ այսորիկ և ասիցէ՝ թէ զի՞նչ է այդ. ասասցե՛ս ցնա. Զի հզօր ձեռամբ եհան զմեզ Տէր յերկրէն Եգիպտացւոց 'ի տանէ ծառայութեան:
¹⁵ Յորժամ խստացաւ փարաւոն չարձակել զմեզ. կոտորեաց Տէր զամենայն անդրանիկս յերկրին Եգիպտացւոց. յանդրանկէ մարդոյ մինչև ցանդրանիկս անասնոյ: Վասն այնորիկ ես մատուցանեմ Տեառն զամենայն արու որ բանայ զարգանդ. և զամենայն անդրանիկս որդւոց իմոց փրկեցի՛ց:
¹⁶ Եւ եղիցի նշա՛ն 'ի վերայ ձեռին քոյ. և անշա՛րժ առաջի աչաց քոց. քանզի հզօր ձեռա՛մբ եհան զմեզ Տէր յերկրէն Եգիպտացւոց:
¹⁷ Եւ իբրև արձակեաց փարաւոն զժողովուրդն. ո՛չ առաջնորդեաց նոցա Աստուած ընդ երկիրն Փղշտացւոց, ընդ կարճոյ ճանապարհն. քանզի ասաց Աստուած, թէ գուցէ զանգիտիցէ ժողովուրդն՝ յորժամ տեսանիցէ զպատերազմն, և դառնայցէ՛ յԵգիպտոս:
¹⁸ Եւ պատեաց ած Աստուած զժողովուրդն ընդ ճանապարհ անապատին՝ առ Կարմիր ծովուն: Եւ 'ի հինգերորդ ազգի ելին որդիքն Իսրայէլի յերկրէն Եգիպտացւոց:
¹⁹ Եւ ա՛ռ Մովսէս զոսկերսն Յովսեփու ընդ իւր. քանզի երդմնեցո՛յց Յովսէփ զորդիսն Իսրայէլի, և ասէ. Եթէ այցելութեամբ ա՛յց արասցէ ձեզ Տէր, հանջի՛ք զոսկերս իմ աստի ընդ ձեզ:
²⁰ Եւ չուեալ որդւոցն Իսրայէլի 'ի Սոկքովթայ, բանակեցան յՈթոմ առ անապատին:
²¹ Եւ Աստուած առաջնորդէր նոցա ցերեկ՝ սեա՛մբ ամպոյ. ցուցանել նոցա զճանապարհն. և զցայգ՝ սեամբ հրոյ, լուսատո՛ւ լինել նոցա 'ի գնալն՝ զցայգ և զցերեկ:
²² Եւ ո՛չ պակասէր սիւն ամպոյն 'ի տուէ, և սիւն հրոյն 'ի գիշերի. առաջի ամենայն որդւոցն Իսրայէլի:

Գլուխ 14

¹ Եւ խօսեցաւ Տէր ընդ Մովսիսի և ասէ.
² Խօսեա՛ց ընդ որդիսն Իսրայէլի, և դարձցին բանակեսցին դէմ յանդիման Հանգրուանին. ընդ Մագդովղ և ընդ ծովն. հանդէպ Բէեղսեպփոնեայ. յանդիման նոցա բանակեսցիս առ ծովեզերբն:
³ Եւ ասասցէ փարաւոն զորդւոցդ Իսրայէլի թէ մոլորեա՛լ են յերկրին, քանզի պատեաց զնոսա անապատն:
⁴ Եւ ես խստացուցի՛ց զսիրտն փարաւոնի և պնդեսցի զհետ դոցա:
⁵ Եւ փառաւորեցա՛յց 'ի փարաւոն և յամենայն զօրս նորա. և ծանիցեն ամենայն Եգիպտացիքն թէ ե՛ս եմ Տէր: Եւ արարին ա՛յնպէս: ԼԴ
⁶ Եւ ա՛զդ եղև արքային Եգիպտացւոց եթէ փախեաւ ժողովուրդն: Եւ շրջեցաւ սիրտն փարաւոնի՝ և ծառայից իւրոց 'ի վերայ ժողովրդեանն, և ասեն. Զի՞նչ գործեցաք զայն զի արձակեցաք զորդիսն Իսրայէլի, զի մի՛ ծառայեսցեն մեզ:
⁷ Եւ հանդերձեաց փարաւոն զկառս իւր. և տարաւ ընդ իւր զամենայն ժողովուրդն իւր. և ա՛ռ վեցհարիւր կառս ընտիրս, և զամենայն երիվարս Եգիպտացւոց, և սպառազէ՛նս 'ի վերայ ամենեցուն:
⁸ Եւ խստացոյց Տէր զսիրտն փարաւոնի արքային Եգիպտացւոց, և պնդեցաւ զհետ որդւոցն Իսրայէլի. և որդիքն Իսրայէլի ելանէին բարձրացեալ ձեռամբ:
⁹ Եւ պնդեցան Եգիպտացիքն զհետ նոցա, և գտին զնոսա բանակեալս առ ծովեզերբն. և ամենայն երիվարք՝ և կառք փարաւոնի, և հեծեալք նորա և զօրք նորա յանդիման Հանգրուանին. հանդէպ Բեէղսեպփոնայ:
¹⁰ Եւ եհաս մօտ փարաւոն: Եւ համբարձեալ որդւոցն Իսրայէլի զաչս իւրեանց տեսանէին՝ զի բանակեցան Եգիպտացիքն 'ի թիկանց նոցա, և երկեա՛ն յոյժ:
¹¹ Եւ բողոքեցի՛ն որդիքն Իսրայէլի առ Տէր: Եւ ասեն ցՄովսէս. Իբրև թէ ո՞չ գոյին գերեզմանք յերկրին Եգիպտացւոց. հաներ զմեզ սպանանե՞լ յանապատի աստ. զի՞նչ գործեցեր զայս ընդ մեզ, զի հաներ զմեզ յԵգիպտոսէ:
¹² Ո՞չ այս այն բանք են՝ զոր խօսեցաք ընդ քեզ յերկրին Եգիպտացւոց, թէ թո՛յլ տուր մեզ զի ծառայեսցուք Եգիպտացւոցն. զի լա՛ւ էր մեզ ծառայել Եգիպտացւոցն, քան մեռանել յայսմ անապատի:
¹³ Եւ ասէ Մովսէս ցժողովուրդն. Քաջալերեցարո՛ւք, պի՛նդ կացէք. և տեսանիցէք զփրկութիւն 'ի Տեառնէ զոր արասցէ ձեզ այսօր. զի զոր օրինակ տեսէք զԵգիպտացիսն այսօր, ո՛չ ևս յաւելուցուք տեսանել զնոսա յաւիտեանս ժամանակաց:
¹⁴ Տէր տայ պատերազմ ընդ ձեր, և դուք լռեցէ՛ք:
¹⁵ Եւ ասէ Տէր ցՄովսէս. Զի՞ գոչես առ իս. խօսեա՛ց ընդ որդիսդ Իսրայէլի՝ և չուեսցեն:
¹⁶ Եւ դու ա՛ռ զգաւազանդ քո. և ձգեա՛ զձեռն քո 'ի վերայ ծովուն և սպառեա՛ զնա. և մտցեն որդիքն Իսրայէլի 'ի մէջ ծովուն ընդ ցամաք:
¹⁷ Եւ ահա ես խստացուցի՛ց զսիրտն փարաւոնի, և զԵգիպտացւո՛ցն ամենեցուն, և մտցեն զկնի դոցա: Եւ փառաւորեցա՛յց ես 'ի փարաւոն և յամենայն զօրս նորա, և 'ի կառս նորա և յերիվարս նորա:
¹⁸ Եւ ծանիցեն ամենայն Եգիպտացիքն՝ թէ ե՛ս եմ Տէր. 'ի փառաւորել իմում 'ի փարաւոն՝ և 'ի կառս նորա և յերիվարս նորա:
¹⁹ Եւ ամբարձա՛ւ հրեշտակն Աստուծոյ որ երթայր առաջի բանակի որդւոցն Իսրայէլի. և չոգաւ զկնի նոցա. և վերացաւ սիւն ամպոյն յերեսաց նոցա, և եկաց 'ի թիկանց նոցա:
²⁰ Եւ եմուտ 'ի մէջ բանակի Եգիպտացւոցն, և 'ի մէջ բանակի Իսրայէլացւոցն, և եղև խաւա՛ր և մէգ. և անց գիշերն. և ո՛չ խառնեցան ընդ միմեանս զամենայն գիշերն:
²¹ Եւ ձգեաց Մովսէս զձեռն իւր 'ի վերայ ծովուն. և դարձո՛յց անդրէն զծովն բռնութեամբ հողմոյ հարաւոյ զամենայն գիշերն. և արա՛ր զծովն ցամաք. և պատառեցաւ ջուրն:
²² Եւ մտին որդիքն Իսրայէլի 'ի մէջ ծովուն ընդ ցամաք: Եւ եղև ջուրն պարիսպ ընդ աջմէ նոցա, և ընդ ահեկէ իւրեանց: ԼԵ
²³ Պնդեցան Եգիպտացիքն՝ և մտին զկնի նոցա, ամենայն երիվարք փարաւոնի, և կառք նորա, և հեծեալք նորա 'ի մէջ ծովուն:
²⁴ Եւ եղև յառաւօտին պահուն, հայեցա՛ւ Տէր 'ի բանակն Եգիպտացւոց սեամբ հրոյ և ամպոյ. և խռովեաց զբանակն Եգիպտացւոցն.
²⁵ և կապեա՛ց զանիւս կառաց նոցա, և վարէր զնոսա բռնութեամբ: Ասեն Եգիպտացիքն. Փախիցո՛ւք յերեսաց Իսրայէլի. զի Տէր պատերազմի վասն նոցա ընդ Եգիպտացիսս:
²⁶ Եւ ասէ Տէր ցՄովսէս. Ձգեա՛ զձեռն քո 'ի վերայ ծովուդ, և կարկատեսցի՛ անդրէն ջուրդ. և ծածկեսցէ՛ զԵգիպտացիսդ, և զկառս դոցա և զհեծեալս իւրեանց:
²⁷ Եւ ձգեա՛ց Մովսէս զձեռն իւր 'ի վերայ ծովուն, և դարձաւ ջուրն ընդ առաւօտն 'ի տեղի իւր: և Եգիպտացիքն փախեան յերեսաց ջրոյն: և թօթափեա՛ց Տէր զԵգիպտացիսն 'ի մէջ ծովուն:
²⁸ Եւ դարձուցեալ զջուրսն, ծածկեաց զկառս և զհեծեալս, և զամենայն զօրութիւն փարաւոնի. որ մտեալ էին զհետ նոցա 'ի ծով անդր. և ո՛չ մնաց 'ի նոցանէ և ո՛չ մի:
²⁹ Եւ որդիքն Իսրայէլի գնացին ընդ ցամաք 'ի մէջ ծովուն. և ջուրն պարի՛սպ էր ընդ աջմէ նոցա և ընդ ահեկէ իւրեանց:
³⁰ Եւ ապրեցո՛յց Տէր զԻսրայէլ յաւուր յայնմիկ 'ի ձեռաց Եգիպտացւոցն:
³¹ Եւ ետես Իսրայէլ զԵգիպտացիսն մեռեալս առ ափն ծովուն: Եւ ետես Իսրայէլ զձեռն մեծ զոր արար Տէր ընդ Եգիպտացիսն. և երկեա՛ւ ժողովուրդն 'ի Տեառնէ. և հաւատացին յԱստուած՝ և 'ի Մովսէս ծառայ նորա:

Գլուխ 15

¹ Յայնժամ երգեաց Մովսէս՝ և որդիքն Իսրայէլի զօրհնութիւնս զայս Աստուծոյ, և ասեն. Օրհնեսցուք զՏէր զի փառօք է փառաւորեալ. Զերիվարս և զհեծեալս նոցա ընկէ՛ց 'ի ծով.
² օգնական ընդունելի իմ Տէր, և եղև ինձ 'ի փրկութիւն: Սա՛ է իմ Աստուած և փառաւոր արարից զսա: Աստուած հօր իմոյ՝ և բա՛րձր արարից զսա:
³ Տէր խորտակէ զպատերազմունս, Տէր անուն նորա:
⁴ Զկառս փարաւոնի՝ և զզօրութիւնս նորա ընկէ՛ց 'ի ծով. զընտիրս հեծելոց և զսպառազէնս. ընկղմեցան 'ի ծով Կարմիր:
⁵ Խորք ծածկեցին զնոսա. ընկլան յանդունդս իբրև զվէմս:
⁶ Աջ քո Տէր փառաւորեալ է զօրութեամբ իւրով, աջ քո Տէր խորտակեաց զթշնամին:
⁷ Եւ բազմութեամբ փառաց քոց մանրեցեր զհակառակորդս, առաքեցեր զբարկութիւն քո, և եկե՛ր զնոսա իբրև զեղէգն:
⁸ Եւ հողմով սրտմտութեամբ քով պատառեցան ջուրք. պաղեցան որպէս պարիսպ ջուրք. պաղեցան ալիք 'ի մէջ ծովուն:
⁹ Ասա՛ց թշնամին. Հալածեցից և հասից, բաժանեցից զաւարն, և լցուցի՛ց 'ի նոցանէ զանձն իմ: Սատակեցից սրով իմով. տիրեսցէ՛ նոցա ձեռն իմ:
¹⁰ Առաքեցեր զհողմն քո, և ծածկեաց զնոսա ծով. ընկղմեցան որպէս կապա՛ր 'ի ջուրս սաստիկս:
¹¹ Ո՞վ իցէ նման քեզ յաստուածս Տէր. և կամ ո՞վ նմանիցէ քեզ փառաւորեալդ 'ի սուրբս: Սքանչելի փառօք՝ որ առնես զնշանս.
¹² ձգեցեր զաջ քո՝ և եկուլ զնոսա երկիր:
¹³ Առաջնորդեցեր արդարութեամբ ժողովրդեան քում, այսմ զոր փրկեցեր: Մխիթարեցեր զօրութեամբ քով 'ի բանակետղ սրբութեան քոյ.
¹⁴ լուան ազգք և բարկացան, և երկունք կալան զբնակիչս Քանանացւոց:
¹⁵ Յայնժամ տագնապեցան դատաւորք Եդովմայ, և իշխանք Մովաբացւոց: Կալաւ զնոսա դողումն, հալեցա՛ն ամենայն բնակիչք Քանանացւոց:
¹⁶ Անկցի 'ի վերայ նոցա ա՛հ և երկիւղ. մեծութեամբ բազկի քոյ քարասցին: Մինչև անցցէ ժողովուրդ քո Տէր. մինչև անցցէ՛ ժողովուրդ քո այս զոր ստացար:
¹⁷ Տարեալ տնկեսցես զնոսա 'ի լեառն ժառանգութեան քոյ, 'ի պատրաստութիւն բնակութեան քոյ: Զոր արարեր Տէր սրբութիւն. Տէր զոր պատրաստեցին ձեռք քո.
¹⁸ Տէր թագաւոր յաւիտեան. և յաւիտեանս և և՛ս:
¹⁹ Զի մտին երիվարք փարաւոնի կառօք և հեծելովք նորա 'ի ծով. և ած 'ի վերայ նոցա Տէր զջուրս ծովուն. և որդիքն Իսրայէլի գնացին ընդ ցամաք 'ի մէջ ծովուն:
²⁰ Եւ ա՛ռ Մարիամ մարգարէ քոյրն Ահարոնի զթմբուկն 'ի ձեռին իւր. և ելին ամենայն կանայք զհետ նորա թմբկօք և պարուք:
²¹ Եւ յառաջէր Մարիամ և ասէր. Օրհնեսցո՛ւք զՏէր, զի փառօք փառաւորեալ է. Զերիվարս և զհեծեալս ընկէ՛ց 'ի ծով:
²² Եւ խաղացո՛յց Մովսէս զորդիսն Իսրայէլի 'ի Կարմիր ծովէ անտի. և ած զնոսա յանապատն 'ի Սո՛ւր: Եւ գնացին երեքօրեայ ճանապարհ յանապատի անդ. և ո՛չ գտանէին ջուր ըմպելոյ:
²³ Եկին 'ի Մեռա, և ո՛չ կարէին ըմպել ջուր 'ի Մեռայն. քանզի դա՛ռն էր. վասն այնորիկ անուանեաց զանուն տեղւոյն այնորիկ՝ Դառնութիւն:
²⁴ Եւ տրտնջեա՛ց ժողովուրդն զՄովսիսէ և ասեն. Զի՞նչ արբցուք:
²⁵ Աղաղակեաց Մովսէս առ Տէր: և եցոյց նմա Տէր փայտ: և արկ զայն 'ի ջուրն, և քաղցրացա՛ւ ջուրն: Եւ ա՛նդ եդ նմա իրաւունս և դատաստանս. և ա՛նդ փորձեաց զնա,
²⁶ և ասէ. Եթէ լսելո՛վ լուիցես ձայնի Տեառն Աստուծոյ քում, և զհաճոյս առաջի նորա արասցես, և ունկնդի՛ր լիցիս պատուիրանաց նորա. և պահեսցես զամենայն իրաւունս նորա. զամենայն զախտն զոր ածի 'ի վերայ Եգիպտացւոցն, ո՛չ ածից 'ի վերայ քո. զի ե՛ս եմ Տէր որ բժշկեմ զքեզ: ԼԸ
²⁷ Եւ եկին յԱղիմ. և էին անդ երկոտասան աղբևր ջուրց, և եւթանասուն ծառ արմաւենեաց. և ա՛նդ բնակեցան առ ջրովն:

Գլուխ 16

¹ Չուեցին յԵղ’իմայ, և եկին ամենայն ժողովուրդ որդւոցն Իսրայէլի յանապատն 'ի Սին, որ է ընդ Եղ’իմ և ընդ Սինա: ԼԹ Եւ յաւուր հինգետասաներորդի յերկրորդի ամսոյն ելանելոյ նոցա յերկրէն Եգիպտացւոց.
² տրտնջեա՛ց ամենայն ժողովուրդ որդւոցն Իսրայէլի զՄովսիսէ և զԱհարոնէ յանապատի անդ:
³ Եւ ասեն ցնոսա որդիքն Իսրայէլի. Լա՛ւ էր թէ մեռեալ էաք հարուածովքն 'ի Տեառնէ յերկրին Եգիպտացւոց. մինչ նստէաք առ կաթսայ մսոյն, և ուտէաք հաց յագ. քան հանէք զմեզ յանապատս յայս, սպանանե՛լ զամենայն ժողովուրդս 'ի սովոյ:
⁴ Եւ ասէ Տէր ցՄովսէս. Ահա ես տեղացի՛ց ձեզ հաց յերկնից. և ելցէ՛ ժողովուրդ իմ և ժողովեսցեն զօրըստօրէն, զի փորձեցից զնոսա՝ եթէ գնայցե՞ն յօրէնս իմ, թէ ոչ:
⁵ Եւ եղիցի յաւուրն վեցերորդի, պատրաստիցեն զոր ինչ բերիցենն. և եղիցի կրկին քան զայն, զոր օրըստօրէն ժողովիցեն:
⁶ Եւ ասեն Մովսէս և Ահարոն ցամենայն ժողովուրդ որդւոցն Իսրայէլի. Ընդ երեկոյս գիտասջիք՝ եթէ Տէր եհան զձեզ յերկրէն Եգիպտացւոց.
⁷ և առաւօտուց տեսջիք զփառսն Տեառն. 'ի լսել նորա զտրտունջ ձեր զԱստուծոյ. այլ մեք ո՛վ եմք զի տրտնջէք զմէնջ:
⁸ Եւ ասէ Մովսէս. 'Ի տալ ձեզ Տեառն ընդ երեկոյս մի՛ս ուտելոյ. և ընդ առաւօտս հաց յագ. վասն լսելոյ Տեառն զտրտունջ ձեր զոր դուք տրտնջեցէք զմէնջ. քանզի մեք ո՞վ եմք. զի ո՛չ զմէնջ է տրտունջդ ձեր, այլ զԱստուծոյ:
⁹ Եւ ասէ Մովսէս ցԱհարոն. Ասա՛ ցամենայն ժողովուրդ որդւոցդ Իսրայէլի. Մատերո՛ւք առաջի Տեառն, քանզի լուաւ զտրտունջ ձեր:
¹⁰ Մինչդեռ խօսէր Ահարոն ընդ ամենայն ժողովրդեան որդւոցն Իսրայէլի, դարձա՛ն յանապատն. և ահա՛ փառք Տեառն երևեցան ամպով:
¹¹ Եւ խօսեցաւ Տէր ընդ Մովսիսի՝ և ասէ.
¹² Լուա՛յ զտրտունջ որդւոցդ Իսրայէլի. արդ՝ խօսեա՛ց ընդ դոսա՝ և ասասցես. Ընդ երեկոյս մի՛ս կերիջիք, և ընդ առաւօտս հացի՛ւ յագեսջիք. և ծանիջիք թէ ե՛ս եմ Տէր Աստուած ձեր:
¹³ Եւ եղև ընդ երեկոյսն, և ել լորամարգին և ծածկեաց զբանակն:
¹⁴ Եւ եղև ընդ առաւօտն՝ ընդ արկանել ցօղոյն շուրջ զբանակաւն. և ահա 'ի վերայ երեսաց անապատին՝ մա՛նր իբրև զգինձ, սպիտա՛կ իբրև զեղեամն 'ի վերայ երկրին:
¹⁵ Իբրև տեսին զայն որդիքն Իսրայէլի, ասեն այր ցընկեր. Զի՞նչ է այս: Քանզի ո՛չ գիտէին զինչ իցէ: Եւ ասէ ցնոսա Մովսէս. Ա՛յդ է հացն զոր ետ ձեզ Տէր ուտելոյ:
¹⁶ Եւ ա՛յս բան է՝ զոր պատուիրեաց ձեզ Տէր. Ժողովեցէ՛ք 'ի դմանէ իւրաքանչիւր ըստ բաւականի՛ իւրում. չափո՛վ ըստ գլուխ. ըստ թուոյ անձանց ձերոց, ըստ իւրաքանչիւր ըստ վրա՛նս ձեր ժողովեցէ՛ք:
¹⁷ Եւ արարին ա՛յնպէս որդիքն Իսրայէլի. և ժողովեցին, որ շա՛տ և որ սակաւ:
¹⁸ Եւ չափեցին չափովն: Որոյ շատն էր՝ ո՛չ յաւելաւ. և որոյ սակաւն էր՝ ո՛չ պակասեաց: Իւրաքանչիւր ըստ բաւականի՛ իւրում ժողովեցին:
¹⁹ Եւ ասէ ցնոսա Մովսէս. Մի՛ ոք թողուցու այտի յայգ:
²⁰ Եւ ո՛չ լուան Մովսիսի. այլ թողին ոմանք 'ի նմանէ յայգ, և եռաց 'ի նմա որդն, և նեխեցաւ: Եւ դառնացաւ 'ի նոսա Մովսէս:
²¹ Եւ քաղէին այգուն այգուն իւրաքանչիւր ըստ բաւականի իւրում. և իբրև արևն ջեռնոյր՝ հալէ՛ր:
²² Եւ եղև յաւուրն վեցերորդի ժողովեցին զպէտսն կրկին՝ երկո՛ւս չափս առ մի՛ մի: և մտին ամենայն իշխանք ժողովրդեանն և պատմեցին Մովսիսի: Խ
²³ Ասէ ցնոսա Մովսէս. Ա՛յս բան է զոր խօսեցաւ Տէր. Շաբաթ՝ հանգիստ՝ սուրբ Տեառն վաղիւ: որ ինչ եփելոց էք՝ եփեցէ՛ք, և որ ինչ հասուցանելոց էք՝ հասուցէ՛ք. և զամենայն զաւելորդն թողուցո՛ւք յամանս մինչև ցառաւօտ:
²⁴ Եւ թողին 'ի նմանէ յայգ. որպէս հրամայեաց նոցա Մովսէս. և ո՛չ նեխեցաւ, և ո՛չ եղև 'ի նմա որդն:
²⁵ Եւ ասէ Մովսէս. Կերա՛յք զայդ այսօր. քանզի շաբա՛թ Տեառն է այսօր. ո՛չ գտանէք այսօր զայդ 'ի դաշտի:
²⁶ Զվեց օր ժողովեցէ՛ք զայդ. և յաւուրն եւթներորդի շաբա՛թ. ո՛չ լինիցի 'ի նմա:
²⁷ Եւ եղև յաւուրն եւթներորդի՝ ելին ոմանք 'ի ժողովրդենէ անտի քաղել՝ և ո՛չ գտին:
²⁸ Եւ ասէ Տէր ցՄովսէս. Մինչև յե՞րբ ո՛չ կամիք լսել պատուիրանաց իմոց և օրինաց:
²⁹ Տեսէ՛ք զի Տէր ետ ձեզ զօրս զայս շաբա՛թ. վասն այնորիկ ինքն ետ ձեզ յաւուրն վեցերորդի հաց՝ երկուց աւուրց: Նստարո՛ւք իւրաքանչիւր 'ի տունս ձեր. և մի՛ ոք ելանիցէ 'ի տեղւոջէ իւրմէ յաւուրն եւթներորդի:
³⁰ Եւ շաբաթացա՛ւ ժողովուրդն յաւուրն եւթներորդի:
³¹ Եւ անուանեցին որդիքն Իսրայէլի զանուն նորա Ման: և նա՛ էր իբրև զսերմն գնձոյ՝ սպիտա՛կ. և հա՛մ նորա իբրև զխորի՛սխ մեղու: ԽԱ
³² Եւ ասէ Մովսէս. Ա՛յս բա՛ն է՝ զոր հրաման ետ Տէր. Լցէ՛ք լի չափով զմանանայդ յաման մի. և պահեցէ՛ք յազգս ձեր. զի տեսանիցէ՛ք զհացդ զոր կերայք դուք յանապատի աստ. 'ի ժամանակի իբրև եհան զձեզ Տէր յերկրէն Եգիպտացւոց:
³³ Եւ ասէ Մովսէս ցԱհարոն. Ա՛ռ սափոր մի ոսկի, և արկցե՛ս 'ի նա լի չափովդ մանանայ, և դիցես զնա առաջի Աստուծոյ 'ի պահե՛ստ յազգս ձեր.
³⁴ որպէս հրաման ետ Տէր Մովսիսի: Եւ եդ զայն Ահարոն առաջի Վկայութեանն 'ի պահեստ:
³⁵ Եւ որդիքն Իսրայէլի կերան զմանանայն զքառասուն ամ մինչև եկին 'ի շէն երկիրն, զմանանա՛յն ուտէին. մինչև հասին 'ի կողմն Փիւնիկեցւոց:
³⁶ Եւ չափն էր տասներորդ երից գրուաց:

Գլուխ 17

¹ Եւ չուեաց ամենայն ժողովուրդ որդւոցն Իսրայէլի 'ի Սինն անապատէ, ըստ բանակս իւրեանց բանիւ Տեառն: և բանակեցան յՌափիդիմ: Եւ ո՛չ գոյր ջուր ըմպել ժողովրդեանն:
² Եւ բամբասէ՛ր ժողովուրդն զՄովսէս՝ և ասէին. Տո՛ւր մեզ ջուր զի արբցուք: Եւ ասէ ցնոսա Մովսէս. Զի՞ բամբասէք զիս. և զի՞ փորձէք զՏէր:
³ Եւ ծարաւեաց անդ ժողովուրդն 'ի ջրոյ: և տրտնջեաց ժողովուրդն զՄովսիսէ, և ասեն. Ընդէ՞ր հաներ զմեզ յԵգիպտոսէ, կոտորե՛լ զմեզ և զորդիս մեր, և զխաշինս մեր 'ի ծարաւոյ:
⁴ Եւ բողոքեաց Մովսէս առ Տէր և ասէ. Զի՞նչ արարից ժողովրդեանս այսմիկ. սակաւիկ մևս ևս, և քարկո՛ծ առնիցեն զիս:
⁵ Եւ ասէ Տէր ցՄովսէս. Ե՛րթ առաջի ժողովրդեանդ, և ա՛ռ ընդ քեզ 'ի ծերոց ժողովրդեանդ. և զգաւազանն քո որով հարեր զգետն՝ ա՛ռ 'ի ձեռին քում, և երթիցես:
⁶ Եւ ես հասեալ կայցեմ անդ յառաջագոյն քան զքեզ 'ի վերայ վիմին 'ի Քորէբ: և հարցե՛ս զվէմն և ելցէ 'ի նմանէ ջուր, և արբցէ՛ ժողովուրդդ: Եւ արա՛ր այնպէս Մովսէս առաջի որդւոցն Իսրայէլի:
⁷ Եւ անուանեաց զանուն տեղւոյն այնորիկ՝ Փորձութիւն, և Բամբասանս. վասն բամբասանաց որդւոցն Իսրայէլի, և վասն փորձելոյ նոցա զՏէր և ասելոյ, եթէ իցէ՞ 'ի մեզ Տէր՝ և եթէ ոչ: ԽԳ
⁸ Եկն Ամաղէկ, և տայր պատերազմն ընդ Իսրայէլի յՌափիդիմ:
⁹ Եւ ասէ Մովսէս ցՅեսու. Ընտրեա՛ դու քեզ արս զօրաւորս, և ելեալ տացես պատերա՛զմ ընդ Ամաղեկայ առ վաղիւ: և ահա ես եկեալ կայցեմ 'ի վերայ գլխոյ բլրոյն, և գաւազանն Աստուծոյ 'ի ձեռին իմում:
¹⁰ Եւ արար Յեսու որպէս ասաց նմա Մովսէս. և ճակատեցա՛ւ յանդիման Ամաղեկայ: և Մովսէս՝ և Ահարոն՝ և Ովր՝ ելին 'ի գլուխ բլրոյն:
¹¹ Եւ լինէր յորժամ ամբառնայր Մովսէս զձեռս իւր, զօրանա՛յր Իսրայէլ. և յորժամ խոնարհեցուցանէր զձեռս իւր, զօրանայր Ամաղէկ:
¹² Եւ ծանրէին ձեռքն Մովսիսի. և առեալ վէմ դնէին ընդ նովաւ, և նստէր 'ի վերայ նորա. և Ահարոն և Ովր հաստատէին զձեռս նորա, մի աստի և մի անտի. և լինէին ձեռքն Մովսիսի հաստատեալք մինչև ցմտանել արեգականն:
¹³ Եւ եհար Յեսու զԱմաղէկ՝ և զամենայն զօրս նորա կոտորմամբ սրոյ:
¹⁴ Եւ ասէ Տէր ցՄովսէս. Գրեա՛ զայդ առ 'ի յիշատակ 'ի գիրս: և տո՛ւր յականջս Յեսուայ. զի ջնջելով ջնջեցից զյիշատա՛կ Ամաղեկայ յերկրէ 'ի ներքոյ երկնից:
¹⁵ Եւ շինեաց Մովսէս սեղան Տեառն. և անուանեաց զանուն նորա՝ Տէր ապաւէն իմ:
¹⁶ և ասէ. Զի ծածուկ ձեռամբ Տեառն պատերազմի Տէր ընդ Ամաղեկայ ազգա՛ց յազգս:

Գլուխ 18

¹ Եւ լուաւ Յոթոր քուրմ Մադիամու աներ Մովսիսի զամենայն զոր արար Տէր ընդ Մովսիսի, և յԻսրայէլի ժողովրդեան իւրում. զի եհա՛ն Տէր զԻսրայէլ յԵգիպտոսէ:
² Եւ ա՛ռ Յոթոր աներ Մովսիսի զՍեպփովրա զկին Մովսիսի՝ յետ թողլոյն զնա.
³ և զերկուս որդիս նորա. յորոց միումն անուն էր Գերսամ, ասէ՝ Պանդուխտ էի յօտար երկրի.
⁴ և անուն երկրորդին՝ Եղիազար. ասէ՝ Աստուած հօր իմոյ օգնական իմ, և ապրեցոյց զիս 'ի ձեռաց փարաւոնի:
⁵ Եւ եկն Յոթոր՝ աներ Մովսիսի և որդիք նորա և կին նորա առ Մովսէս յանապատն, ուր բնակեալ էր 'ի լերինն Աստուծոյ:
⁶ Ա՛զդ եղև Մովսիսի և ասեն. թէ ահա աներ քո Յոթոր՝ գայ առ քեզ, և կին քո և երկու որդիք քո ընդ նմա:
⁷ Ե՛լ Մովսէս ընդառա՛ջ աներոյն իւրոյ, և երկի՛ր եպագ նմա և համբուրեաց զնա: և ողջո՛յն ետուն միմեանց 'ի խաղաղութիւն. և տարաւ զնոսա 'ի խորանն:
⁸ Եւ պատմեաց Մովսէս աներոյն իւրոյ զամենայն զոր արար Տէր ընդ փարաւոն և ընդ Եգիպտացիսն վասն Իսրայէլի, և զամենայն աշխատութիւնս որ եղև նոցա 'ի ճանապարհի, և զի ապրեցո՛յց զնոսա Տէր:
⁹ Եւ զարմացաւ Յոթոր 'ի վերայ ամենայն բարեացն զոր արար նոցա Տէր. և զի ապրեցոյց զնոսա 'ի ձեռաց Եգիպտացւոցն և 'ի ձեռաց փարաւոնի:
¹⁰ Եւ ասէ Յոթոր. Օրհնեա՛լ է Տէր՝ որ ապրեցոյց զդոսա 'ի ձեռաց Եգիպտացւոցն՝ և 'ի ձեռաց փարաւոնի. օրհնեալ է Տէր զի փրկեաց զժողովուրդդ 'ի ներքուստ ձեռինն Եգիպտացւոց:
¹¹ Արդ՝ գիտեմ թէ մեծ է Տէր քան զամենայն աստուածս: վասն այնորիկ զի բռնանային 'ի վերայ դոցա:
¹² Եւ ա՛ռ Յոթոր աներն Մովսիսի ողջակէզս և զոհս Աստուծոյ: և գնացին Մովսէս և Ահարոն և ամենայն ծերքն Իսրայէլի՝ ուտել հա՛ց ընդ աներոյն Մովսիսի առաջի Տեառն: ԽԵ
¹³ Եւ եղև 'ի վաղիւ անդր, նստա՛ւ Մովսէս դատե՛լ զժողովուրդն. և կա՛յր ամենայն ժողովուրդն շուրջ զՄովսիսիւ, յայգուէ մինչև ցերեկոյ:
¹⁴ Եւ տեսեալ Յոթորայ զամենայն ինչ զոր առներ ժողովրդեանն, և ասէ. Զի՞նչ է բանդ այդ զոր առնես ժողովրդեանդ. ընդէ՞ր դու նստիս միայն, և ամենայն ժողովուրդդ կայ շուրջ զքև յառաւօտէ մինչև ցերեկոյ:
¹⁵ Եւ ասէ Մովսէս ցաներն իւր. Քանզի գա՛յ ժողովուրդդ առիս, խնդրե՛լ իրաւունս յԱստուծոյ:
¹⁶ Յորժամ լինիցի ինչ դոցա հակառակութիւն, գա՛ն առիս. և ես ընտրեմ 'ի մէջ իւրաքանչի՛ւր ուրուք. և իմացուցանե՛մ դոցա զհրամանն Աստուծոյ և զօրէնս նորա:
¹⁷ Եւ ասէ ցնա աներն Մովսիսի. Ո՛չ է ուղիղ բանդ զոր առնես.
¹⁸ անհնարին տանջանօք տանջիս դու՝ և ամենայն ժողովուրդ որ է ընդ քեզ: ծա՛նր է քեզ բանդ այդ. ո՛չ կարես միայն առնել:
¹⁹ Բայց արդ՝ լո՛ւր ինձ, և տաց քեզ խրատ. և եղիցի Աստուած ընդ քեզ: Լե՛ր դու ժողովրդեանդ առ 'ի յԱստուծոյ, և տարցիս դու զբանս դոցա առ Աստուած:
²⁰ Եւ դիցես դոցա վկայութիւն զհրամանացն Աստուծոյ և զօրինաց նորա. և ցուցցես դոցա ճանապա՛րհս յորս գնայցեն, և զգործս զոր գործիցեն:
²¹ Եւ դու տե՛ս քեզ յամենայն ժողովրդենէդ արս զօրաւորս՝ աստուածապա՛շտս. արս արդարակորովս, որ ատիցեն զհպարտութիւն. և կացուսցես զնոսա 'ի վերայ դոցա հազարապե՛տս, և հարիւրապե՛տս, և յիսնապե՛տս, և տասնապե՛տս:
²² Եւ դատեսցին զժողովուրդդ յամենայն ժամ. և զբան ինչ մեծ, առ քե՛զ հասուցանիցեն. և զփոքր ինչ դատաստան՝ ինքեա՛նք դատեսցին. և թեթևացուսցե՛ն 'ի քէն, և եղիցին քեզ օգնականք:
²³ Եթէ զայս բան արասցես, զօրացուսցէ՛ զքեզ Աստուած. և կարասցես տոկա՛լ. և ամենայն ժողովուրդդ երթիցէ 'ի տեղի իւր խաղաղութեամբ:
²⁴ Եւ լուաւ Մովսէս ձայնի աներոյն իւրոյ. և արար զամենայն որ միանգամ ասաց նմա:
²⁵ Եւ ընտրեաց Մովսէս յամենայն Իսրայէլէ ա՛րս զօրաւորս. և արար զնոսա 'ի վերայ նոցա հազարապետս, և հարիւրապետս, և յիսնապետս, և տասնապետս.
²⁶ և դատէին զժողովուրդն յամենայն ժամ: Բայց զբա՛ն ինչ մեծ հասուցանէին առ Մովսէս. և զամենայն բան թեթև՝ ինքե՛անք դատէին:
²⁷ Եւ արձակե՛աց Մովսէս զաներն իւր, և գնա՛ց յերկիր իւր:

Գլուխ 19

¹ Յամսեանն երրորդի ելանելոյ որդւոցն Իսրայէլի յերկրէն Եգիպտացւոց. յաւուրն յայնմիկ եկին յանապատն Սինայ:
² Չուեցին յՌափիդիմայ, և եկին յանապատն Սինայի. և բանակեցան յանապատի անդ. և բանակեցաւ Իսրայէլ անդ հանդէ՛պ լերինն:
³ Եւ Մովսէս ել 'ի լեառնն Աստուծոյ: և կոչեաց զնա Աստուած 'ի լեռնէ անտի և ասէ. Ա՛յսպէս ասասցես տանն Յակոբայ, և պատմեսցես որդւոցն Իսրայէլի:
⁴ Դուք ձեզէ՛ն տեսէք՝ որչափ ինչ արարի ընդ Եգիպտացիսն. և առի զձեզ իբրև 'ի վերայ թևո՛ց արծուոյ՝ և յարեցի՛ զձեզ առ իս:
⁵ Եւ արդ՝ եթէ լսելով լուիցէք ձայնի իմում, և պահիցէք զուխտն իմ, եղիջիք դուք ինձ ժողովուրդ սեպհական յամենայն ազգաց. զի ի՛մ է ամենայն երկիր.
⁶ և դուք եղիջիք ինձ 'ի թագաւորութիւն, և 'ի քահանայութիւն՝ և յազգ սուրբ: զա՛յս բանս խօսեսցիս ընդ որդիսն Իսրայէլի:
⁷ Եկն Մովսէս և կոչեաց զծերս ժողովրդեանն. և ե՛դ առաջի նոցա զամենայն բանս զայսոսիկ զոր պատուիրեաց նմա Աստուած:
⁸ Պատասխանի ետ ժողովուրդն միահամուռ, և ասեն. Զամենայն ինչ զոր ասաց Աստուած՝ արասցո՛ւք և լուիցուք: Եւ տարաւ Մովսէս զպատգամս ժողովրդեանն առ Աստուած:
⁹ Եւ ասէ Տէր ցՄովսէս. Ահաւասիկ ե՛ս եկից առ քեզ սեամբ ամպոյ, զի լուիցէ՛ ժողովուրդն մինչ ես ընդ քե՛զ խօսիցիմ. և հաւատասցեն քեզ յաւիտեան: Եւ պատմեաց Մովսէս զբանս ժողովրդեանն առ Տէր:
¹⁰ Եւ ասէ Տէր ցՄովսէս. Է՛ջ՝ դի՛ր վկայութիւն ժողովրդեանն, և սրբեա՛ զնոսա այսօր և վաղիւ, և լուասցե՛ն զձորձս իւրեանց:
¹¹ Եւ պատրաստեսցի՛ն աւուրն երրորդի. զի յաւուրն երրորդի իջցէ՛ Տէր յանդիման ամենայն ժողովրդեանդ 'ի լեառնդ Սինա:
¹² Եւ զատուսցես զժողովուրդդ շուրջ՝ և ասասցես. Զգո՛յշ կացէք անձանց յելանելոյ 'ի լեառնն և մերձենալոյ առ նա. զի ամենայն որ մերձեսցի 'ի լեառնն՝ մահո՛ւ սատակեսցի:
¹³ Մի՛ մերձեսցի 'ի նա ձեռն. քանզի քարա՛մբք քարկոծեսցի և նետիւք խոցոտեսցի: եթէ անասուն իցէ և եթէ մարդ՝ մի՛ կեցցէ: այլ յորժամ ձա՛յնքն և փողն և ամպն վերասցի 'ի լեռնէ անտի՝ ելցեն նոքա 'ի լեառնն:
¹⁴ Եւ էջ Մովսէս 'ի լեռնէ անտի առ ժողովուրդն, և սրբեաց զնոսա. և լուացին զձորձս իւրեանց:
¹⁵ Եւ ասէ ցժողովուրդն. Պատրա՛ստ լերուք. զերիս աւուրս 'ի կանայս մի՛ մերձենայք:
¹⁶ Եւ եղև յաւուրն երրորդի ընդ առաւօտսն. ձա՛յնք և փայլատակունք և ա՛մպ միգախառն 'ի վերայ լերինն Սինայի լինէին. և ձայն փողոյն հնչէ՛ր մեծաձայն: Եւ զարհուրեցաւ ամենայն ժողովուրդն որ էր 'ի բանակի անդ:
¹⁷ Եւ եհան Մովսէս զժողովուրդն ընդ առաջ Աստուծոյ 'ի բանակէ անտի. և կացոյց շուրջ զստորոտով լերինն Սինայի:
¹⁸ Եւ լեառն Սինա ծխէ՛ր առ հասարակ. քանզի իջեա՛լ կայր Աստուած 'ի վերայ նորա հրով. և ելանէ՛ր ծուխ նորա իբրև զծուխ հնոցի: և զարհուրեցա՛ւ ամենայն ժողովուրդն յոյժ.
¹⁹ քանզի հասանէին ձայնք փողոցն 'ի բաց, յառաջեալք և սաստկացեալք յոյժ: Մովսէս խօսէր՝ և Աստուած տա՛յր նմա ձայն:
²⁰ Եւ է՛ջ Տէր 'ի լեառնն Սինա, 'ի գլո՛ւխ լերինն: և կոչեա՛ց Տէր զՄովսէս 'ի գլո՛ւխ լերինն. և ե՛լ անդր Մովսէս:
²¹ Եւ խօսեցաւ Աստուած ընդ Մովսիսի և ասէ. Է՛ջ, դի՛ր վկայութիւն ժողովրդեանդ գուցէ՛ մերձենայցեն հայել առ Աստուած, և անկանիցին բազումք 'ի նոցանէ:
²² Եւ քահանայքն որ մերձենան առ Աստուած՝ սրբեսցի՛ն. գուցէ՛ սատակիցէ 'ի նոցանէ Տէր:
²³ Եւ ասէ Մովսէս ցԱստուած. Ո՛չ կարէ ժողովուրդն ելանել 'ի լեառնն Սինա. զի դու ինքնին ուխտեցեր մեզ՝ և ասացեր. թէ զատուսցե՛ս զլեառնս և սրբեսցես զդա:
²⁴ Եւ ասէ ցնա Տէր. Ե՛րթ է՛ջ, և ե՛լ այսրէն դո՛ւ և Ահարոն ընդ քեզ. բայց քահանայքն և ժողովուրդն մի՛ ժտեսցին ելանել առ Աստուած, գուցէ՛ սատակիցէ 'ի նոցանէ Տէր:
²⁵ Է՛ջ Մովսէս առ ժողովուրդն՝ և ասէ ցնոսա:

Գլուխ 20

¹ Խօսեցաւ Տէր զամենայն զպատգամս զայսոսիկ՝ և ասէ.
² ա. Ե՛ս եմ Տէր Աստուած քո որ հանի զքեզ յերկրէն Եգիպտացւոց 'ի տանէ ծառայութեան:
³ բ. Մի՛ եղիցին քեզ այլ աստուածք բա՛ց յինէն:
⁴ Մի՛ արասցես դու քեզ կուռս ըստ ամենայն նմանութեան. որ ինչ յերկինս 'ի վեր, և որ ինչ յերկիր 'ի խոնարհ, և որ ինչ 'ի ջուրս 'ի ներքոյ երկրի:
⁵ Մի՛ երկիրպագանիցես նոցա, և մի՛ պաշտեսցես զնոսա. զի ե՛ս եմ Տէր Աստուած քո՝ Աստուած նախանձոտ, որ հատուցանեմ զմեղս հարանց՝ որդւոց, յերիս և 'ի չորս ազգս ատելեաց իմոց:
⁶ Եւ առնեմ զողորմութիւն 'ի հազար ազգս սիրելեաց իմոց, և ոյք պահեն զհրամանս իմ:
⁷ գ․ Մի՛ առնուցուս զանուն Տեառն Աստուծոյ քոյ 'ի վերայ սնոտեաց. զի ո՛չ սրբեսցէ Տէր զայն, որ առնուցու զանուն նորա 'ի վերայ սնոտեաց:
⁸ դ. Յիշեսջի՛ր զօրն շաբաթուց սրբե՛լ զնա:
⁹ Զվեց օր գործեսցես, և արասցես զամենայն գործս քո:
¹⁰ ե. Յաւուրն եւթներորդի շաբա՛թ Տեառն Աստուծոյ քում, մի՛ գործեսցես 'ի նմա զամենայն գործ քո դո՛ւ և ուստր քո և դուստր քո, ծա՛ռայ քո, և աղախին քո. ե՛զն քո և էշ քո, և ամենայն անասուն քո. և ե՛կն քո և պանդուխտն քո որ 'ի քեզ:
¹¹ Զի զվե՛ց օր արար Տէր Աստուած զերկինս և զերկիր, և զծով և զամենայն որ 'ի նոսա, և հանգեաւ յաւուրն եւթներորդի. վասն այնորիկ օրհնեաց Տէր զօրն եւթներորդ, և սրբեաց զնա:
¹² զ. Պատուեա՛ զհայր քո և զմայր քո. զի քեզ բարի՛ լինիցի, և զի երկայնակեա՛ց լինիցիս 'ի վերայ երկրին բարութեան՝ զոր Տէր Աստուած տացէ քեզ:
¹³ է. Մի՛ սպանաներ:
¹⁴ ը. Մի՛ շնար:
¹⁵ թ. Մի՛ գողանար:
¹⁶ ժ. Մի՛ սուտ վկայութիւն վկայեր զընկերէ քումմէ:
¹⁷ Մի՛ ցանկանար տան ընկերի քոյ, և մի՛ անդոյ նորա: Մի՛ ցանկանար կնոջ ընկերի քոյ, և մի՛ ծառայի նորա, և մի՛ աղախնոյ նորա, և մի՛ եզին նորա, և մի՛ իշոյ նորա, և մի՛ ամենայն անասնոյ նորա. և մի՛ ամենայնի զինչ ընկերի քոյ իցէ:
¹⁸ Եւ ամենայն ժողովուրդն տեսանէր զձայնն և զճառագայթսն, և զբարբառ փողոյն՝ և զլեառնն ծխեալ: Զահի՛ հարաւ ամենայն ժողովուրդն, և խորշեցա՛ւ. եկաց 'ի հեռաստանէ:
¹⁹ Եւ ասեն ցՄովսէս. Դո՛ւ խօսեաց ընդ մեզ՝ և լուիցո՛ւք. և մի՛ խօսեսցի ընդ մեզ Աստուած՝ գուցէ՛ մեռանիցիմք:
²⁰ Եւ ասէ ցնոսա Մովսէս. Քաջալերեցարո՛ւք. զի վասն փորձելոյ զձեզ եկն առ ձեզ Աստուած. որպէս զի լինիցի երկի՛ւղ նորա 'ի ձեզ, զի մի՛ մեղանչիցէք:
²¹ Եւ կայր ժողովուրդն 'ի հեռաստանէ: Եւ Մովսէս եմուտ 'ի մէգն ուր է՛ր Աստուած:
²² Եւ ասէ Տէր ցՄովսէս. Ա՛յսպէս ասասցե՛ս դու տանդ Յակոբայ, և պատմեսցե՛ս որդւոցդ Իսրայէլի: Դուք ձեզէ՛ն տեսէք, զի յերկնից խօսեցայ ընդ ձեզ:
²³ Մի՛ առնիցէք ձեզ աստուածս ոսկեղէնս և աստուածս արծաթեղէնս:
²⁴ Սեղան՝ հողեղէն արասջի՛ք ինձ, և մատուսջի՛ք 'ի նմա զողջակէզս ձեր, և զփրկութիւնս ձեր, զոչխարս ձեր, և զարջառս ձեր. յամենայն տեղիս ուր անուանեցից զանուն իմ անդ. և եկի՛ց առ քեզ և օրհնեցի՛ց զքեզ:
²⁵ Ապա թէ սեղան 'ի քարանց առնիցես ինձ, մի՛ շինեսցես ինձ զնոսա կոփածոյս. քանզի զձեռին գործին քո մերձեցուցեր 'ի նա, և պղծեա՛լ է:
²⁶ Մի՛ ելանիցես ընդ աշտիճանս 'ի սեղան իմ, զի մի՛ մերկասցին առականք քո 'ի վերայ նորա:

Գլուխ 21

¹ Եւ ա՛յս իրաւունք են զոր դիցես առաջի նոցա:
² Եթէ գնեսցես ծառայ Եբրայեցի, զվեց ա՛մ ծառայեսցէ քեզ. և յամին եւթներորդի՝ գնասցէ ազա՛տ ձրի՛:
³ Թէ ինքն միա՛յն մտեալ իցէ՝ միա՛յն գնասցէ. և եթէ կնաւ հանդերձ մտեա՛լ իցէ՝ ելցէ և կինն ընդ նմա:
⁴ Ապա թէ տէրն իւր տացէ նմա կին, և ծնանիցի նմա ուստերք և դստերք, կինն և որդիք՝ տեառն նորա եղիցին. և նա միա՛յն ելցէ:
⁵ Ապա թէ պատասխանի տուեալ ասիցէ ծառայն. Սիրեցի՛ զտէր իմ, և զկի՛ն իմ, և զորդիս իմ. և ո՛չ գնամ յազատութիւն.
⁶ տարցի՛ զնա տէրն իւր յատեան Աստուծոյ. և ապա մատուսցէ զնա առ սեամս դրանն, և ծակեսցէ՛ զունկն նորա հերեամբ, և ծառայեսցէ՛ նմա յաւիտեան:
⁷ Իսկ եթէ վաճառեսցէ ոք զդուստր իւր յաղախնութիւն, մի՛ գնասցէ որպէս ելանիցեն աղախնայք:
⁸ Եթէ ո՛չ լինիցի հաճոյ յաչս տեառն իւրոյ՝ որում հաստատեցաւն, փրկեսցէ՛ զնա. բայց յա՛զգ օտար՝ չէ՛ իշխան վաճառել, զի անարգեաց զնա:
⁹ Ապա թէ որդւոյ իւրում հաստատեսցէ զնա, ըստ օրինաց դստերա՛ց արասցէ նմա:
¹⁰ Ապա թէ առ նովաւ ա՛յլ առնուցու. զօրէնն և զհանդերձ նորա և զմերձաւորութիւն մի՛ հատցէ 'ի նմանէ:
¹¹ Ապա թէ զերիս զայսոսիկ ո՛չ առնիցէ նմա, ձրի՛ իսկ ելցէ առանց արծաթոյ:
¹² Եւ եթէ հարցէ՛ ոք զոք՝ և մեռանիցի, մահո՛ւ մեռցի և նա:
¹³ Իսկ որ ո՛չ կամաւ՝ այլ Աստուած մատնեաց 'ի ձեռս նորա, տացի՛ նմա տեղի ուր փախիցէ սպանօղն:
¹⁴ Իսկ եթէ մտաբերիցէ ոք յընկեր իւր սպանանել զնա նենգութեամբ՝ և փախիցէ, և 'ի սեղանո՛յ իմմէ առնուցուս զնա և սպանանիցես:
¹⁵ Որ հարկանէ զհայր իւր, կամ զմայր իւր, մահո՛ւ մեռցի:
¹⁶ Որ ոք գողասցի յորդւոցն Իսրայէլի՝ և վաճառեսցէ զնա, և գտցի առ նմա, մահո՛ւ մեռցի:
¹⁷ Որ բամբասեսցէ զհա՛յր իւր՝ կամ զմայր իւր, մահո՛ւ մեռցի:
¹⁸ Եթէ կագիցեն արք երկու, և հարկանիցէ ոք 'ի նոցանէ զընկեր իւր քարի՛ւ կամ բռնցի. և ո՛չ մեռանիցի, այլ դնիցի 'ի մահիճս:
¹⁹ Եթէ յառնիցէ այրն և շրջիցի արտաքոյ 'ի ցպոյ, անպա՛րտ լիցի որ եհարն. բայց զխափանածո՛յ նորա՝ և զբժշկութեանն տուժեսցի՛:
²⁰ Եթէ ոք հարցէ զծառայ իւր՝ կամ զաղախին իւր գաւազանաւ, և մեռցի՛ 'ի ձեռաց նորա, դատաստանա՛ւ վրէժխնդրութիւն լիցի:
²¹ Բայց թէ մի օր՝ կամ երկուս կեցցէ, մի՛ խնդրեսցի վրէժն. զի գինք արծաթոյ իւրոյ են:
²² Իսկ եթէ կռուիցին արք երկու, և հարկանիցեն զկին յղի և ելանիցէ սաղմնն աննկար, կէ՛ս վնասու տուժեսցի. որչափ ինչ արկանիցէ նմա ա՛յր կնոջն, և տացէ աղաչելով:
²³ Ապա թէ կերպարանեալ իցէ. տացէ ա՛նձն ընդ անձին.
²⁴ ա՛կն ընդ ական, ատա՛մն ընդ ատաման, ձե՛ռն ընդ ձեռին, ո՛տն ընդ ոտին,
²⁵ խարա՛ն ընդ խարանի, վէ՛ր ընդ վիրի. հարուա՛ծ ընդ հարուածոյ:
²⁶ Իսկ եթէ հարցէ՛ ոք զակն ծառայի իւրոյ, կամ զակն աղախնոյ իւրոյ, և կուրացուսցէ, արձակեսցէ զնոսա ազա՛տս փոխանակ ական նոցա:
²⁷ Եւ եթէ զատամն ծառայի իւրոյ, կամ զատամն աղախնոյ թափեսցէ, արձակեսցէ ազա՛տ փոխանակ ատաման նոցա:
²⁸ Իսկ եթէ հարցէ ցուլ զա՛յր կամ զկին, և մեռանիցին, ցուլն՝ քարկո՛ծ լիցի, և միս նորա մի՛ կերիցի. և տէր ցլուն անպա՛րտ լիցի:
²⁹ Ապա թէ ցուլն հարկանօղ իցէ յերեկն և յեռանտն, և բողոքեա՛լ իցէ տեառն նորա, և նորա չիցէ՛ 'ի միջոյ բարձեալ. և սպանանիցէ զայր կամ զկին, ցուլն քարկոծ լիցի, և տէր ցլուն առ նմին մեռցի:
³⁰ Իսկ եթէ փրկանք անկանիցին 'ի վերայ նորա, տացէ՛ փրկանս ընդ անձին իւրում, ըստ ամենայնի՛ որչափ ինչ արկանիցեն նմա գին:
³¹ Եւ եթէ զուստր կամ զդուստր հարկանիցէ, ըստ նմի՛ն օրինակի արասցեն նմա:
³² Իսկ եթէ զծառա՛յ կամ զաղախին հարկանիցէ ցուլն, երեսուն կրկին սատեր արծաթոյ տացէ տեառն նոցա. և ցուլն քարկո՛ծ լիցի:
³³ Իսկ եթէ բացցէ ոք հո՛ր, կամ փորեսցէ ջրհոր, և ո՛չ խփանիցէ զնա, և անկանիցի անդ արջառ՝ կամ էշ.
³⁴ տէր հորոյն տուժեսցի արծաթ, և տացէ տեառն նորա. և շաղիղն նորա՛ լիցի: Կ
³⁵ Իսկ եթէ հարցէ ցուլ ուրուք զցուլ ընկերի իւրոյ՝ և մեռցի. վաճառեսցե՛ն զցուլն կենդանի, և բաժանեսցե՛ն զգինս նորա, և զցուլն սպանեալ՝ բաժանեսցե՛ն:
³⁶ Ապա թէ յերէկն և յեռանտն գիտէին զցուլն, և բողոքեա՛լ իցէ տեառն նորա, և նորա չիցէ՛ 'ի միջոյ բարձեալ զնա, տուժեսցի՛ ցուլ ընդ ցլուն, և սպանեալն նորա լիցի:

Գլուխ 22

¹ Իսկ եթէ գողասցի ոք արջառ կամ ոչխար, և սպանցէ՛ կամ վաճառեսցէ, հի՛նգ արջառ ընդ արջառոյն տուժեսցի. և չորս ոչխար ընդ ոչխարին:
² Իսկ եթէ յակա՛ն գտանիցի գող. և խոցեալ մեռցի, չէ՛ այն նմա 'ի սպանութիւն:
³ Ապա թէ արևն 'ի վերայ նորա ծագիցէ, մահապա՛րտ է, փոխարէ՛ն մեռցի: ապա թէ ո՛չինչ գտանիցի նորա, վաճառեսցի՛ փոխանակ գողութեանն իւրոյ:
⁴ Իսկ եթէ ըմբռնեսցի, և գտցի՛ 'ի ձեռին նորա գողօնն՝ յարջառոյ և յիշոյ մինչև ցոչխար՝ կրկի՛ն տուժեսցի:
⁵ Եթէ արածիցէ ոք զանդ՝ կամ զայգի, և թոյլ տայցէ խաշին իւրում արածե՛լ զանդ այլոց, յիւրմէ՛ անդոյ անտի տուժեսցի ըստ արդեանն: Ապա թէ զամենայն իսկ զանդն արածիցէ, զընտի՛ր կողմն անդոյ իւրոյ, և զընտի՛ր այգւոյ իւրոյ տուժեսցի:
⁶ Իսկ եթէ ելանիցէ հուր, և գտանիցէ փո՛ւշ, և ընդ նմին այրիցէ զկալ՝ կամ զօրան կամ զանդ, տուժելով տուժեսցի որոյ զհրդեհն հանեալ իցէ:
⁷ Իսկ եթէ ոք տացէ ընկերի իւրում արծաթ, կամ ա՛յլ ինչ կարասի զիւր յաւանդ, և գողանայցի՛ 'ի տանէ առնն. եթէ գտցի՛ որ գողացաւն, կրկի՛ն տուժեսցի:
⁸ Ապա եթէ ո՛չ գտցի որ գողացաւն, մատիցէ տէր տանն առաջի Աստուծոյ, և երդուիցի, եթէ իւր չէ՛ նենգեալ ամենևին զաւանդ ընկերի իւրոյ.
⁹ ըստ ամենայն վնասակա՛ր բանի, յարջառոյ՝ և յիշոյ՝ և յոչխարէ, և 'ի հանդերձէ, և յամենայն կորստենէ որում վնասակար առնիցեն: Որ զինչ իցէ՝ առաջի Աստուծոյ եկեսցէ դատաստա՛ն երկոցուն. և որ ոք 'ի նոցանէ ըմբռնեսցի 'ի ձեռն Աստուծոյ, կրկի՛ն տուժեսցի ընկերի իւրում:
¹⁰ Եւ եթէ տացէ ոք ընկերի իւրում էշ, կամ եզն, կամ ոչխար, կամ ա՛յլ ինչ անասուն 'ի պահեստ, և բեկցի՝ կամ մեռցի՝ կամ գերի վարեսցի, և ո՛չ ոք գիտասցէ.
¹¹ երդո՛ւմն Աստուծոյ լիցի 'ի մէջ երկոցուն, եթէ նենգանօք ինչ չիցէ՛ գնացեալ ամենևին ընդ աւա՛նդ ընկերին իւրոյ. ապա յա՛նձն առցէ տէր նորա. և մի՛ տուժեսցի:
¹² Իսկ եթէ գողութեամբ գողանայցի 'ի նմանէ, տուժեսցի՛ տեառն նորա:
¹³ Ապա թէ գազանաբե՛կ լինիցի, ածցէ վկայ 'ի գէ՛շ անդր. և մի՛ տուժեսցի:
¹⁴ Իսկ եթէ ոք խնդրեսցէ անօթ յընկերէ՛ իւրմէ, և բեկցի՛ կամ մեռցի, կամ գերի՛ գնասցէ, և տէր նորա չիցէ՛ ընդ նմա, տուժելո՛վ տուժեսցի:
¹⁵ Ապա թէ տէր նորա ընդ նմա իցէ՝ ո՛չ տուժեսցի: ապա թէ 'ի վարձո՛ւ առեալ իցէ, ընդ վարձո՛ւց իւրոց եղիցի նմա:
¹⁶ Իսկ եթէ ոք խաբեսցէ՛ զկոյս զո՛չ խօսեալ՝ և ննջեսցէ ընդ նմա, վարձանօ՛ք վարձեսցի զնա իւր կնութեան:
¹⁷ Եւ եթէ ո՛չ առնուցու յանձն հայր նորա տալ զնա նմա կնութեան, տուժեսցի արծա՛թ հօր նորա որպէս իցեն վարձանք կուսից:
¹⁸ Զկախարդս մի՛ ապրեցուցանիցէք:
¹⁹ Զամենայն որ խառնակիցի ընդ անասուն, մահո՛ւ սպանանիջիք:
²⁰ Որ դի՛ց զոհէ՝ սատակեսցի՛, բայց միայն Տեառն:
²¹ Զպանդուխտն՝ մի՛ չարչարիցէք՝ և մի՛ նեղէք զնա, զի և դուք պանդուխտք էիք յերկրին Եգիպտացւոց:
²² Զամենայն զայրի՝ և զորբ՝ մի՛ չարչարիցէք:
²³ Ապա թէ չարչարելով չարչարիցէ՛ք զնոսա, և բողո՛ք բարձեալ աղաղակիցեն առիս, լսելո՛վ լուա՛յց աղաղակի նոցա:
²⁴ Եւ բարկացա՛յց սրտմտութեամբ և կոտորեցից զձե՛զ սրով. և եղիցին կանայք ձեր այրի՛ք, և մանկունք ձեր ո՛րբք:
²⁵ Եւ եթէ արծաթ փո՛խ տայցես եղբօր քում, որ աղքա՛տ իցէ՝ առ քեզ, մի՛ ճեպեսցես զնա. և մի՛ արկանիցես նմա տոկոսիս:
²⁶ Եւ եթէ գրաւեսցես զբաճկոն ընկերի քոյ, նախ քան զմտանել արևու դարձուսցե՛ս անդրէն:
²⁷ Զի ա՛յն է վերարկու նորա, և այն է հանդերձ առականաց նորա որով ննջիցէ: և եթէ բողոքիցէ առիս՝ լուա՛յց նմա. քանզի ողորմա՛ծ եմ:
²⁸ Զաստուածս քո մի՛ բամբասիցես: և զիշխան ժողովրդեան քոյ մի՛ հայհոյեսցես:
²⁹ Զպտուղ կալոյ քոյ և զհնձանի մի՛ հատանիցես: Զանդրանիկս որդւոց քոց ի՛նձ տացես:
³⁰ Նոյնպէս արասցես զարջառ քո, և զոչխար քո, և զէշ քո: զեւթն օր՝ եղիցի ընդ մա՛րբ իւրով, և յաւուրն ութերորդի՝ տացե՛ս զնա ինձ:
³¹ Եւ մարդք սո՛ւրբք լինիջիք ինձ, զի ես եմ Տէր Աստուած ձեր: Զմիս գազանաբեկին 'ի բացի՝ մի՛ ուտիցէք, այլ շա՛ն ընկեսջիք:

Գլուխ 23

¹ Եւ համբաւ սուտ՝ մի՛ ընդունիցիս: Մի՛ հաւանիցիս ընդ անիրաւի՝ լինել վկայ անիրաւ:
² Մի՛ յօժարեսցիս ընդ բազումս 'ի չարիս: Մի՛ յաւելուցուս 'ի բազմութիւն միտել ընդ բազումս առ 'ի խոտորելո՛յ զիրաւունս:
³ Եւ մի՛ ողորմեսցիս տնանկին 'ի դատաստանի:
⁴ Եւ եթէ պատահեսցիս եզին թշնամւոյ քոյ, կամ իշոյ նորա մոլորելոյ, դարձուսցես և հասուսցե՛ս զնա առ նա:
⁵ Եւ եթէ տեսանիցես զգրաստ ընկերի քոյ՝ անկեալ ընդ բեռամբ, մի՛ զանց առնիցես զնովաւ, այլ յարուսցե՛ս զնա ընդ նմա:
⁶ Մի՛ խոտորիցես զիրաւունս տնանկին 'ի դատաստանի իւրում:
⁷ Յամենայն՝ 'ի զո՛ւր բանէ՝ 'ի բաց լինիցիս. և զարդարն և զանպարտն մի՛ սպանանիցես. և զամպարիշտն մի՛ ապրեցուցանիցես վասն կաշառաց.
⁸ և կաշառ՝ մի՛ առնուցուս. զի կաշառ կուրացուցանէ՛ զաչս համարձակահայեաց, և ապականէ՛ զբանս արդարս:
⁹ Եւ զպանդուխտն մի՛ նեղես. քանզի ճանաչէ՛ք դուք զանձինս պանդխտաց. զի և դուք պանդուխտք էիք յերկրին Եգիպտացւոց:
¹⁰ Զվե՛ց ամ սերմանեսցես զերկիր քո, և ժողովեսցե՛ս զարմտիս նորա:
¹¹ Եւ յամին եւթներորդի թողութիւն արասցես, և հանգուսցե՛ս զնա: և կերիցեն տնա՛նկք ազգի քոյ. և զմնացեալն 'ի նոցանէ կերիցեն գազա՛նք վայրի. ա՛յսպէս արասցես զայգի քո և զձիթենի քո:
¹² Զվե՛ց օր գործեսցես զգործ քո. և յաւուրն եւթներորդի հանգիցէ՛ եզն քո և է՛շ քո, և հանգիցէ՛ որդի աղախնոյ քոյ և պանդխտին:
¹³ Զամենայն զոր ասացի ձեզ՝ պահեսջի՛ք. և զանուն աստուածոց օտարաց մի՛ յիշիցէք. և մի՛ լուիցի 'ի բերանոյ ձերմէ:
¹⁴ Երի՛ս ժամանակս 'ի տարւոջ արասջի՛ք ինձ տօնս:
¹⁵ Զտօն բաղարջակերա՛ցն պահեսջիք. զեւթն օր բաղա՛րջ կերիջիք, որպէս պատուիրեցի ձեզ ըստ ժամանակի ամսոյն կանխոց. զի 'ի նմա՛ ելէք դուք յերկրէն Եգիպտացւոց: ո՛չ երևեսցիս առաջի իմ դատարկաձեռն:
¹⁶ Եւ զտօն ամարայնոյ առաջնոյ արմտեա՛ց քոց արասցես զգործոց քոց, որ ինչ վարեա՛լ իցէ յանդի քում: Եւ զտօն կատարածի ելից տարւոյն, 'ի ժողովել գործոց քոց յանդէ:
¹⁷ Երի՛ս ժամանակս 'ի տարւոջ յանդիմա՛ն լիցի ամենայն արու քո առաջի Տեառն Աստուծոյ:
¹⁸ Եւ մի՛ զոհեսցես 'ի վերայ խմորոյ զարիւն զոհից քոց: և մի՛ ագցի ճարպ տօնի իմոյ մինչև ցառաւօտ:
¹⁹ Զպտուղս առաջին արմտեաց քոց բերցես 'ի տո՛ւն Տեառն Աստուծոյ քո: Եւ մի՛ եփեսցես զգառն 'ի կաթն մօր իւրոյ:
²⁰ Եւ ահա ես առաքեմ զհրեշտակ իմ առաջի երեսաց քոց, զի պահեսցէ զքեզ 'ի ճանապարհի. որպէս զի տարցի՛ զքեզ յերկիրն, զոր պատրաստեցի քեզ:
²¹ Զգո՛յշ լեր անձին քում և լուիցես, և մի՛ անհաւան լինիցիս նմա. զի ո՛չ խորշեսցի 'ի քէն. քանզի անուն իմ 'ի վերայ նորա է:
²² Եւ եթէ լսելով լուիցես ձայնի իմում, և արասցես զամենայն զոր ինչ ասացի քեզ, եղէց թշնամի՛ թշնամեաց քոց. և հակառա՛կ կացից հակառակորդաց քոց:
²³ Զի երթիցէ հրեշտակ իմ առաջնորդե՛լ քեզ. և տարցի՛ զքեզ առ Ամովրհացին, և Քետացի, և Փերեզացի, և Քանանացի, և Գերգեսացի, և Խևացի, և Յեբուսացի. և սատակեցի՛ց զնոսա:
²⁴ Մի՛ պագանիցես երկիր աստուածոց նոցա, և մի՛ պաշտեսցես զնոսա. և մի՛ առնիցես ըստ գործոց նոցա, այլ քակելով քակեսցե՛ս զնոսա, և մանրելով մանրեսցե՛ս զարձանս նոցա:
²⁵ Եւ պաշտեսցե՛ս զՏէր Աստուած քո. և օրհնեցի՛ց զհաց քո և զջուր քո, և դարձուցից 'ի ձէնջ զախտ:
²⁶ Եւ մի՛ եղիցի անսերմ և ամուլ յերկրի քում. զթիւ աւուրց քոց լցուցի՛ց:
²⁷ Եւ զա՛հ իմ առաքեցից առաջնորդե՛լ քեզ. և զարհուրեցուցի՛ց զամենայն ազգս յորս մտանիցես 'ի նոսա: Եւ տաց զամենայն հակառակորդս քո փախստակա՛նս:
²⁸ Եւ առաքեցից առաջի քո զպիծակ. և մերժեսցէ՛ զԱմովրհացին, և զԽևացին, և զՔանանացին, և զՔետացին յերեսաց քոց:
²⁹ Եւ ո՛չ մերժեցից զնոսա յերեսաց քոց 'ի միում ամի. զի մի՛ երկիրն անապատ լինիցի, և բազմանայցեն 'ի վերայ քո գազանք երկրին:
³⁰ Առ սակաւ սակա՛ւ մերժեցից զնոսա 'ի քէն. մինչև աճեսցե՛ս և ժառանգեսցես զերկիր:
³¹ Եւ եդից զսահմանս քո 'ի Կարմիր ծովէ մինչև 'ի ծովն Փղշտացւոց. և յանապատէն մինչև ցգե՛տն մեծ Եփրատ: և մատնեցից 'ի ձեռս ձեր զբնակիչս երկրին. և մերժեցից զնոսա 'ի քէն:
³² Եւ դու՝ մի՛ դնիցես ընդ նոսա, և ընդ դի՛ս նոցա ուխտ:
³³ Եւ մի՛ բնակեսցեն յերկրի քում, զի մի՛ յանցուցանիցեն զքեզ առիս: զի եթէ ծառայեսցես դի՛ց նոցա, նոքա՛ լիցին քեզ 'ի գայթագղութիւն:

Գլուխ 24

¹ Եւ ասէ ցՄովսէս. Ե՛լ առ Տէր, դո՛ւ և Ահարոն, և Նաբադ և Աբիուդ՝ և եւթանասուն այր 'ի ծերոցն Իսրայէլի: և երկի՛ր պագցեն Տեառն 'ի հեռաստանէ:
² Եւ մերձեսցի Մովսէ՛ս միայն առ Աստուած. և նոքա մի՛ մերձեսցին: բայց ժողովուրդն մի՛ ելցէ ընդ նոսա:
³ Եւ եմուտ Մովսէս և պատմեաց ժողովրդեանն զամենայն պատգամս Աստուծոյ, և զամենայն իրաւունս: Պատասխանի ետ ամենայն ժողովուրդն 'ի մի ձայն՝ և ասեն. Զամենայն պատգամս զոր խօսեցաւ Տէր՝ արասցո՛ւք և լուիցուք:
⁴ Եւ գրեաց Մովսէս զամենայն զպատգամսն Տեառն: Եւ կանխեալ Մովսիսի ընդ առաւօտն, շինեաց սեղա՛ն 'ի ստորոտ լերինն. և երկոտասան վէ՛մ կանգնեաց ըստ երկոտասան ազգացն Իսրայէլի:
⁵ Եւ առաքեաց զերիտասարդս որդւոցն Իսրայէլի, և հանին ողջակէզս, և զոհեցին զոհս փրկութեան Աստուծոյ ո՛րթս:
⁶ Եւ առեալ Մովսիսի զկէ՛ս արեանն արկ 'ի խառնելիսն. և զկէ՛ս արեանն եհեղ առաջի սեղանոյն:
⁷ Եւ առեալ զգիր ուխտին ընթերցաւ յականջս ժողովրդեանն: Եւ ասեն. Զամենայն զոր խօսեցաւ Տէր՝ արասցո՛ւք և լուիցուք:
⁸ Եւ առեալ Մովսիսի զարիւնն, ցանեաց զժողովրդեամբն՝ և ասէ. Ահա ա՛յս արիւն է ուխտին զոր ուխտեաց Տէր ընդ ձեզ վասն ամենայն բանիցս այսոցիկ:
⁹ Եւ ելին Մովսէս և Ահարոն, և Նաբադ և Աբիուդ՝ և եւթանասունք 'ի ծերոցն Իսրայէլի.
¹⁰ և տեսին զտեղին ուր կայր Աստուած Իսրայէլի. և ընդ ոտիւք նորա իբրև զգործա՛ծ աղիւսոյ շափիղայ. և իբրև զտեսի՛լ հաստատութեան երկնից սրբութեամբ:
¹¹ Եւ յընտրելոցն Իսրայէլի ո՛չ ծախեցաւ և ո՛չ մի. և երևեցան 'ի տեղւոջն Աստուծոյ. և կերա՛ն և արբին:
¹² Եւ ասէ Տէր ցՄովսէս. Ե՛լ առիս 'ի լեառնն, և ա՛նդ լինիջիր: և տա՛ց քեզ տախտակս քարեղէնս և օրէնս և պատուիրանս զորս գրեցի, լինել նոցա օրէնսդիր:
¹³ Յարեաւ Մովսէս և Յեսու պաշտօնեայ նորա, և ելին 'ի լեառնն Աստուծոյ:
¹⁴ Եւ ասէ ցծերսն. Դադարեցէ՛ք այդր մինչև դարձցուք առ ձեզ: և ահա Ահարոն և Ովր ընդ ձե՛զ են: եթէ ուրուք դատաստան ինչ լինիցի, երթիցե՛ն առ նոսա:
¹⁵ Եւ ել Մովսէս 'ի լեառնն. և ծածկեաց ամպն զլեառնն:
¹⁶ Եւ իջին փառքն Աստուծոյ 'ի լեառնն Սինա. և ծածկեա՛ց զնա ամպն զվեց օր: Եւ կոչեաց Տէր զՄովսէս յաւուրն եւթներորդի 'ի միջոյ ամպոյն:
¹⁷ Եւ տեսիլ փառացն Տեառն իբրև զհուր բորբոքեալ 'ի վերայ գլխոյ լերինն՝ յանդիման որդւոցն Իսրայէլի:
¹⁸ Եւ եմո՛ւտ Մովսէս 'ի մէջ ամպոյն, և ել 'ի լեառնն. և է՛ր Մովսէս 'ի լերին անդ զքառասուն տիւ և զքառասուն գիշեր:

Գլուխ 25

¹ Եւ խօսեցաւ Տէր ընդ Մովսիսի և ասէ.
² Ասասցես ցորդիսն Իսրայէլի. և առէ՛ք ինձ պտուղ 'ի նոցանէ, որոց հաճոյ թուեսցի 'ի սիրտս իւրեանց և առնուցուք զպտուղս իմ:
³ Եւ ա՛յս է պտուղն զոր առնուցուք 'ի նոցանէ. ոսկի, և արծաթ, և պղինձ,
⁴ և կապուտակ, և ծիրանի. և կարմիր կրկին, և բեհէզ մանեալ. և մազ այծեաց.
⁵ և մորթս խոյոց կարմիր ներկեալ. և մորթս կապուտակեալս. և փայտս անփուտս:
⁶ Եւ ևղ լուսոյ. և խունկս յևղ օծման՝ և 'ի հանդերձանս խնկոց.
⁷ և ականս սարդիոնս. և ականս գրոյ 'ի գործ վակասին. և զպճղնաւորն:
⁸ Եւ արասցե՛ս ինձ սրբութիւն, և երևեցայց 'ի ձեզ:
⁹ Եւ արասցե՛ս ինձ ըստ ամենայնի զոր ցուցից քեզ 'ի լերինն. օրինակ խորանի՝ և օրինակ ամենայն սպասուց նորա.
¹⁰ և ա՛յսպէս արասցես: Արասցե՛ս տապանա՛կ վկայութեան յանփուտ փայտից: յերկուց կանգնոց և 'ի կիսոյ զերկայնութիւն նորա, և 'ի կանգնոյ և 'ի կիսոյ զլայնութիւն նորա, և 'ի կանգնոյ և 'ի կիսոյ զբարձրութիւն նորա:
¹¹ Եւ պատեսցե՛ս զնա ոսկւով սրբով ներքոյ, և արտաքոյ օծցե՛ս զնա: և արասցես 'ի նմա ծնօտս ոսկիս շո՛ւրջ շրջանակաւ:
¹² Եւ ձուլեսցես 'ի նմա չո՛րս օղամանեակս ոսկիս. և դիցես 'ի չորեցունց կողմանց նորա երկուս օղամանեակս 'ի միոջէ կողմանէ. և երկուս օղամանեակս 'ի միւսմէ կողմանէ:
¹³ Եւ արասցես լծա՛կս յանփուտ փայտից. և պատեսցե՛ս զնոսա ոսկւով:
¹⁴ Եւ ագուսցե՛ս զլծակսն՝ յօղամանեակսն 'ի կողմանս տապանակին, բառնա՛լ նոքօք զտապանակն:
¹⁵ Զի յօղամանեակս տապանակի կտակարանացն կայցեն լծակքն, անշա՛րժք անդստին 'ի նմանէ:
¹⁶ Եւ դիցե՛ս 'ի տապանակին զվկայութիւնսն զոր ե՛ս տաց քեզ:
¹⁷ Եւ արասցես զքաւութիւնն խնկակալ յոսկւո՛յ սրբոյ: յերկուց կանգնոց և 'ի կիսոյ զերկայնութիւն նորա, և 'ի կանգնոյ և 'ի կիսոյ զլայնութիւն նորա:
¹⁸ Եւ արասցես երկուս քրոբէս ոսկիս ճախարակեա՛յս. և դիցես զնոսա 'ի վերայ երկոցունց կողմանց քաւութեանն:
¹⁹ Եւ լինիցին քրոբէքն՝ մի 'ի միոջէ՛ կողմանէ, և մի 'ի միւսմէ՛ կողմանէ քաւութեանն:
²⁰ Եւ արասցես երկուս քրոբէս 'ի վերայ երկոցունց կողմանց նորա: Եւ իցէ քրոբէիցն տարածեալ զթևս իւրեանց 'ի վերուստ. և հովանի՛ ունիցին թևօք իւրեանց 'ի վերայ քաւութեանն. և երեսք նոցա յանդիման միմեանց, զի 'ի քաւութի՛ւնն հայեսցին երեսք քրոբէիցն: Եւ դիցես զքաւութիւնն 'ի վերայ տապանակին 'ի վերո՛ւստ կողմանէ:
²¹ Եւ դիցես 'ի տապանակի անդ զվկայութիւնսն զոր ե՛ս տաց քեզ:
²² Եւ յայտնեցա՛յց քեզ անտի. և խօսեցայց ընդ քեզ 'ի վերուստ 'ի քաւութենէ անտի. 'ի միջոյ երկուց քրոբէիցն, որ իցեն 'ի վերայ տապանակին վկայութեան, ըստ ամենայնի զոր պատուիրեցի քեզ առ որդիսն Իսրայէլի:
²³ Եւ արասցես սեղա՛ն յանփուտ փայտից. յերկուց կանգնոց զերկայնութիւն նորա, և 'ի կանգնոյ զլայնութիւն նորա, և 'ի կանգնոյ և 'ի կիսոյ զբարձրութիւն նորա:
²⁴ Եւ պատեսցե՛ս զնա ոսկւով սրբով. և արասցես նմա ծնօտս ոսկիս շրջանակաւ շուրջանակի:
²⁵ Եւ արասցես նմա պսա՛կ ուղկեան շուրջանակի: և արասցես պսակին ծնօտս շուրջանակաւ շուրջանակի:
²⁶ Եւ արասցես նմա չո՛րս օղամանեակս ոսկիս. և դիցես զօղամանեակսն 'ի չորեսին կողմանսն, որ իցեն չորեցունց ոտից նորա,
²⁷ ’ի ներքոյ պսակին. և եղիցին օղամանեակքն լա՛մբք լծակացն, բառնալ նոքօք զսեղանն:
²⁸ Եւ արասցես զլծակսն յանփո՛ւտ փայտից, և պատեսցես զնոսա ոսկւով սրբով. և բարձցի՛ նոքօք սեղանն:
²⁹ Եւ արասցես զխնկաղացսն և զտուփս նորա, և զճաշակս, և զնուիրանո՛ցս նորա, որովք նուիրեսցես. յոսկւոյ սրբոյ արասցե՛ս զայն:
³⁰ Եւ դիցես 'ի վերայ սեղանոյ՝ հացիներեսաց յանդիման իմ հանապազորդ:
³¹ Եւ արասցես աշտանա՛կ յոսկւոյ սրբոյ. ճախարակեա՛յ գործեսցես զաշտանակն. զի բունն, և ստեղունքն, և սկահքն, և գնդակքն, և շուշանքն՝ անդստին 'ի նմանէ իցէ:
³² Վեց ստեղունք արձակեալք 'ի կողմանց նորա. երեք ստեղունք աշտանակին 'ի միոջէ՛ կողմանէ. և երեք ստեղունք աշտանակին 'ի միւսմէ՛ կողմանէ:
³³ Եւ երեք սկահաձևք ընկուզազարդք յօրինեալք 'ի միում ստեղանն. և գնդա՛կ և շուշան. և երեք սկահաձևք ընկուզազարդք յօրինեալք 'ի միւսում ստեղանն. և գնդակ և շուշան. նո՛յնպէս վեցեցունց ստեղանցն արձակելոց յաշտանակէ անտի:
³⁴ Եւ յաշտանակի անդ չորք սկահաձևք ընկուզազարդք յարդարեալք. և գնդակք և շուշանք նորա:
³⁵ Գնդակ 'ի ներքոյ երկուց ստեղանցն անդստին 'ի նմանէ, և գնդակ 'ի ներքոյ երկուց ևս ստեղանցն անդստին 'ի նմանէ. նոյնպէս արասցես վեցեցո՛ւնց ստեղանցն արձակելոց յաշտանակէ անտի:
³⁶ Զի գնդակք նոցա և ստեղունք անդստին 'ի նմանէ՛ իցեն. համա՛կ ճախարակեայ 'ի միոջէ ոսկւոյ սրբոյ:
³⁷ Եւ արասցես նմա ճրագարանս եւթն. և դիցես զճրագարանսն 'ի վերայ աշտանակին. և տայցեն լո՛յս 'ի միոջէ կողմանէ երեսաց նորա:
³⁸ Եւ զբազմակալս նորա, և զնեցո՛ւկսն արասցես յոսկւոյ սրբոյ.
³⁹ ’ի տաղանդէ՛ միոյ յոսկւոյ սրբոյ արասցես զայն ամենայն սպաս:
⁴⁰ Զգո՛յշ լեր որպէս ցուցաւ քեզ օրինակ 'ի լերինն՝ արասցե՛ս:

Գլուխ 26

¹ Եւ արասցես խորա՛ն տասնփեղկեան: 'ի բեհեզոյ մանելոյ, և 'ի կապուտակէ, և 'ի ծիրանւոյ, և 'ի կարմրոյ կրկնելոյ: քերոբ՝ գո՛րծ անկուածոյ գործեսցես զնոսա:
² Երկայնութիւն միոյ փեղկին 'ի քսանևյութ կանգնոյ, և լայնութիւն 'ի չորից կանգնոց փեղկի միոյ լինիցի: չափ՝ նո՛յն եղիցի ամենայն փեղկիցն:
³ Հի՛նգ փեղկ ընդ միմեանս կցեալ. և հինգ ևս ա՛յլ ընդ միմեանս խառնեալ:
⁴ Եւ արասցես ճարմա՛նդս կապուտակեայս առ եզերբ միոյ փեղկին 'ի միոջէ կողմանէ 'ի խառնուածսն: նոյնպէս արասցես և առ եզե՛րբ արտաքնոյ փեղկին, երկրորդի՛ խառնուածոյն:
⁵ Յիսո՛ւն ճարմանդ արասցես միում փեղկի. և յիսուն ճարմանդ արասցես 'ի կողմանէ փեղկին ըստ երկրորդի խառնուածոյն. դէմ ընդդէ՛մ միմեանց խառնիցն իւրաքանչի՛ւր ճարմանդքն:
⁶ Եւ արասցես յիսուն օղս ոսկիս՝ և խառնեսցե՛ս զփեղկսն ընդ միմեանս աղխիւքն. և եղիցի խորա՛ն մի:
⁷ Եւ արասցես վերնափե՛ղկս մազեղէնս նուարտան խորանին, մետասան փեղկ գործեսցես զնոսա:
⁸ Երկայնութիւն միոյ փեղկի՝ լինիցի յերեսուն կանգնոյ. և լայնութիւն միոյ փեղկի 'ի չորից կանգնոց: չափ՝ նո՛յն եղիցի մետասանեցունց փեղկիցն:
⁹ Եւ խառնեսցե՛ս ընդ միմեանս զհինգ փեղկն 'ի միասին, և զվեց փեղկն 'ի միասին: և կրկնեսցես զվե՛ցերորդ փեղկն առաջոյ կողմանէ խորանին:
¹⁰ Եւ արասցես ճարմանդս յիսուն առ եզերբ միոյ փեղկին 'ի մէ՛ջ խառնուածոյն: և յիսուն ճարմա՛նդ արասցես առ եզերբ փեղկին երկրորդի՛ խառնուածոյն:
¹¹ Եւ արասցես օ՛ղս պղնձիս յիսուն, և խառնեսցե՛ս զօղսն ընդ ճարմանդսն. և կցեսցե՛ս զփեղկսն՝ և եղիցին մի:
¹² Եւ դիցես զաւելորդ փեղկին 'ի ներքո՛յ խորանին. կիսով փեղկիւն աւելորդաւ մնացելով ծածկեսցե՛ս զապարումս փեղկից խորանին յետոյ կողմանէ,
¹³ կանգնաւ՝ յա՛յսմ կողմանէ, և կանգնաւ՝ յա՛յնմ կողմանէ. յաւելորդէ երկայնութեան փեղկից խորանին. և եղիցի ծածկե՛լ զապարումս խորանին աստի անտի:
¹⁴ Եւ արասցես զվիժակս խորանին 'ի շիկակարմի՛ր մորթոց խոյոց: և ծածկելիս 'ի կապուտա՛կ մորթոյ 'ի վերուստ:
¹⁵ Եւ արասցես զսիւնակս խորանին յանփո՛ւտ փայտից
¹⁶ կանգնաւորս. 'ի տա՛սն կանգնոյ զերկայնութիւն միոյ սիւնակին առնիցես: և 'ի միոջէ կանգնոյ և 'ի կիսոյ
¹⁷ զթանձրութիւն և զլայնութիւն միոյ սիւնակին: Եւ երկուս սփռիչս միում սիւնակի, ագուցեալ ընդ միմեանս. ա՛յնպէս արասցես ամենայն սիւնակաց խորանին:
¹⁸ Եւ արասցես քսան սիւնակս խորանին 'ի հիւսւսոյ կողմանէ:
¹⁹ Եւ քառասուն խարիսխս արծաթիս արասցես քսանեցունց սեանց: երկու խարիսխք առ մի սիւն յերկոցունց կողմանց. և երկու խարիսխք առ մի սիւն յերկոցունց կողմանց խորանին:
²⁰ Եւ յերկրորդէ կողմանէ խորանին ընդ հարաւ քսան սիւն.
²¹ և քառասուն խարիսխք նոցա արծաթիք. երկո՛ւ խարիսխք առ մի սիւն յերկոցունց կողմանց:
²² Եւ յետուստ խորանին 'ի ծովակողմն կուսէ արասցես վե՛ց սիւն:
²³ Եւ երկո՛ւ սիւնս արասցես յանկիւնս խորանին 'ի թիկա՛նց կողմանէ:
²⁴ Եւ եղիցին հասարակ 'ի ներքուստ: Եւ ըստ նմի՛ն օրինակի լինիցին զոյգք խոյակաց նորա 'ի մի խառնուած: նո՛յնպէս արասցես երկոցունց անկեանցն կանգնաւորս:
²⁵ Եւ եղիցին ո՛ւթ սիւն. և խարիսխք նոցա արծաթիք՝ վեշտասան խարիսխք: երկու խարիսխք առ մի սիւն յերկոցունց կողմանց նորա. և երկու սարիսխք առ մե՛ւս ևս սիւն:
²⁶ Եւ արասցես նիգս յանփուտ փայտից. հի՛նգ նիգ առ մի սիւն 'ի միոջէ՛ կողմանէ խորանին,
²⁷ և հինգ նիգ առ մե՛ւս ևս սիւն յերկրո՛րդ կողմանէ խորանին. և հինգ նիգ առ մի սիւն 'ի թիկանց խորանին ընդ ծովակողմն:
²⁸ Եւ նիգ մի 'ի մէջ սեանցն թափանցա՛նց՝ 'ի միոջէ կողմնէ 'ի մի՛ւս կողմն:
²⁹ Եւ զսիւնսն պատեսցես ոսկւո՛վ. և արասցես օ՛ղս ոսկիս՝ յորս ագուցանիցես զնիգսն: և պատեսցես զնիգսն ոսկւո՛վ:
³⁰ Եւ կանգնեսցե՛ս զխորանն վկայութեան՝ ըստ օրինակին որ ցուցաւ քեզ 'ի լերինն:
³¹ Եւ արասցես վարագո՛յր 'ի կապուտակէ՛, և 'ի ծիրանւոյ, և 'ի կարմրոյ մանելոյ, և 'ի բեհեզո՛յ նիւթելոյ: գո՛րծ անկուածոյ գործեսցես զնա քերա՛ւբ:
³² Եւ դիցես զնա 'ի վերայ չորեցունց անփո՛ւտ և ոսկիապա՛տ սեանցն. և խոյակք նոցա ոսկի՛ք. և խարիսխք նոցա արծաթի՛ք:
³³ Եւ ձգեսցե՛ս զվարագոյրն սիւնէ 'ի սիւն: Եւ տարցիս 'ի նե՛րքս քան զվարագոյրն զտապանակ վկայութեանն. և անջրպետիցէ՛ ձեզ վարագոյրն 'ի մէջ սրբութեանն, և 'ի մէջ սրբութեա՛ն սրբութեանցն:
³⁴ Եւ ծածկեսցե՛ս վարագուրաւն զտապանակ վկայութեանն 'ի սրբութիւն սրբութեանցն:
³⁵ Եւ դիցես զսեղանն արտաքոյ վարագուրին: և զաշտանակն յանդիմա՛ն սեղանոյն, 'ի կողմանէ խորանին ընդ հարաւ: և զսեղանն դիցես 'ի կողմանէ խորանին ընդ հիւսւսի:
³⁶ Եւ արասցես սրահա՛կ դրան խորանին. 'ի կապուտակէ՛, և 'ի ծիրանւոյ, և 'ի կարմրոյ մանելոյ, և 'ի բեհեզոյ նիւթելոյ. գործ նկարակե՛րպ:
³⁷ Եւ արասցես վարագուրին հինգ սիւնակ յանփուտ փայտից. և օծցես զնոսա ոսկւո՛վ: Եւ խոյակք նորա ոսկի՛ք. և ձուլեսցես նոցա հինգ խարիսխ պղնձի:

Գլուխ 27

¹ Եւ արասցես սեղա՛ն յանփուտ փայտից. 'ի հի՛նգ կանգնոյ զերկայնութիւն նորա, և 'ի հինգ կանգնոյ զլայնութիւն: չորեքկուսի՛ լինիցի սեղանն, և յերից կանգնոց զբարձրութիւն նորա:
² Եւ արասցես զեղջևրս նորա 'ի վերայ չորեցո՛ւնց անկեանց իւրոց. զի անդստի՛ն ընտրեալ իցեն եղջևրքն: և պատեսցե՛ս զնա պղնձով:
³ Եւ արասցես պսա՛կ սեղանոյն: և զնուարտա՛ն նորա: և զտաշտսն: և զմսահանսն: և զկրակարանսն: և զամենայն սպասն արասցես պղնձի՛:
⁴ Եւ արասցես նմա գահաւորա՛կ, վանդակակե՛րպ պղնձի: և արասցես գահաւորակին չո՛րս օղամանեակս պղնձիս 'ի չորեցունց կողմանէ:
⁵ Եւ դիցես զնոսա ընդ գահաւորակաւ սեղանոյն 'ի ներքոյ: և եղիցի գահաւորակն մինչև 'ի մէջ սեղանոյն:
⁶ Եւ արասցես լծա՛կս սեղանոյն, լծակս յանփուտ փայտից: և պատեսցես զնոսա պղնձով.
⁷ և արկցես զլծակսն ընդ օղսն: և եղիցին լծակքն յերկոցունց կողմանց սեղանոյն՝ առ 'ի բառնալոյ զնա:
⁸ Խո՛ր, տախտակամա՛ծս արասցես զնա. ըստ օրինակին որպէս ցուցաւ քեզ 'ի լերինն. ա՛յնպէս արասցես զնա: ՃԸ
⁹ Եւ արասցես սրահ 'ի խորանին 'ի կողմ հարաւոյ. և զառագաստ սրահին 'ի բեհեզո՛յ մանելոյ. հարիւր կանգուն յերկայնութիւն միոյ կողմանն,
¹⁰ և սիւնք նոցա քսան, և խարիսխք նոցա պղնձիք քսան, և օղք նոցա և խոյակք նոցա արծաթիք:
¹¹ Նո՛յնպէս և 'ի կողմանն որ ընդ հիւսւսի՝ առագաստքն հարիւր կանգուն յերկայնութիւն. և սիւնք նոցա պղնձիք քսան, և սարիսխք նոցա պղնձիք քսան. և խոյաւղք նոցա. և խոյակք սեանցն պատեալ արծաթով:
¹² Եւ 'ի լայնութիւն սրահին ընդ ծովակողմն առագաստք 'ի յիսուն կանգնոյ. սիւնք նոցա տասն, և խարիսխք նոցա տասն:
¹³ Եւ 'ի լայնութիւն առաջին սրահին՝ որ ընդ արևելս առագաստք 'ի յիսուն կանգնոյ. սիւնք նոցա տասն, և խարիսխք նոցա տասն:
¹⁴ Եւ 'ի հնգետասան կանգնոյ բարձրութիւն առագաստիցն 'ի միոջէ կողմանէ. սիւնք նոցա երեք, և խարիսխք նոցա երեք:
¹⁵ Եւ յերկրորդում կողմանն՝ հնգետասան կանգուն առագաստից 'ի բարձրութիւն. սիւնք նոցա երեք, և խարիսխք նոցա երեք:
¹⁶ Եւ դրան սրահին վարագոյր՝ քսան կանգուն 'ի բարձրութիւն, 'ի կապուտակէ, և 'ի ծիրանւոյ, և 'ի կարմրոյ մանելոյ, և 'ի բեհեզո՛յ նիւթելոյ. նկարէն յասղնագործաց: և սիւնք նոցա չորք, և խարիսխք նոցա չորք:
¹⁷ Ամենայն սիւնք սրահին շուրջանակի արծաթապատք, և խոյակք նոցա արծաթիք, և սարիսխք նոցա պղնձիք:
¹⁸ Եւ երկայնութիւն սրահին հարիւր առ հարիւր. և լայնութիւն յիսո՛ւն առ յիսուն. և բարձրութիւն հնգետասա՛ն կանգուն. 'ի բեհեզոյ մանելոյ. և խարիսխք նոցա պղնձիք:
¹⁹ Եւ ամենայն կա՛հ խորանին, և ամենայն գործի նորա, և ամենայն ցի՛ցք սրահին՝ պղնձիք: ՃԹ
²⁰ Եւ դու պատուիրեա՛ որդւոցն Իսրայէլի. և առցեն քեզ ձէ՛թ 'ի ձիթենեաց, պարզ, սուրբ, խակակութ, 'ի լոյս. զի եղիցի ճրագ հանապազորդ՝
²¹ ’ի խորանին վկայութեան, արտաքոյ վարագուրի ուխտին: Եւ լուցանիցէ զնա Ահարոն և որդիք իւր յերեկորեայ մինչև ցառաւօտ առաջի Տեառն. օրէն յաւիտենակա՛ն յազգս ձեր առ 'ի յորդւոցն Իսրայէլի:

Գլուխ 28

¹ Եւ դու մատուսցես առ քեզ զԱհարոն զեղբայր քո. և զորդիս նորա ընդ նմա՝ յորդւոցն Իսրայէլի, քահանայանա՛լ ինձ. զԱհարոն, և զՆաբադ, և զԱբիուդ, և զԵղիազար, և զԻթամա՛ր զորդիս Ահարոնի:
² Եւ արասցես պատմուճան սո՛ւրբ Ահարոնի եղբօր քում, 'ի պատիւ և 'ի փառս:
³ Եւ դու խօսեսցի՛ս ընդ ամենայն իմաստունս մտօք, զորս լցուցի՛ց հոգւով իմաստութեան: Եւ արասցես պատմուճան սուրբ՝ Ահարոնի 'ի սրբութիւն, որովք քահանայանայցէ՛ ինձ:
⁴ Եւ ա՛յս օրինակ պատմուճանացն՝ զոր առնիցեն. զպճղնաւորն, և զվակաս՝ զուսովք և զլանջօք. և զպատմուճանն բեհեզեայ. և խոյր. և կամար: և արասցեն պատմուճան սո՛ւրբ՝ Ահարոնի եղբօր քում, և որդւոց նորա քահանայանա՛լ ինձ:
⁵ Եւ առցեն նոքա ոսկի, և կապուտակ, և ծիրանի, և կարմիր մանեալ, և բեհե՛զ:
⁶ Եւ արասցեն զվակասն յոսկւո՛յ սրբոյ, և 'ի կապուտակէ, և 'ի ծիրանւոյ, և 'ի կարմրոյ մանելոյ, և 'ի բեհեզոյ նիւթելոյ. գո՛րծ ոստայնի նկարակերպ:
⁷ Երկու վակասք ընդ միմեանս խառնեալք, և եղիցին 'ի վերայ երկոցո՛ւնց կողմանց նորա հաստատեալք:
⁸ Եւ գործ վակասին՝ որ իցէ 'ի վերայ նորա. ըստ նմի՛ն օրինակի գո՛րծ անդստին 'ի նմանէ լինիցի. յոսկւոյ սրբոյ, և 'ի կապուտակէ, և 'ի ծիրանւոյ, և 'ի կարմրոյ մանելոյ, և 'ի բեհեզոյ նիւթելոյ:
⁹ Եւ առցես երկուս ականս զըմրո՛ւխտս, և գրեսցես 'ի նոսա զանուանս որդւոցն Իսրայէլի.
¹⁰ զվե՛ց անուն նոցա 'ի միում ական. և զայլն ևս վեց՝ յերկրորդում ականն. ըստ ազգս իւրեանց.
¹¹ գո՛րծ ճարտարութեան ակնագործաց. քանդա՛կ կնքոյ քանդակեսցես զերկոսին ականսն. ըստ անուանց որդւոցն Իսրայէլի. տպաւորեալս և քանդակեալս ոսկւով արասցես զնոսա:
¹² Եւ դիցես զերկուս ականսն 'ի վերայ ուսոց վակասին. զի լինիցին ականքն յիշատակ որդւոցն Իսրայէլի: և բառնայցէ՛ Ահարոն զանուանս որդւոցն Իսրայէլի առաջի Տեառն, 'ի վերայ երկուց ուսոց իւրոց՝ 'ի յիշատակ վասն նոցա:
¹³ Եւ արասցես վահանա՛կս յոսկւոյ սրբոյ:
¹⁴ Եւ արասցես երկո՛ւս վերջս յոսկւոյ սրբոյ. մանուածոյս ծաղկեալս՝ գո՛րծ հիւսկէն. և դիցես զվերջսն մանուածոյս 'ի վերայ երկոցուն վահանակացն
¹⁵ առ վտաւակօքն նոցա առաջոյ կողմանէ: Եւ արասցես զտախտակն դատաստանաց գո՛րծ նկարակերպ. ըստ ձևոյ վակասին արասցես զնա. յոսկւոյ, և 'ի կապուտակէ, և 'ի ծիրանւոյ, և 'ի կարմրոյ մանելոյ, և 'ի բեհեզոյ նիւթելոյ:
¹⁶ Եւ արասցես զնա չորեքանկիւնի՛, թզաւ յերկայնութիւն, և թզաւ 'ի լայնութիւն:
¹⁷ Եւ ընդելուզցե՛ս 'ի նմա ընդելուզածս, ըստ չորեքկարգեա՛ն ականց: Կարգս ականց, Առաջին՝ զըմրուխտ, և սարդիոն, և տպազիոն. կարգ մի:
¹⁸ և Կարգն երկրորդ՝ կարկեհան, և շափիղա, և յասպիս:
¹⁹ և Կարգն երրորդ՝ գոճազմ, և ակատ, և սուտակ:
²⁰ և Կարգն չորրորդ՝ յակինթ, և բիւրեղ, և եղունգն: ընդելուզեալ, յոսկի կապեալ՝ յիւրաքանչիւր կարգս կայցեն:
²¹ Եւ եղիցին ականքն յանուա՛նց որդւոցն Իսրայէլի երկոտասան. ըստ անուանց նոցա գրեալք քանդակաւ իւրաքանչիւր ըստ անուան իւրում լինիցին. ըստ ազգա՛ցն երկոտասանից:
²² Եւ արասցես տախտակ մի հիւսկէ՛ն վերջիւք. գործ շղթայագործ յոսկւոյ սրբոյ:
²³ Եւ արասցես 'ի վերայ տախտակին երկուս օղս ոսկիս. և դիցես զերկուս օղսն ոսկիս 'ի վերայ երկուց ծայրից տախտակին:
²⁴ Եւ դիցես զերկու շղթայագործսն ոսկիս 'ի վերայ երկոցուն օղոցն առ ծայրիւք տախտակին:
²⁵ Եւ զերկուս ծայրս երկուց շղթայագործիցն տացե՛ս 'ի վերայ երկոցունց մած. և դիցես 'ի վերայ թիկանց վակասին 'ի ճակա՛տ երեսաց նորա:
²⁶ Եւ արասցես երկո՛ւս օղս ոսկիս, և տացե՛ս զնոսա 'ի վերայ երկուց ծայրից տախտակին, առ եզերբն որ իցէ հանդէպ վակասին 'ի ներքոյ կողմանէ:
²⁷ Եւ արասցես երկուս օղս ոսկիս, և տացես զնոսա 'ի վերայ երկուց ուսոց վակասին 'ի ներքոյ կողմանէ՝ յանդիման միմեանց միաբան. և զաղխս նորա 'ի վերայ մենքենայից վակասին:
²⁸ Եւ պինդ ունիցին զտախտակն յօղոց նորա՝ մինչև ցօղս վակասին, 'ի նիւթոյ կապուտակէ. զի իցէ 'ի վերայ մենքենայից վակասին. և մի՛ զերծանիցի տախտակն 'ի վակասէ անտի:
²⁹ Եւ առցէ Ահարոն զանուն որդւոցն Իսրայէլի 'ի վերայ տախտակի դատաստանին՝ 'ի լանջս իւր, 'ի մտանել իւրում 'ի սրբութիւնն 'ի յիշատակ հանապազորդ առաջի Աստուծոյ:
³⁰ Եւ դիցես 'ի վերայ տախտակին դատաստանի զվերջսն շղթայագործս՝ յերկոցունց և տարցի Ահարոն զդատաստանս որդւոցն Իսրայէլի 'ի վերայ լանջաց իւրոց առաջի Տեառն հանապազ:
³¹ Եւ արասցես վտաւակս պճղնաւորս համա՛կ կապուտակ.
³² և զօձիսն գրապանա՛ւ արարեալ, բոլորա՛կ ձևեսցես շուրջանակի՝ գո՛րծ անգուածոյ: և զխառնուածսն անկեալ անդստին 'ի նմանէ. զի մի՛ արատիցի:
³³ Եւ արասցես առ ստորոտով՝ վտաւակացն 'ի ներքոյ կողմանէ՝ իբրև նռնաձևս ծաղկեալս, 'ի կապուտակէ և 'ի ծիրանւոյ, և 'ի կարմրոյ մանելոյ, և 'ի բեհեզոյ նիւթելոյ առ ստորոտով վտաւակացն շուրջանակի. և տեսիլ նորա նռնաձև, և զանգակս ոսկիս 'ի մէջ նոցա շուրջանակի:
³⁴ Զանգակս ոսկի և նռնաձև՝ ծաղկեալ առ ստորով վտաւակացն շուրջանակի:
³⁵ Եւ եղիցի 'ի վերայ Ահարոնի յորժամ պաշտիցէ՝ հնչիւն բարբառոյ 'ի մտանել իւրում 'ի սրբութիւնն առաջի Տեառն, և յելանել նորա՝ զի մի՛ մեռանիցի:
³⁶ Եւ արասցես թիթեղն յոսկւոյ սրբոյ. և քանդակեսցես 'ի նմա քանդակ կնքոյ՝ Սրբութի՛ւն Տեառն:
³⁷ Եւ դիցես զնա 'ի վերայ կապուտակին մանելոյ. և ե՛ղիցի խուրին յերեսաց կողմանէ
³⁸ ’ի վերայ ճակատուն Ահարոնի: Եւ բարձցէ Ահարոն զմեղս նուիրացն, որչափ ինչ նուիրիցեն որդիքն Իսրայէլի, ըստ ամենայն տրոց սրբութեանցն իւրեանց. և եղիցի 'ի վերայ ճակատուն Ահարոնի հանապազ յընդունելութիւն նոցա առաջի Տեառն:
³⁹ Եւ զպճղնաւոր պատմուճանն 'ի բեհեզոյ: ՃԺԷ Եւ արասցես ապարաւշս բեհեզեղէնս. և կամար՝ գո՛րծ նկարակերպ:
⁴⁰ Եւ որդւոցն Ահարոնի արասցես պատմուճանս, և կամարս, և խոյրս. 'ի պատիւ և 'ի փառս:
⁴¹ Եւ զգեցուսցե՛ս զայն Ահարոնի եղբօր քում, և որդւոց նորա ընդ նմա: Եւ օծցե՛ս զնոսա. և լցցե՛ս զձեռս նոցա. և սրբեսցե՛ս զնոսա՝ զի քահանայասցին ինձ:
⁴² Եւ արասցես նոցա անդրավարտիս կտաւեայս. ծածկել զառականս մարմնոց իւրոց, միջովք չափ և բարձիւք չափ:
⁴³ Եւ ունիցի զայն Ահարոն և որդիք նորա, յորժամ մտանիցեն 'ի խորանն վկայութեան. կամ յորժամ մերձենայցեն 'ի սեղանն սրբութեան պաշտե՛լ: և մի՛ ածիցեն 'ի վերայ իւրեանց մեղս՝ զի մի՛ մեռանիցին: օրէն յաւիտենակա՛ն նմա և զաւակի իւրում յետ նորա:

Գլուխ 29

¹ Եւ ա՛յս ինչ է զոր առնիցես նոցա, և սրբեսցես զնոսա քահանայանալ նոցա ինձ: Առցես զուարակ մի յանդոյ. և խոյս երկո՛ւս անարատս:
² և պա՛նս բաղարջս, և շօթս բաղարջս զանգեալ իւղով. և քաքա՛րս բաղարջս օծեալ իւղով, նաշի՛հ ցորենոյ զանգեալ իւղով արասցես զայն:
³ Եւ դիցես 'ի վերայ խանի միոյ. և մատուսցես զայն խանիւն, և զզուարակն, և զերկու խոյսն:
⁴ Եւ զԱհարոն և զորդիս նորա մատուսցես 'ի դուռն խորանին վկայութեան. և լուասցես զնոսա ջրով:
⁵ Եւ առեալ զպատմուճանսն զգեցուսցե՛ս Ահարոնի եղբօր քում. և զպարեգօտս պճղնաւորս 'ի վերայ ներքնակացն. և զվակասն. և զտախտակն. և պնդեսցե՛ս զտախտակն ընդ վակասն:
⁶ Եւ դիցես զխոյրն 'ի վերայ գլխոյ նորա. և դիցես զթիթեղնն սուրբ 'ի վերայ խուրին:
⁷ Եւ առցես յիւղոյ անտի օծման, և արկցե՛ս 'ի գլուխ նորա, և օծցես զնա:
⁸ Եւ զորդիս նորա մատուսցես, և զգեցուսցես նոցա պատմուճանս. և ածցե՛ս նոցա կամարս #.
⁹ Ահարոնի և որդւոց նորա. և ածցես նոցա ապարաւշս. և եղիցի նոցա այն ինձ 'ի քահանայութիւն յաւիտենական: և կատարեսցե՛ս զձեռս Ահարոնի և զձեռս որդւոց նորա:
¹⁰ Եւ մատուսցես զզուարակն առ դուռն խորանին վկայութեան. և դիցեն Ահարոն և որդիք նորա զձեռս իւրեանց 'ի վերայ գլխոյ զուարակին առաջի Տեառն, առ դրան խորանին վկայութեան:
¹¹ Եւ սպանցե՛ս զզուարակն առաջի Տեառն, առ դրան խորանին վկայութեան:
¹² Եւ առցե՛ս յարենէ զուարակին, և դիցե՛ս 'ի վերայ եղջերաց սեղանոյն մատամբ քով. և զա՛յլն ամենայն արիւն ցանեսցես առ յատակաւ սեղանոյն:
¹³ Եւ առցե՛ս զամենայն ճարպ թաղանթո՛յ քաղրդին, և զլերդաբոյթն, և զերկուս երիկամունսն ճարպովին, դիցես 'ի վերայ սեղանոյն:
¹⁴ Եւ զմիս զուարակին և զմորթ նորա, և զապաւառն այրեսցեն արտաքոյ բանակին. զի ա՛յն իսկ է վասն մեղաց:
¹⁵ Եւ զխոյն զմի՝ առցե՛ս. և դիցեն քահանայքն որդիքն Ահարոնի զձեռս իւրեանց 'ի վերայ գլխոյ խոյին.
¹⁶ և զենցե՛ս զխոյն: և առեալ զարիւն նորա հեղցե՛ս շուրջ զսեղանովն:
¹⁷ Եւ զխոյն յօշեսցե՛ս անդա՛մ անդամ, և լուասցես զփորոտին և զոտս նորա ջրով. և դիցես 'ի վերայ յօշուածոյն, հանդերձ գլխով նորա:
¹⁸ Եւ հանցես բովանդակ զխոյն 'ի վերայ սեղանոյն յողջակէզ Տեառն 'ի հոտ անուշից. զոհ Տեառն է:
¹⁹ Եւ առցես զխոյն զերկրորդ. և դիցեն Ահարոն և որդիք նորա զձեռս իւրեանց 'ի վերայ գլխո՛յ խոյին:
²⁰ Եւ սպանցե՛ս զխոյն: Եւ առցես յարենէ նորա, և դիցես 'ի վերայ բլթակի աջոյ ունկա՛նն Ահարոնի. և 'ի վերայ բլթակի աջոյ ունկան որդւոց նորա. և 'ի վերայ ծայրից ձեռին նորա աջոյ, և 'ի վերայ ծայրից աջոյ ոտին նորա. և 'ի վերայ աջուց բլթակաց ականջաց որդւոց նորա. և 'ի վերայ ծայրից աջոյ ձեռաց նոցա. և 'ի վերայ ծայրից աջոյ ոտից նոցա: և հեղցե՛ս զարիւնն շուրջ զսեղանովն:
²¹ Եւ առցես յարենէն որ 'ի վերայ սեղանոյն իցէ, և յիւղոյ օծութեանն, և ցանեսցե՛ս 'ի վերայ Ահարոնի և 'ի վերայ պատմուճանի նորա. և 'ի վերայ որդւոց նորա, և 'ի վերայ պատմուճանաց որդւոց նորա ընդ նմա. և սրբեսցի՛ ինքն և պատմուճան իւր. և որդիք նորա, և պատմուճանք որդւոց նորա ընդ նմա: և զարիւն խոյին ցանեսցե՛ս շուրջ զսեղանովն:
²² Եւ առցես 'ի խոյէ անտի զճարպն և զդմակն և զճարպ թաղանթոյ քաղրթին, և զլերդաբոյթն և զերկուս երիկամունս ճարպովին. և զերին աջոյ. զի ա՛յն է կատարումն:
²³ Եւ պան մի, և շօթ մի իւղով զանգեալ. և քաքար մի 'ի խանէ անտի բաղարջացն եդելոցն առաջի Տեառն:
²⁴ Եւ դիցես զայն ամենայն 'ի վերայ ձեռացն Ահարոնի, և 'ի վերայ ձեռաց որդւոց նորա. և նուիրեսցես զայն նուէ՛ր առաջի Տեառն:
²⁵ Եւ առցես 'ի ձեռաց նոցա, և հանցես 'ի սեղանն ողջակիզաց 'ի հո՛տ անուշից առաջի Տեառն. զի պտուղ Տեառն է: ՃԺԹ
²⁶ Եւ առցես զերբուծն 'ի խոյէ անտի կատարման, որ է Ահարոնի. և նուիրեսցես զայն նուէ՛ր առաջի Տեառն. և եղիցի քե՛զ 'ի մասն:
²⁷ Եւ սրբեսցես զերբուծն 'ի նուէր, և զերի՛ նուիրին որ նուիրիցի: Եւ որ ինչ հանիցի 'ի խոյէն
²⁸ կատարման յԱհարոնէ և յորդւոց նորա, և եղիցի Ահարոնի և որդւոց նորա օրէ՛ն յաւիտենական առ 'ի յորդւոցն Իսրայէլի. զի ա՛յն է նոցա հաս: Եւ եղիցի նուէր յորդւոցն Իսրայէլի 'ի զենլեաց փրկութեանց իւրեանց, նուէ՛ր նոցա Տեառն:
²⁹ Եւ պատմուճանն սրբութեան որ է Ահարոնի, եղիցի որդւո՛ց նորա յետ նորա, օծանել զնոսա նոքօք, և կատարել նոքօք զձեռս նոցա:
³⁰ Զեւթն օր զգենուցու զայն քահանայն որ փոխանա՛կ նորա կայցէ յորդւոց իւրոց. որ մտանիցէ 'ի խորանն վկայութեան պաշտել 'ի սրբութիւնսն: ՃԻ
³¹ Եւ զխոյն կատարման առցես. և եփեսցես զմիս նորա 'ի սրբո՛ւմ տեղւոջ.
³² և կերիցեն՝ Ահարո՛ն և որդիք նորա զմիս խոյին. և զպա՛նսն որ 'ի խանի անդ, առ դրան խորանին վկայութեան կերիցեն զայն,
³³ որովք սրբեցանն՝ 'ի կատարել զձեռս նոցա և սրբել զնոսա: օտարազգի՛ ոք՝ մի՛ կերիցէ 'ի նոցանէ՝ զի սրբութիւնք են:
³⁴ Ապա թէ մնայցէ 'ի մսոյ զոհին կատարման, և 'ի հացէ անտի յայգ՝ այրեսցեն զնշխարն հրով. և մի՛ կերիցի, զի սրբութիւն Տեառն է:
³⁵ Եւ արասցես Ահարոնի և որդւոց նորա ա՛յսպէս, ըստ ամենայնի զոր միանգամ պատուիրեցի քեզ: Զեւթն օր կատարեսցե՛ս զձեռս նոցա:
³⁶ Եւ զզուարակն զվասն մեղաց՝ արասցե՛ս յաւուրն սրբութեան: ՃԻԱ Եւ մաքրեսցե՛ս զսեղանն, սրբե՛լ քեզ 'ի վերայ նորա. օծցե՛ս զնա առ 'ի սրբել զնա
³⁷ զեւթն օր: մաքրեսցե՛ս զսեղանն և սրբեսցես զնա. և եղիցի սեղանն սուրբ սրբոյն. ամենայն որ մերձեսցի 'ի սեղանն՝ սրբեսցի: ՃԻԲ
³⁸ Եւ ա՛յս ինչ իցէ զոր առնիցես 'ի վերայ սեղանոյն: երկո՛ւս գառինս տարևորս անարատս՝ առ օր 'ի վերայ սեղանոյն յաճախութեամբ. զի պտուղ յաճախութեան է:
³⁹ Զմի գառնն առնիցես ընդ առաւօտս, և զերկրորդ գառնն՝ առնիցես ընդ երեկոյս:
⁴⁰ Եւ տասանորդ նաշհոյ՝ մզեալ իւղո՛վ թրմեալ. և զչորրորդ դորակի գինւոյ՝ նուէ՛ր առ մի գառնն:
⁴¹ Եւ զգառնն երկրորդ, արասցես ընդ երեկոյս՝ ըստ առաւօտին զոհին, և ըստ նորին նուիրին առնիցես նմա 'ի հո՛տ անուշից
⁴² պտուղ Տեառն: զոհ յաճախութեան յազգս ձեր, առ դրա՛ն խորանին վկայութեան առաջի Տեառն: որովք ծանուցայց քեզ ա՛նդ խօսել ընդ քեզ:
⁴³ Եւ ժամանակեցի՛ց անդ որդւոցն Իսրայէլի, և սրբեցայց փառօք իմովք.
⁴⁴ և սրբեցից զխորանն վկայութեան և զսեղանն: Եւ զԱհարոն և զորդիս նորա սրբեցի՛ց ինձ 'ի քահանայութիւն:
⁴⁵ Եւ անուանեցա՛յց յորդիսն Իսրայէլի. և եղէց նոցա Աստուած:
⁴⁶ Եւ ծանիցեն թէ ե՛ս եմ Տէր Աստուած նոցա. որ հանի զնոսա յերկրէն Եգիպտացւոց, անուանել նոցա՝ և լինել նոցա Տէր Աստուած:

Գլուխ 30

¹ Եւ արասցես սեղան խնկակա՛լ խնկոց յանփուտ փայտից:
² Եւ արասցե՛ս զնա կանգնաւ յերկայնութիւն, և կանգնաւ 'ի լայնութիւն, չորեքկուսի՛ լինիցի. և յերկուց կանգնոց բարձրութիւն նորա. և եղջևրք իւր անդստին 'ի նմանէ՛ լինիցին:
³ Եւ պատեսցե՛ս զնա ոսկւով սրբով. զվանդակն նորա և զկողմանս շուրջանակի, և զեղջևրս նորա. և արասցես նմա պսա՛կ ոսկի շուրջանակաւ շուրջանակի:
⁴ Եւ երկո՛ւս օղս ոսկիս սուրբս արասցես ընդ շուրջանակաւ պսակի նորա յերկոցունց կողմանց.
⁵ և արասցես յերկոսին անկիւնս նորա. և եղիցին լծա՛կք օղալամբացն բառնալ զնա նոքօք:
⁶ Եւ արասցես զլծակսն յանփո՛ւտ փայտից, և պատեսցես զնոսա ոսկւով:
⁷ Եւ դիցե՛ս զնա յանդիման վարագուրին, որ իցէ առաջի տապանակին վկայութեան, ընդդէ՛մ վկայութեանն՝ որ իցէ առ վկայութեամբքն, որովք երևեցա՛յց քեզ անդ:
⁸ Եւ արկցէ 'ի վերայ նորա Ահարոն խո՛ւնկս հանդերձեալ՝ աղացեալ մանր իբրև զփոշի. ընդ առաւօ՛տս առաւօտս, յորժամ զճրագսն հանդերձիցէ. ծխեսցէ խո՛ւնկ 'ի վերայ նորա:
⁹ Եւ յորժամ լուցանիցէ Ահարոն զճրագսն երեկորին, ծխեսցէ 'ի վերայ նորա խո՛ւնկս յաճախութեան հանապազորդ առաջի Տեառն յազգս իւրեանց:
¹⁰ Եւ ո՛չ հանիցէք 'ի վերայ նորա խունկ օտար, և պտուղս, և զոհս, և նուէրս մի՛ նուիրիցէք 'ի վերայ նորա:
¹¹ Եւ քաւեսցէ՛ Ահարոն 'ի վերայ եղջերաց նորա միանգամ 'ի տարւոջ՝ յարենէ առ 'ի վասն մեղացն սրբութեան և քաւութեան. մի անգամ 'ի տարւոջ սրբեսցէ զնա յազգս նոցա, զի սրբութիւն սրբութեանց Տեառն է: ՃԻԴ
¹² Եւ խօսեցաւ Տէր ընդ Մովսիսի և ասէ. Եթէ ունիցիս զհամար որդւոցն Իսրայէլի 'ի հանդիսի իւրեանց: և տացեն իւրաքանչիւր փրկա՛նս ընդ անձին իւրոյ Տեառն՝ ըստ հանդիսին իւրեանց. և մի՛ լինիցի 'ի նոսա մա՛հ 'ի հանդիսի անդ իւրեանց:
¹³ Եւ ա՛յս ինչ է զոր տացեն որք անցանիցեն 'ի հանդիսի անդ. զկէս երկդրամենին, որ իցէ ըստ սրբութեան երկդրամենին. քսան դա՛նգ է երկդրամեանն. և կէս երկդրամենին եղիցի հա՛ս Տեառն:
¹⁴ Ամենայն որ անցանիցէ 'ի հանդիսի անդ՝ 'ի քսան ամենից և 'ի վեր՝ տացեն հա՛ս Տեառն.
¹⁵ մեծատունն՝ մի՛ յաւելցէ. և տնանկն՝ մի՛ պակասեցուսցէ
¹⁶ ’ի կիսոյ երկդրամենին 'ի տա՛լ անդ զհաս Տեառն յորդւոցն Իսրայէլի, առնել քաւութիւն՝ վասն անձանց ձերոց: Եւ առցես զարծաթ հասին յորդւոցն Իսրայէլի, և տացես զնա 'ի գո՛րծ խորանին վկայութեան. և եղիցի որդւոցն Իսրայէլի յիշատակ առաջի Տեառն, քաւե՛լ վասն անձանց նոցա: ՃԻԵ
¹⁷ Խօսեցաւ Տէր ընդ Մովսիսի՝ և ասէ.
¹⁸ Արա՛ աւազան պղնձի, և զխարիսխ նորա պղնձի առ 'ի լուանալոյ 'ի նմա: և դիցե՛ս զնա ընդ խորանն վկայութեան և ընդ սեղանն. և արկցես 'ի նա ջո՛ւր:
¹⁹ Եւ լուասցե՛ն Ահարոն և որդիք նորա 'ի նմանէ զձե՛ռս և զոտս իւրեանց,
²⁰ յորժամ մտանիցեն 'ի խորանն վկայութեան՝ լուասցին ջրով՝ և մի՛ մեռանիցին. կամ յորժամ մերձենայցեն 'ի սեղանն պաշտել, և հանել զողջակէզսն Տեառն, լուասցեն զձեռս և զոտս իւրեանց՝
²¹ զի մի՛ մեռանիցին: Եւ եղիցի նոցա օրէն յաւիտենական. նմա՛ և որդւոց նորա յետ նորա: ՃԻԶ
²² Խօսեցաւ Տէր ընդ Մովսիսի,
²³ և ասէ. Եւ դու ա՛ռ քեզ խունկս անուշունս. ծաղիկ ընտիր զմըռնենեաց հինգ հարիւր սիկղ. և կինամոմոն զանոյշ, զկէս այնորիկ երկերիւր և յիսուն. և զխունկեղէգն զանոյշ երկերիւր և յիսուն:
²⁴ և հիրիկ հինգ հարիւր սիկղ ըստ սրբութեանն. և ևղ ձիթենեաց հիմենեաւ միով:
²⁵ Եւ արասցես զայն ևղ յօծումն սրբութեան. ևղ եփեալ ըստ արուեստի իւղագործաց. ևղ յօծումն սրբութեան լինիցի:
²⁶ Եւ օծցե՛ս 'ի նմանէ զխորանն վկայութեան, և զտապանակ վկայութեանն.
²⁷ և զսեղանն և զամենայն զկահ նորա: և զաշտանակ և զամենայն զկահ նորա. և զսեղանն խնկոց.
²⁸ և զսեղանն ողջակիզաց, և զամենայն զկահ նորա. և զաւազանն, և զյատակս նորա:
²⁹ Եւ սրբեսցե՛ս զնոսա. և եղիցի սրբութիւն սրբութեանց. ամենայն որ մերձենայցէ 'ի նոսա՝ սրբեսցի՛:
³⁰ Եւ զԱհարոն և զորդիս նորա օծցե՛ս և սրբեսցե՛ս զնոսա ինձ 'ի քահանայութիւն:
³¹ Եւ ընդ որդիսն Իսրայէլի խօսեսցի՛ս և ասասցես. Եւղ յօծումն օծութեան սրբոյ եղիցի ձեզ յազգս ձեր:
³² ’Ի մարմին մարդոյ՝ ո՛չ օծանիցի. և ըստ ա՛յդմ հանդերձանի ո՛չ առնիցէք ձեզ այդպիսի, զի սո՛ւրբ է, և 'ի սրբութիւն եղիցի ձեզ:
³³ Որ ոք առնիցէ այդպիսի. և որ ոք տացէ՛ 'ի դմանէ այլազգւոյ, սատակեսցի՛ 'ի ժողովրդենէ իւրմէ: ՃԻԷ
³⁴ Եւ ասէ Տէր ցՄովսէս. Ա՛ռ դու քեզ խունկս անուշունս. ստաշխն, և եղունգն, և զքաղբա՛նն զանոյշ, և զկնդրուկն զերևելի. զի հասարակ առ հասարակ լինիցին:
³⁵ Եւ արասցե՛ս զայն խունկս եփեալս. գո՛րծ իւղագործաց հանդերձանի. գործ մաքո՛ւր 'ի սրբութիւն:
³⁶ Եւ աղայցե՛ս 'ի նոցանէ մանր. և դիցես 'ի նմանէ յանդիմա՛ն վկայութեանցն 'ի խորանին վկայութեան. ուստի երևեցա՛յց քեզ անտի. զի 'ի սրբութիւն սրբութեանց եղիցի ձեզ խո՛ւնկն այն զոր առնիցէք:
³⁷ Ըստ ա՛յնմ հանդերձանի մի՛ առնիցէք ձեզ խունկս. զի սրբութիւն Տեառն եղիցի ձեզ:
³⁸ Ա՛յր ոք որ առնիցէ ըստ ա՛յսմ օրինակի՝ առնուլ հո՛տ 'ի նմանէ, կորիցէ՛ 'ի ժողովրդենէ իւրմէ:

Գլուխ 31

¹ Խօսեցաւ Տէր ընդ Մովսիսի և ասէ.
² Ահաւադիկ յանուանէ՛ կոչեցեալ է իմ զԲեսէլիէլ զՈւրիեան, զորդի Ովրայ յազգէ Յուդայ:
³ Եւ լցուցի՛ց զնա աստուածեղէն Հոգւով իմաստութեան, և հանճարոյ և գիտութեան ամենայն գործոյ,
⁴ խելամո՛ւտ լինել, և ճարտարապետել: Գործել զոսկին և զարծաթ և զպղինձ.
⁵ զկապուտակն, և զծիրանին, և զկարմիրն մանեալ. և զականակապն 'ի լրութիւն գործոյն. և զհիւսնութիւն փայտից, գործել ըստ ամենայն գործոյ:
⁶ Եւ ես ահա ետու զնա, և զԵղիաբ զԱքիսամայ յազգէ Դանայ. և 'ի սիրտ ամենայն իմաստնոյ ետու զիմաստութիւն, և արասցե՛ն զամենայն զոր միանգամ պատուիրեցի քեզ:
⁷ Զխորանն վկայութեան. և զտապանակ կտակարանացն. և զքաւութիւնն որ 'ի վերայ նորա. և զամենայն զսպաս խորանին. և զզոհանոցսն.
⁸ և զսեղանն և զամենայն զկահ նորա. և զաշտանակն սուրբ և զամենայն զկահ նորա. և զսեղան խնկոցն.
⁹ և զսեղան ողջակիզացն և զամենայն զկահ նորա. և զաւազանն և զխարիսխ նորա.
¹⁰ և զպատմուճանս պաշտամանն. և զհանդերձս սրբութեանն զԱհարոնի քահանայի. և զպատմուճանս որդւոց նորա 'ի քահանայանալ ինձ.
¹¹ և զևղն օծութեան և զխունկս հանդերձանաց սրբութեանն: Եւ զամենայն զոր միանգամ պատուիրեցի քեզ՝ արասցե՛ս: ՃԻԹ
¹² Խօսեցաւ Տէր ընդ Մովսիսի և ասէ.
¹³ Եւ դու խօսեա՛ց ընդ որդիսն Իսրայէլի՝ և ասասցես. Զգո՛յշ կացէք պահելոյ զշաբաթս իմ. զի նշանա՛կ է ընդ իս և ընդ ձեզ յազգս ձեր. զի ծանիջիք թէ ե՛ս եմ Տէր որ սրբե՛մ զձեզ.
¹⁴ և պահեսջի՛ք զշաբաթս, զի սրբութիւն է այն Տեառն, և ձեզ: Որ պղծեսցէ զնա՝ մահո՛ւ մեռցի. ամենայն որ գործիցէ 'ի նմա գործ, սատակեսցի՛ անձնն այն 'ի միջոյ ժողովրդեան իւրոյ:
¹⁵ Զվե՛ց օր գործեսցես գործ. և յաւուրն եւթներորդի շաբա՛թ հանգստեան սրբութիւն Տեառն. ամենայն որ գործեսցէ գործ յաւուր շաբաթու՝ մահո՛ւ մեռցի:
¹⁶ Եւ պահեսցե՛ն որդիքն Իսրայէլի զշաբաթս, առնել զնոսա յազգս ձեր. ո՛ւխտ յաւիտենական
¹⁷ ընդ իս և ընդ որդիսն Իսրայէլի: Նշանա՛կ իմ է յաւիտենական. զի զվեց օր արա՛ր Աստուած զերկինս և զերկիր, և յաւուրն եւթներորդի դադարեա՛ց և հանգեաւ: ՃԼ
¹⁸ Եւ ե՛տ Մովսիսի՝ իբրև դադարեաց ինքն 'ի խօսից իւրոց 'ի լերինն Սինա, զերկո՛ւս տախտակսն վկայութեան, տախտա՛կս քարեղէնս գրեա՛լս մատամբն Աստուծոյ:

Գլուխ 32

¹ Եւ տեսեալ ժողովրդեանն՝ թէ յամեա՛ց Մովսէս իջանել 'ի լեռնէ անտի. կուտեցա՛ւ ժողովուրդն 'ի վերայ Ահարոնի՝ և ասեն ցնա. Արի՛ և արա՛ մեզ աստուա՛ծս՝ որ առաջնորդեսցեն մեզ. զի այրն այն Մովսէս որ եհա՛ն զմեզ յԵգիպտոսէ, ո՛չ գիտեմք զի՞ եղև նմա:
² Եւ ասէ ցնոսա Ահարոն. Կողոպտեցէ՛ք զգինդս ոսկիս յակընջաց կանանց ձերոց, և ուստերաց և դստերաց ձերաց, և բերէ՛ք առ իս:
³ Եւ կողոպտեաց ամենայն ժողովուրդն զգինդս ոսկիս յակընջաց կանանց իւրեանց, և բերին առ Ահարոն:
⁴ Եւ ընկալաւ 'ի ձեռաց նոցա: և ձուլեա՛ց զայն քանդակագործով, և արար ո՛րթ ձուլածոյ: Եւ ասեն. Ա՛յս են աստուածք քո Իսրայէլ, որ հանին զքեզ յերկրէն Եգիպտացւոց:
⁵ Եւ իբրև ետես Ահարոն՝ շինեաց սեղան առաջի նորա: Եւ քարո՛զ կարդաց Ահարոն՝ և ասէ. Տօն Տեառն առ վաղիւ:
⁶ Եւ կանխեալ 'ի վաղիւ անդր եհա՛ն ողջակէզս, և մատոյց զո՛հս փրկութեան. Եւ նստաւ ժողովուրդն յուտել և յըմպել, և յարեան 'ի խաղալ: ՃԼԲ
⁷ Եւ խօսեցաւ Տէր ընդ Մովսիսի՝ և ասէ. Գնա՛ է՛ջ դու աստի վաղվաղակի, զի անօրինեցա՛ւ ժողովուրդն քո՝ զոր հաներ յերկրէն Եգիպտացւոց.
⁸ անցի՛ն վաղվաղակի զճանապարհաւն՝ զոր պատուիրեցեր նոցա. արարին իւրեանց ո՛րթ ձուլածոյ, և երկի՛ր պագին նմա, և զոհեցին նմա և ասեն. Ա՛յս են աստուածք քո Իսրայէլ, որ հանին զքեզ յԵգիպտոսէ: ՃԼԳ
⁹ Եւ ասէ Տէր ցՄովսէս. Տեսի՛ զժողովուրդն զայն, և ահա ժողովուրդ խստապարանո՛ց է:
¹⁰ Եւ արդ՝ թո՛յլ տուր ինձ, և բարկացեալ սրտմտութեամբ իմով 'ի նոսա սատակեցից զնոսա. և արարից զքեզ յազգ մեծ:
¹¹ Եւ աղաչեաց Մովսէս առաջի Տեառն Աստուծոյ իւրոյ՝ և ասէ. Ընդէ՞ր Տէր բարկանաս սրտմտութեամբ քով ժողովրդեան քում, զոր հաներ յերկրէն Եգիպտացւոց զօրութեամբ մեծաւ և բարձր բազկաւ:
¹² Գուցէ՛ խօսիցին Եգիպտացիքն՝ ուստի հանե՛րն զմեզ. և ասիցեն. Առ չարութեան եհան զնոսա, կոտորել զնոսա 'ի լերինն, և ջնջել զնոսա յերկրէ: Դադարեա՛ 'ի բարկութենէ սրտմտութեան քոյ, և ցածի՛ր 'ի չարեաց ժողովրդեան քոյ:
¹³ Յիշեա՛ դու զԱբրաամ և զԻսահակ և զՅակոբ զծառայս քո. որոց երդուա՛ր յանձն քո, խօսեցա՛ր ընդ նոսա և ասես. և առաւե՛լ բազմացուցից զզաւակ ձեր, իբրև զաստեղս երկնից բազմութեամբ: և զամենայն երկիրն զոր ասացեր տալ զաւակի նոցա, կալցի՛ն զնա յաւիտեան:
¹⁴ Եւ ցածեաւ Տէր 'ի չարեացն, զոր ասաց առնել ժողովրդեանն իւրում: ՃԼԴ
¹⁵ Եւ դարձաւ Մովսէս՝ էջ 'ի լեռնէ անտի, և երկու տախտակքն վկայութեան 'ի ձեռս նորա: տախտակք քարեղէնք, գրեալք յերկուց կողմանց աստի և անտի գրեալք:
¹⁶ Եւ տախտակքն՝ գո՛րծ Աստուծոյ էին. և գիրն՝ Գի՛ր Աստուծոյ դրոշմեալ 'ի տախտակսն:
¹⁷ Եւ լուեալ Յեսուայ զձայն ժողովրդեանն աղաղակելոյ, ասէ ցՄովսէս. Ձա՛յն պատերազմի է 'ի բանակին:
¹⁸ Եւ ասէ Մովսէս. Ո՛չ է ձայն նահատակա՛ց զօրութեան, և ո՛չ է բարբառ նահատակաց քաջութեան. այլ ձայն յանզգայելոց 'ի գինւոյ լսեմ ես:
¹⁹ Եւ իբրև մերձեցաւ 'ի բանա՛կ անդր, և ետես զորթն և զպարաւորսն, բարկացաւ սրտմտութեամբ Մովսէս. ընկէ՛ց 'ի ձեռաց իւրոց զտախտակսն երկոսին, և խորտակեա՛ց զնոսա առ ստորոտով լերինն: ՃԼԵ
²⁰ Եւ առեա՛լ զորթն զոր արարին՝ այրեա՛ց հրով. և խարտեաց զնա մա՛նր, և ցանեա՛ց 'ի վերայ ջրոցն և արբո՛յց որդւոցն Իսրայէլի: ՃԼԶ
²¹ Եւ ասէ Մովսէս ցԱհարոն. Զի՞նչ արար քեզ ժողովուրդդ, զի ածեր 'ի վերայ դոցա զանհնարին զմեղսդ:
²² Եւ ասէ Ահարոն ցՄովսէս. Մի՛ բարկանար սրտմտութեամբ՝ տէ՛ր իմ. զի դու ինքնի՛ն գիտես զյանդգնութիւն ժողովրդեանդ.
²³ զի ասացին թէ արա՛ մեզ աստուածս որ առաջնորդեսցեն մեզ. զի այրն այն Մովսէս՝ որ եհան զմեզ յԵգիպտոսէ, ո՛չ գիտեմք զի՞ եղև նմա:
²⁴ Եւ ասե՛մ ցնոսա. Եթէ իցէ ուրուք ոսկի, կողոպտեցէ՛ք և բերէ՛ք առ իս: Եւ ետուն ցիս, և ընկեցի զայն 'ի հուր, և ել ո՛րթդ այդ: ՃԼԷ
²⁵ Եւ ետես Մովսէս եթէ յանցեա՛ւ ժողովուրդն. քանզի յանցոյց զնոսա Ահարոն յոտնահարութիւն թշնամեաց իւրեանց:
²⁶ Եւ եկաց Մովսէս առ դրան բանակին՝ և ասէ. Որ ոք Տեառն իցէ՝ առի՛ս մատիցէ: Հասանէին առ նա ամենայն որդիքն Ղևեայ:
²⁷ Եւ ասէ ցնոսա. Ա՛յսպէս ասէ Տէր Աստուած Իսրայէլի. Դի՛ք իւրաքանչիւր զսուր իւր յազդեր իւրում. անցէ՛ք և այսրէ՛ն դարձարուք դրանէ 'ի դուռն բանակիդ. և կոտորեցէ՛ք իւրաքանչիւր զեղբայր՝ և իւրաքանչիւր զընկեր իւր, և իւրաքանչիւր զմերձաւո՛ր իւր:
²⁸ Եւ արարին որդիքն Ղևեայ որպէս և ասաց Մովսէս: և անկան 'ի ժողովրդենէ անտի յաւո՛ւր յայնմիկ, ոգիք իբրև երեք հազարք այր:
²⁹ Եւ ասէ ցնոսա Մովսէս. Լցէ՛ք զձեռս ձեր այսօր Տեառն, և իւրաքանչիւր յորդի իւր, և իւրաքանչիւր յեղբայր իւր, տա՛լ 'ի վերայ ձեր այսօր օրհնութիւն: ՃԼԸ
³⁰ Եւ եղև 'ի վաղիւ անդր, ասէ Մովսէս ցժողովուրդն. Դուք մեղա՛յք զմեղսդ զայդ զմեծ, բայց ես արդ՝ ելի՛ց առ Աստուած, զի ցածուցից վասն մեղաց ձերոց:
³¹ Դարձաւ Մովսէս անդրէն առ Տէր և ասէ. Աղաչե՛մ զքեզ Տէր. մեղա՛ւ ժողովուրդն այն մե՛ղս անհնարինս. և արարին իւրեանց աստուածս ոսկեղէնս: արդ՝ եթէ թողուս նոցա զմեղս իւրեանց՝ թո՛ղ.
³² ապա թէ ոչ՝ ջնջեա՛ և զիս 'ի դպրութենէ քումմէ յոր գրեցեր: ՃԼԹ
³³ Եւ ասէ Տէր ցՄովսէս. Եթէ ոք մեղաւ առաջի իմ, ջնջեցից զնա 'ի դպրութենէ իմմէ:
³⁴ Բայց արդ՝ ե՛րթ է՛ջ և առաջնորդեա՛ ժողովրդեանն այնմիկ 'ի տեղին՝ յոր ասացի քեզ: Եւ ահա հրեշտակ իմ երթիցէ առաջի երեսաց քոց: բայց յաւուր յորում ա՛յց արարից, ածի՛ց 'ի վերայ նոցա զմեղս իւրեանց:
³⁵ Եւ եհար Տէր զժողովուրդն վասն առնելոյ նոցա զորթն՝ զոր արար Ահարոն:

Գլուխ 33

¹ Եւ ասէ Տէր ցՄովսէս. Ե՛րթ ե՛լ աստի, դու և ժողովուրդն քո զոր հաներ յերկրէն Եգիպտացւոց, յերկիրն զոր երդուայ Աբրաամու՝ և Սահակայ՝ և Յակոբայ. ասեմ. Զաւակի՛ ձերում տաց զնա:
² Եւ առաքեցից առաջի երեսաց քոց զհրեշտակ իմ. և մերժեսցէ՛ զՔանանացին, և զԱմովրհացին, և զՔետացին, և զՓերեզացին, և զԳերգեսացին, և զԽևացին, և զՅեբուսացին,
³ և տարցի՛ զքեզ յերկիրն որ բղխէ զկաթն և զմեղր: Բայց ես ո՛չ ելից ընդ ձեզ, վասն խստապարանո՛ց լինելոյ ժողովրդեանդ. զի մի՛ սատակիցե՛մ զքեզ 'ի ճանապարհի:
⁴ Եւ լուեալ ժողովրդեանն զբա՛նն զայն չար, սո՛ւգ առին սգաւորք և ո՛չ ա՛ռ այր զզարդ զանձամբ:
⁵ Եւ ասէ Տէր ցՄովսէս. Ասա՛ դու ցորդիսն Իսրայէլի. Դուք ժողովուրդ խստապարանոց էք. զգո՛յշ լերուք գուցէ և ա՛յլ ևս հարուած ածիցեմ 'ի վերայ ձեր, և սատակիցե՛մ զձեզ: և արդ՝ մերկացարո՞ւք զպատմուճանս փառաց ձերոց, և զզարդ քո 'ի քէն. և ցուցի՛ց զինչ առնիցեմ քեզ:
⁶ Եւ մերկացան որդիքն Իսրայէլի զզարդ իւրեանց, և զպատմուճանս իւրեանց 'ի Քորէբ լերին: ՃԽԱ
⁷ Եւ առեալ Մովսիսի զխորան իւր՝ եհար արտաքո՛յ բանակին, մեկուսի՛ 'ի բանակէ անտի. և կոչեցաւ այն՝ Խորա՛ն վկայութեան: Եւ լինէր ամենայն ոք որ խնդրէ՛ր ինչ 'ի Տեառնէ, ելանէր 'ի խորանն վկայութեան արտաքոյ բանակին:
⁸ Եւ յորժամ երթա՛յր Մովսէս 'ի խորանն՝ կայր ամենայն ժողովուրդն դէտակնկալեալ իւրաքանչիւր ուրուք առ դուրս խորանի իւրոյ: հայէին ընդ Մովսէս մինչ երթայր մտանէր 'ի խորանն:
⁹ Եւ յորժամ մտանէ՛ր Մովսէս 'ի խորանն, իջանէր սի՛ւն ամպոյն և կայր առ դուրս խորանին, և խօսէր Տէր ընդ Մովսիսի:
¹⁰ Եւ տեսանէր ամենայն ժողովուրդն զսի՛ւն ամպոյն որ կայր առ դուրս խորանին. և կայի՛ն ամենայն ժողովուրդն յոտն, և երկի՛ր պագանէին իւրաքանչիւր առ դուրս խորանի իւրոյ:
¹¹ Եւ խօսէ՛ր Տէր ընդ Մովսիսի դէ՛մ յանդիման. որպէս ոք զի խօսիցի ընդ բարեկամի իւրում. և դառնայր 'ի բանակ անդր: Բայց պաշտօնեայ նորա Յեսու որդի Նաւեայ ո՛չ ելանէր 'ի խորանէ անտի: ՃԽԲ
¹² Եւ ասէ Մովսէս ցՏէր. Ահա ասե՛ս ցիս. Հա՛ն զժողովուրդդ զայդ. և դու ո՛չ ցուցեր ինձ զո՞ առաքիցես ընդ իս: և դու՝ ցի՛ս ասացեր՝ թէ Ճանաչե՛մ զքեզ քան զամենեսին, և ունիս շնո՛րհս յինէն:
¹³ Արդ՝ եթէ գտի շնորհս առաջի քո՝ ցո՛յց ինձ զանձն քո յայտնապէս, զի գիտացից՝ թէ ի՞ւ գտեալ է իմ շնորհս առաջի քո. և զի ծանեա՛յց թէ ժողովուրդս քո այս՝ յա՛զգ մեծ լինիցի:
¹⁴ Եւ ասէ. Ե՛ս ինքնին երթայց առաջի քո, և զետեղեցի՛ց զքեզ:
¹⁵ Եւ ասէ ցնա. Եթէ ո՛չ դու ինքնին երթայցես ընդ մեզ, մի՛ հաներ զմեզ աստի:
¹⁶ Եւ զիա՞րդ յայտ լինիցի, եթէ արդարև գտի շնորհս առաջի քո, և ե՛ս ե՛ւ ժողովուրդս քո: այլ յերթալն քո ընդ մեզ՝ փառաւորեսցուք, և ե՛ս և ժողովուրդս քո, քան զամենայն ազգս որ իցեն 'ի վերայ երկրի:
¹⁷ Եւ ասէ Տէր ցՄովսէս. Եւ զա՛յդ ևս զքո բան զոր ասացեր՝ արարի՛ց. քանզի գտե՛ր շնորհս առաջի իմ. և ճանաչեմ զքեզ քան զամենեսեան:
¹⁸ Եւ ասէ. Ցո՛յց ինձ զփառս քո:
¹⁹ Եւ ասէ. Ե՛ս անցից առաջի քո փառօք իմովք. և կոչեցից յանուն Տեառն առաջի քո. և ողորմեցա՛յց որում ողորմեցայց, և գթացա՛յց յորս գթացայց:
²⁰ Եւ ասէ. Ո՛չ կարես տեսանել զերե՛սս իմ. զի ո՛չ տեսանէ մարդ զերեսս իմ, և ապրի:
²¹ Եւ ասէ Տէր. Ահա՛ տեղի մի առաջի իմ. և կացցե՛ս 'ի վերայ վիմին.
²² յորժամ անցանիցեն փառքն իմ. և եդից զքեզ 'ի ծե՛րպ վիմին. և ծածկեցի՛ց զքեզ ձեռամբ իմով մինչև անցի՛ց ես:
²³ Եւ բարձի՛ց զձեռն իմ 'ի քէն, և ապա տեսցես զյետո՛յսն իմ. բայց երե՛սք իմ քեզ մի՛ երևեսցին:

Գլուխ 34

¹ Եւ ասէ Տէր ցՄովսէս. Կոփեա՛ դու քեզ երկո՛ւս տախտակս քարեղէնս ըստ առաջին տախտակացն, և ե՛լ առ իս 'ի լեառնն. և գրեցի՛ց 'ի վերայ տախտակացն զպատգամսն՝ որ էին յառաջին տախտակսն զոր խորտակեցերն:
² Լե՛ր պատրաստ առ վաղիւ, և ելանիցե՛ս ընդ առաւօտս 'ի լեառնն Սինա. և մնասցե՛ս ինձ անդ 'ի վերայ գլխոյ լերինն:
³ Եւ մի՛ ոք ելանիցէ ընդ քեզ, և մի՛ ոք երևեսցի ամենևին 'ի լերինն. և արջա՛ռ և ոչխար՝ մի՛ արածեսցին մօտ 'ի լեառնն:
⁴ Եւ կոփեա՛ց երկուս տախտակս քարեղէնս, ըստ օրինակի առաջին տախտակացն. և կանխեալ Մովսիսի ընդ առաւօտն՝ ել 'ի լեառնն Սինա, որպէս հրամայեաց նմա Տէր: և ա՛ռ Մովսէս ընդ իւր զերկուս տախտակսն քարեղէնս:
⁵ Եւ էջ Տէր ամպով, և կա՛յր յանդիման նորա անդ: և կոչեա՛ց յանուն Տեառն:
⁶ Եւ անց Տէր առաջի նորա: և կարդաց Տէր Աստուած՝ գթա՛ծ և ողորմած, երկայնամի՛տ, բազումողո՛րմ և ճշմարիտ:
⁷ Որ պահէ՛ զարդարութիւն, և առնէ զողորմութիւն 'ի հազար ազգս: բառնա՛յ զանօրէնութիւնս և զանիրաւութիւնս և զմեղս. և ո՛չ անպա՛րտ առնէ զպարտաւորն. ածէ՛ զանիրաւութիւնս հարց՝ որդւոց և յորդիս որդւոց՝ մինչև յերիս և 'ի չորս ազգս:
⁸ Եւ երագեաց Մովսէս խոնարհ երկի՛ր եպագ,
⁹ և ասէ. Եթէ գտի շնորհս առաջի քո Տէր երթիցէ՛ ընդ մեզ Տէր. զի ժողովուրդս խստապարանո՛ց է. և բարձցե՛ս դու զանօրէնութիւնս և զմեղս մեր. և եղիցուք մեք քո՛: ՃԽԴ
¹⁰ Եւ ասէ Տէր ցՄովսէս. Ահա ե՛ս դնեմ ընդ քեզ ուխտ առաջի ամենայն ժողովրդեան քոյ. և արարից սքանչելի՛ս որ ո՛չ եղեն յամենայն երկրի, և յամենայն ազգս. և տեսցէ՛ ամենայն ժողովուրդդ՝ յորս ե՛ս դու 'ի մէջ դոցա զգործս Տեառն. զի զարմանալի՛ք իցեն զոր ե՛սս արարից ձեզ:
¹¹ Զգո՛յշ լեր դու ամենայնի, զոր միանգամ պատուիրեցի քեզ այսօր: ահաւասիկ ես մերժե՛մ յերեսաց ձերոց զԱմովրհացին, և զՔանանացին, և զՔետացին, և զՓերեզացին, և զԽևացին, և զԳերգեսացին, և զՅեբուսացին:
¹² Զգո՛յշ լեր անձին քում, գուցէ՛ դնիցես ուխտ ընդ բնակիչս երկրին, յորում դու մտանելոց ես 'ի նոսա. գուցէ լինիցի ձեզ գայթագղութիւն:
¹³ Զբագինս նոցա կործանեսջի՛ք, և զարձանս նոցա՝ փշրեսջի՛ք, և զանտառս նոցա՝ կոտորեսջի՛ք, և զդրօշեալս դից նոցա՝ հրո՛վ այրեսջիք:
¹⁴ Եւ մի՛ պագանիցէք երկիր աստուածոց օտարաց. զի Տէր Աստուածդ անուն նախանձելի՛ է. Աստուած նախանձո՛տ է:
¹⁵ Գուցէ՛ դնիցեն ուխտ ընդ բնակիչս երկրին, և պոռնկիցին զկնի դից նոցա, և զոհիցեն աստուածոց նոցա. և կոչիցեն զքեզ՝ և ուտիցես 'ի զոհից նոցա:
¹⁶ Եւ առնուցուս 'ի դստերաց նոցա ուստերաց քոց. և 'ի դստերաց քոց՝ տացես ուստերաց նոցա. և պոռնկիցին դստերք քո զկնի նոցա, և պոռնկեցուցանիցեն զուստերս քո զկնի դի՛ցն իւրեանց:
¹⁷ Եւ աստուածս ձուլածոյս՝ մի՛ առնիցես քեզ: ՃԽԵ
¹⁸ Զտօ՛ն բաղարջակերաց պահեսցես. զեւթն օր բաղա՛րջ կերիցես որպէս պատուիրեցի քեզ, 'ի ժամանակի իւրում յամսեա՛նն կանխոց. զի յամսեանն կանխոց ելեր յԵգիպտոսէ: ՃԽԶ
¹⁹ Ամենայն արու որ բանայ զարգանդ՝ ի՛նձ լիցի, և ամենայն արուք անասնոյ քոյ,
²⁰ անդրանիկն արջառոյ, և անդրանիկն ոչխարի: և զանդրանիկն իշոյ՝ փրկեսցես գառամբ. ապա թէ ո՛չ փրկեսցես զնա՝ զգի՛նս նորա տայցես: Զամենայն անդրանիկս որդւոց քոց փրկեսցե՛ս: Եւ ձեռնունա՛յն առաջի իմ՝ մի՛ երևեսցիս: ՃԽԷ
²¹ Զվե՛ց օր գործեսցես. և յաւուրն եւթներորդի հանգիցե՛ս. և 'ի սերմանս և 'ի հունձս՝ հանգիցե՛ս:
²² Եւ տօ՛ն եւթներորդաց արասցես ինձ, իսկզբանէ՛ հնձոց ցորենոյ: և զտօն արմտեաց ամփոփելոյ՝ յընդմիջե՛լ տարւոյն:
²³ Երի՛ս ժամանակս 'ի տարւոջ երևեսցի ամենայն արու մանուկ քո առաջի Տեառն Աստուծոյ Իսրայէլի:
²⁴ Քանզի մերժեցի՛ց զազգսն յերեսաց քոց. և ընդարձակեցից զսահմանս քո, և ո՛չոք իցէ որ ա՛կն դնիցէ երկրին քում, յորժամ ելանիցես երևել առաջի Տեառն Աստուծոյ քոյ յերիս ժամանակս 'ի տարւոջն: ՃԽԸ
²⁵ Մի՛ զենուցուս 'ի վերայ խմորելոյ զարիւն զոհից իմոց. և մի՛ ելանիցէ յայգ զենո՛ւմն տօնի զատկի: ՃԽԹ
²⁶ Զառաջին արմտիս երկրի քոյ՝ տարցի՛ս 'ի տուն Տեառն Աստուծոյ քոյ: ՃԾ Մի՛ եփեսցես զգառն 'ի կաթն մօր իւրոյ: ՃԾԱ
²⁷ Եւ ասէ Տէր ցՄովսէս. Գրեա՛ դու քեզ զպատգամսդ զայդոսիկ. զի այդո՛ւ բանիւ դնիցեմ ուխտ ընդ քեզ՝ և ընդ իս Իսրայէլ:
²⁸ Եւ էր Մովսէս առաջի Տեառն զքառասուն տիւ և զքառասուն գիշեր. հաց ո՛չ եկեր, և ջուր ո՛չ արբ. և գրեաց 'ի վերայ տախտակացն զբանս ուխտի՝ զտասն պատգամացն: ՃԾԲ
²⁹ Մինչդեռ իջանէր Մովսէս 'ի լեռնէն Սինայ, և երկոքին տախտակքն ուխտի 'ի ձեռս Մովսիսի էին: և յիջանել իւրում 'ի լեռնէ անտի, ո՛չ գիտէր Մովսէս եթէ փառաւորեալ իցէ տեսիլ գունոյ երեսաց նորա 'ի խօսել նորա ընդ նմա:
³⁰ Եւ ետես Ահարոն և ամենայն որդիքն Իսրայէլի զՄովսէս. և էր փառաւորեալ տեսիլ գունոյ երեսաց նորա. և երկեան մերձենալ 'ի նա:
³¹ Եւ կոչեաց զնոսա Մովսէս. և դարձան առ նա Ահարոն և ամենայն իշխանք ժողովրդեանն. և խօսեցաւ Մովսէս ընդ նոսա:
³² Եւ ապա մերձեցան առ նա ամենայն որդիքն Իսրայէլի: և պատմեաց նոցա զամենայն զոր խօսեցաւ ընդ նմա Տէր 'ի լերինն Սինայ:
³³ Եւ իբրև դադարեաց 'ի խօսելոյ անտի ընդ նոսա. արկ պատրուակ զերեսօք իւրովք:
³⁴ Իբրև մտանէր Մովսէս առաջի Տեառն խօսել ընդ նմա, մերկանա՛յր զպատրուակն մինչև այսրէն ելանելոյ: և իբրև ելանէր՝ խօսէր ընդ ամենայն որդիսն Իսրայէլի զոր միանգամ պատուիրեաց նմա Տէր:
³⁵ Եւ տեսանէին որդիքն Իսրայէլի զերեսն Մովսիսի զի փառաւորեալ էր տեսիլ գունոյ երեսաց նորա. և արկանէր Մովսէս պատրուակ 'ի վերայ երեսաց իւրոց, մինչև անդրէն մտանելոյ և խօսելոյ ընդ նմա:

Գլուխ 35

¹ Եւ ժողովեաց Մովսէս զամենայն ժողովուրդ որդւոցն Իսրայէլի՝ և ասէ ցնոսա. Ա՛յս բանք են զոր ասաց Տէր առնել զնոսա:
² Զվեց օր գործեսցե՛ս զգործ. յաւուրն եւթներորդի հանգիցե՛ս. շաբաթ սո՛ւրբ է, հանգիստ Տեառն: ամենայն որ գործեսցէ 'ի նմա, սատակեսցի՛:
³ Մի՛ լուցցի հուր յամենայն բնակութեան ձերում յաւուր շաբաթուց. զի ե՛ս եմ Տէր:
⁴ Եւ խօսեցաւ Մովսէս ընդ ամենայն ժողովրդեան որդւոցն Իսրայէլի՝ և ասէ. Ա՛յս պատգամ է՝ զոր պատուիրեաց Տէր՝ և ասէ.
⁵ Առէ՛ք 'ի ձէնջ հա՛ս Տեառն. ամենայն ոք զիարդ և յօժարեսցէ 'ի սրտի իւրում, բերցէ պտուղ Տեառն: ոսկի. արծաթ. պղինձ, և կապուտակ.
⁶ և ծիրանի. և կարմիր կրկին մանեալ. և բեհեզ նիւթեալ. և մազ այծեաց:
⁷ և մորթս խոյոց կարմիր ներկեալ. և մորթս կապուտակեալս, և փայտս անփուտս:
⁸ և ևղ լուսոյ. և խունկս իւղոյ օծման. և խունկս հանդերձանաց:
⁹ Եւ ականս սարդիոնս և ականս զմրուխտս և ականս 'ի գիր վակասին. և զպճղնաւորն:
¹⁰ Եւ ամենայն որ իմաստուն իցէ սրտիւ 'ի ձեզ, եկեալ գործեսցէ՛ զամենայն ինչ՝ զոր պատուիրեաց Տէր:
¹¹ Զխորանն, և զնուարտանս իւր, և զվիժակս նորա, և զգահաւորակս նորա, և զտախտակս նորա. և զպարզունակս նորա, և զսիւնակս նորա, և զխարիսխս նորա:
¹² Եւ զտապանակն վկայութեան, և զլծակս նորա, և զքաւութիւնն, և զվարագոյրն, և զառագաստ սրահին, և զսիւնակս նորա, և զականսն զըմրուխտս, և զխունկսն, և զևղն օծման:
¹³ Եւ զսեղանն, և զամենայն զկահ նորա, և զհովանոցս սեղանոյն, և զլծակս նորա, և զամենայն զկահ նորա: և զհացն երեսաց:
¹⁴ և զաշտանակն լուսոյ, և զամենայն զկահ նորա, և զճրագարանս նորա, և զևղն լուսոյ:
¹⁵ Եւ զսեղանն խնկոց, և զլծակս նորա, և զևղն օծութեան, և զխունկսն հանդերձանաց, և զվարագոյր դրան խորանին:
¹⁶ և զսեղանն ողջակիզաց, և զվանդակս նորա զպղնձիս, զլծակս նորա, և զամենայն զկահ նորա: Եւ զաւազանն, և զխարիսխս նորա,
¹⁷ և զառագաստ սրահին, և զսիւնակս նորա, և զխարիսխս նորա:
¹⁸ Եւ զսրահակ դրան սրահին, և զցիցս խորանին, և զցիցս սրահին, և զապարումս նոցա:
¹⁹ և զպատմուճանսն որովք պաշտիցեն 'ի սրբութեանն. և զպատմուճանսն սուրբս՝ Ահարոնի քահանայի. և զպատմուճանս քահանայութեան որդւոցն Ահարոնի: ՃԾԴ
²⁰ Եւ ել ամենայն ժողովուրդ որդւոցն Իսրայէլի առ 'ի Մովսիսէ:
²¹ Եւ բերին իւրաքանչիւր որպէս և յօժարէին սիրտք իւրեանց. և որոց զիարդ և կա՛մ եղև անձանց իւրեանց. բերէին նուէրս Տեառն յամենայն գործս՝ խորանին վկայութեան. և յամենայն նիւթս նորա. և յամենայն պատմուճանս սրբութեանցն:
²² Եւ բերին ա՛րք 'ի կանանց, ամենայն ոք որպէս և միտք իւր վարէին. Ականս, և գինդս, և մատանիս, և ծամակալս, և կշտապանակս, և զամենայն անօթս ոսկեղէնս. և ամենայն արք որ և էին, բերին նուէրս ոսկւոյ Տեառն:
²³ Եւ ամենայն այր առ որում գտանէր կապուտակ, և ծիրանի, և կարմիր մանեալ, և բեհեզ. և մազ այծեաց. և մորթս խոյոց կարմիր ներկեալ. և մորթս կապուտակեալս:
²⁴ բերէին ամենայն, որ նուիրէր նուէրս: արծաթ և պղինձ բերէին զնուէրսն Տեառն. և ամենայն առ որում գտանէր փա՛յտ անփուտ՝ յամենայն գործ կահին, բերէին:
²⁵ Եւ ամենայն կին՝ իմաստուն մտօք նիւթէր ձեռօք իւրովք. և բերէ՛ր մանեալ՝ զկապուտակն, և զծիրանի, և զկարմիրն ներկեալ, և զբեհեզն:
²⁶ Եւ ամենայն կանայք որ յօժարէին 'ի միտս իւրեանց, մանէին իմաստութեամբ զմազ այծեացն:
²⁷ Եւ իշխանքն բերէին ականս զըմրուխտս. և ականս 'ի նիւթ վակասին և տախտակին.
²⁸ և զհանդերձանս խնկոցն. և զևղն լուսոյ, և զևղն օծութեան:
²⁹ Եւ ամենայն այր և կին, որոց յօժարէին միտք իւրեանց, մտանէին գործել զամենայն գործն՝ զոր պատուիրեա՛ց Տէր գործել: և 'ի ձեռն Մովսիսի բերէին որդիքն Իսրայէլի զնուէրսն Տեառն:
³⁰ Եւ ասէ Մովսէս ցորդիսն Իսրայէլի. Տեսէ՛ք՝ զի կոչեաց Աստուած յանուանէ զԲեսելիէլ զՈւրիեան՝ զորդի Ովրայ յազգէ Յուդայ.
³¹ և ելի՛ց զնա աստուածեղէն Հոգւով իմաստութեան, և հանճարով և գիտութեամբ յամենայնի:
³² ըստ ամենայն գործոյ ճարտարապետել ճարտարութեամբ. գործել զոսկին և զարծաթն՝ և զպղինձ:
³³ Եւ քանդակել զականսն, և գործել զփայտն, և առնել զամենայն գործ իմաստութեան, և խելամտել. զի ե՛տ 'ի սիրտ նորա զիմաստութիւն:
³⁴ Եւ Եղիաբայ որդւոյ Աքիսամայ յազգէ Դանայ:
³⁵ զորս ելի՛ց մտօք իմաստութեան, խելամտել, գործել զամենայն գործ սրբութեանն. զոստայնանկութիւն, և զնկարու, կապուտակաւն, և ծիրանեաւն, և կարմրովն ներկելով, և բեհեզով. անկանել գործել զամենայն գործ ճարտարութեան նկարակերտաց:

Գլուխ 36

¹ Եւ արարին Բեսելիէլ, և Եղիաբ, և ամենայն այր իմաստուն մտօք, որում տուաւ 'ի Տեառնէ իմաստութիւն և գիտութիւն, խելամուտ լինել, գործել զամենայն գործ տարազու սրբութեանն. ըստ ամենայնի որպէս և հրամայեաց Տէր:
² Եւ կոչեաց Մովսէս զԲեսելիէլ և զԵղիաբ, և զամենեսին որ ունէին իմաստութիւն 'ի սրտի. որոց ետ Աստուած հանճար 'ի սիրտս նոցա: Եւ զամենեսին որ կամակար մտօք կամէին մերձենալ 'ի գործն, և կատարել:
³ Եւ առին 'ի Մովսիսէ զամենայն նուէրսն՝ զոր բերին որդիքն Իսրայէլի յամենայն գործ տարազու սրբութեանն առնել զայն: և ինքեանք ևս ընդունէին զնուէրսն 'ի նուիրաբերացն ընդ առաւօտս առաւօտս:
⁴ Եւ գայի՛ն ամենայն իմաստունք՝ որ գործէին զգործ սրբութեանն, իւրաքանչիւր ըստ տարազո՛ւ իւրում, զոր ինքեանք գործէին:
⁵ Խօսեցան ընդ Մովսիսի և ասեն. Կարի՛ յաճախէ բերել ժողովուրդդ քան զբաւական տարազու պիտոյից գործոյն, զոր հրամայեաց Աստուած առնել:
⁶ Եւ հրամայեաց Մովսէս քարո՛զ կարդալ 'ի բանակին, և ասել. Ա՛յր կամ կին՝ մի՛ ևս գործեսցեն 'ի պտուղ սրբութեանն: և ապա արգելաւ ժողովուրդն 'ի բերելոյ.
⁷ և զգործեալն իւրեանց բերէին յամենայն կազմած գործոյն գործե՛լ զայն. և դադարեցին: ՃԾԵ
⁸ Եւ գործէ՛ր ամենայն իմաստուն սրտիւ ընդ գործաւորսն զգործ խորանին տա՛սնփեղկեան, 'ի բեհեզոյ մանելոյ, և 'ի կապուտակէ, և 'ի ծիրանւոյ, և 'ի կարմրոյ կրկնելոյ: քերոբ գործ անկուածոյ գործէին:
⁹ Երկայնութիւն միոյ փեղկին 'ի քսան և յութ կանգնոյ, և լայնութիւն 'ի չորից կանգնոց միոյ փեղկի. չափ նո՛յն էր ամենեցունց փեղկիցն:
¹⁰ և կցեալ զհինգ փեղկն ընդ միւս հինգ փեղկին, և զհինգն ևս փեղկ կցեալ ընդ այլում հնգի:
¹¹ Եւ արար ճարամանդս կապուտակեայս առ եզերբ միոյ փեղկին
¹² ’ի կողմանէ առ 'ի խառնուածս. նո՛յնպէս արար և առ եզերբ արտաքնոյ փեղկին, երկրորդի խառնուածոյն:
¹³ Յիսուն ճարամանդ արար միոյ փեղկի. և յիսուն ճարամանդ արար 'ի կողմանէ փեղկին ըստ երկրորդի խառնուածոյն, առ 'ի խառնելոյ իւրաքանչիւր ճարամանդացն ընդ միմեանս: Եւ արար օղս ոսկիս յիսուն. և խառնեաց զփեղկսն ընդ միմեանս օղիւքն. և եղև խորան մի:
¹⁴ Եւ արար փեղկս մազեղէնս ծածկիչս խորանին. մետասան փեղկ արար զնոսա:
¹⁵ Երկայնութիւն միոյ փեղկի յերեսուն կանգնոյ. և լայնութիւն միոյ փեղկի 'ի չորից կանգնոց: չափ նո՛յն էր մետասանեցունց փեղկիցն.
¹⁶ և կցեաց զհինգ փեղկն 'ի միասին, և զվեց փեղկն 'ի միասին:
¹⁷ Եւ արար յիսուն ճարամանդ առ եզերբ փեղկին՝ որ 'ի մէջ խառնուածոցն. և արար յիսուն ևս ճարամանդ առ եզերբ փեղկին երկրորդի խառնուածոյն.
¹⁸ և արար օղս պղնձիս յիսուն. և կցեա՛ց զխորանն՝ զի լինիցի մի:
¹⁹ Եւ արար զվիժակս խորանին 'ի մորթոց խոյոց կարմի՛ր ներկելոց. և զարտախուրակսն 'ի կապուտակէ 'ի վերո՛յ կողմանէ:
²⁰ Եւ արար զերկուս սիւնս խորանին յանփուտ փայտից կանգնաւորս:
²¹ ’Ի տասն կանգնոյ զերկայնութիւն միոյ սեան. և 'ի կանգնոյ և 'ի կիսոյ զթանձրութիւն և զլայնութիւն միոյ սեան.
²² և երկուս սփռի՛չս առ մի մի սիւն խառնեալ ընդ միմեանս. նո՛յնպէս արար ամենայն սեանց խորանին:
²³ Եւ արար զսիւնս խորանին. քսան սիւն՝ 'ի հարաւոյ կողմանէ, և քառասուն խարիսխ արծաթի՝ սեանցն քսանեցունց.
²⁴ երկուս խարիսխս առ մի սիւն յերկոցունց կողմանց. և երկու խարիսխս առ մևս ևս սիւն յերկոցունց կողմանց:
²⁵ Եւ յերկրորդ կողման խորանին ընդ հիւսւսի արար քսան սիւն,
²⁶ և քառասուն խարիսխ արծաթի. երկու խարիսխ առ մի սիւն, և երկու խարիսխ առ մևս ևս սիւն:
²⁷ Եւ 'ի թիկանց խորանին ընդ ծովակողմ արար վե՛ց սիւն.
²⁸ և երկու սիւնս արար յանկիւնս խորանին յետուստ կողմանէ:
²⁹ Եւ էին հասարակ 'ի ներքուստ. և ըստ նմին օրինակի հասարակ էին 'ի գլխոյ կողմանէ, 'ի մի խառնուած. նո՛յնպէս արար և երկոցունց սեանցն՝ որ յանկիւնսն:
³⁰ Եւ էին ո՛ւթ սիւն, և խարիսխ նոցա արծաթիք, վեշտասա՛ն խարիսխք, երկու խարիսխք առ մի սիւն, և երկու խարիսխք առ մի սիւն:
³¹ Եւ արար պարզունակս յանփուտ փայտից, հի՛նգ առ մի սիւն 'ի միոջէ կողմանէ խորանին:
³² և հի՛նգ ևս պարզունակ առ միւս սիւն՝ յերկրորդ կողմանէ խորանին. և հինգ պարզունակ առ միւս սիւն 'ի թիկանց խորանին ընդ ծովակողմն:
³³ Եւ արար զմիջին պարզունակն թափանցա՛նց 'ի մէջ սեանցն 'ի կողմանէ 'ի կողմն:
³⁴ Եւ զերկուս սիւնսն պատեաց ոսկւով. և զերկուս օղամանեակսն նոցա արար ոսկիս, յորս մտանիցեն պարզունակքն. և պատեաց զպարզունակսն ոսկւով:
³⁵ Եւ արար վարագոյր 'ի կապուտակէ, և 'ի ծիրանւոյ, և 'ի կարմրոյ մանելոյ, և 'ի բեհեզոյ նիւթելոյ. գո՛րծ անկուածոյ գործեաց զնա քերոբ:
³⁶ Եւ ե՛դ զայն 'ի վերայ չորից սեանցն յանփուտ փայտից ոսկիապատաց. և խոյակք նոցա ոսկիք, և չո՛րք խարիսխք նոցա արծաթիք:
³⁷ Եւ արար զվարագոյր դրան խորանին վկայութեան 'ի կապուտակէ, և 'ի ծիրանւոյ, և 'ի կարմրոյ մանելոյ, և 'ի բեհեզոյ նիւթելոյ, գո՛րծ անկուածոյ քերոբ:
³⁸ Եւ զսիւնս նոցա հինգ, և զօ՛ղս նոցա. և պատեաց զխոյակս նոցա ոսկւով. և խարիսխք նոցա պղնձիք հինգ:

Գլուխ 37

¹ Եւ արար Բեսելիէլ զտապանակն յանփուտ փայտից. յերկուց կանգնոց և 'ի կիսոյ զերկայնութիւն նորա. և 'ի կանգնոյ և 'ի կիսոյ զլայնութիւն նորա. և 'ի կանգնոյ և 'ի կիսոյ զբարձրութիւն նորա: և պատեաց զնա ոսկւով սրբով ներքոյ և արտաքոյ:
² և արար նմա ծնօտս ոսկիս շուրջանակի:
³ Եւ ձուլեաց նմա չո՛րս օղամանեակս ոսկիս 'ի չորեցունց կողմանց նորա. երկուս օղամանեակս 'ի միոջէ կողմանէ, և երկուս օղամանեակս 'ի միւսմէ կողմանէ, և ագո՛յց լծակացն:
⁴ Եւ արար լծակս յանփուտ փայտից, և պատեաց զնոսա ոսկւով:
⁵ Եւ ագուցին զլծակսն յօղամանեակսն 'ի կողմանց տապանակին, բառնա՛լ զնա նոքօք:
⁶ Եւ արարին զքաւութիւնն 'ի վերուստ տապանակին յոսկւո՛յ սրբոյ. յերկո՛ւց կանգնոց և 'ի կիսոյ զերկայնութիւն նորա, և 'ի կանգնոյ և 'ի կիսոյ զլայնութիւն նորա:
⁷ Եւ արար երկուս քերովբէս ոսկիս, ճախարակեա՛յս գործեաց զնոսա՝ յերկուց կողմանց քաւութեանն:
⁸ Քերոբ մի 'ի վերայ միոյ գլխոյ քաւութեանն. և քերոբ մի 'ի վերայ երկրորդի գլխոյ քաւութեանն, անդստին 'ի քաւութենէ անտի արար զերկոսին քերոբսն, յերկոցունց ծայրից նորա:
⁹ Եւ է՛ր քերովբէիցն տարածեալ զթևս իւրեանց 'ի վերուստ. և հովանի՛ ունէին թևօք իւրեանց 'ի վերայ քաւութեանն. և երեսք քերոբէիցն հանդէպ միմեանց 'ի վերայ քաւութեանն: ՃԾԷ
¹⁰ Եւ արար զսեղանն զառաջաւոր յոսկւոյ սրբոյ. և ձուլեաց նմա չորս օղամանեակս ոսկիս. երկուս 'ի միոջէ կողմանէ, և երկուս յերկրորդ կողմանէ. և ագոյցս, բառնալ զնա ագուցիւքն: Եւ զագոյցս տապանակին և զսեղանոյն արար յանփուտ փայտից. և պատեաց զնոսա ոսկւով. յերկուց կանգնոց զերկայնութիւն նորա, և 'ի կանգնոյ և 'ի կիսոյ զլայնութիւն նորա. և 'ի կանգնոյ և 'ի կիսոյ զբարձրութիւն նորա:
¹¹ Եւ պատեաց զնա ոսկւով սրբով. և արա՛ր նմա ծնօտս ոսկիս շուրջանակի:
¹² Եւ արար նմին պսակ ուղկեան շուրջանակի. և արար ծնօտս ոսկիս պսակին նորա շուրջանակի:
¹³ Եւ արար նմա չորս օղամանեակս ոսկիս. և եդ զօղամանեակսն 'ի չորս կողմանս, որ էին չորեցունց ոտից նորա.
¹⁴ ’ի ներքոյ պսակին. և եղեն օղամանեակքն ագոյցք լծակացն առ 'ի բառնալոյ զսեղանն:
¹⁵ Եւ արար երկուս լծակս յանփուտ փայտից. և պատեաց զնոսա ոսկւով առ 'ի բառնալ զսեղանն:
¹⁶ Եւ արար զկահ սեղանոյն. զխնկաղացս նորա, և զարիւնակալս նորա, և զճաշակս նորա, և զնուիրանոցսն՝ որովք նուիրիցեն՝ յոսկւոյ սրբոյ: ՃԾԸ
¹⁷ Եւ արար զաշտանակն լուսոյ՝ ձոյլ ոսկի, զբունն. և զստեղունսն յերկոցունց կողմանց նորա. և 'ի ստեղանցն շառաւիղք ընտրեալք առ միմեանս երեք 'ի միոջէն, և երեք 'ի միւսմէն հաւասարք միմեանց: և զլուսակալս նոցա՝ որ են 'ի ծայրսն ընկուզազարդս անդստին ընտրեալս: Եւ զբազմակալսն 'ի նոսա. զի եղիցին ճրագարանքն 'ի վերայ նոցա. և զբազմակալն զեւթներորդ՝ որ 'ի գլուխ լուսակալին. որ 'ի վերայ բուն իսկ գլխոյն 'ի վերուստ ձոյլ՝ համա՛կ ոսկի: Եւ զեւթն ճրագարանսն որ 'ի վերայ նորա ոսկիս. և զունելիս նորա ոսկիս. և զյարդարիչս նորա ոսկիս յոսկւոյ սրբոյ. ճախարակեայ գործեաց զաշտանակն, զբունն, և զստեղունս նորա. և զսկահաձևսն և զգնդակսն և զշուշանսն անդստին 'ի նմանէ:
¹⁸ Վեց ստեղունք արձակեալք 'ի կողմանց նորա. երեք ստեղունք արձակեալք 'ի միոջէ կողմանէ աշտանակին. և երեք ստեղունք յերկրորդ կողմանէ աշտանակին:
¹⁹ Եւ երեք սկահաձևք ընկուզազարդք յօրինեալք 'ի միում ստեղան, և գնդակ և շուշան: և երեք սկահաձևք ընկուզազարդք յօրինեալք 'ի միում ևս ստեղան, և գնդակ և շուշան: Ա՛յսպէս վեցեցունց ստեղանցն արձակելոց յաշտանակէ անտի:
²⁰ Եւ 'ի բուն աշտանակին չորք սկահաձևք ընկուզազարդք յօրինեալք. և գնդակք նորին և շուշանք:
²¹ Եւ գնդակ մի ընդ երկու ստեղամբքն. անդստին 'ի նմին. վեցեցունց ստեղանցն արձակելոց 'ի նմանէ:
²² Գնդակք նոցա և ստեղունք իւրեանց անդստին 'ի նմին, բովանդակ ճախարակեայ 'ի միոջէ՛ յոսկւոյ սրբոյ:
²³ Եւ արար զճրագարանս նորա եւթն. և զունելիս, և զյարդարիչս նորա յոսկւոյ սրբոյ:
²⁴ ’Ի տաղանդէ միո՛յ ոսկւոյ սրբոյ արար զնա՝ և զամենայն զկահ նորա: ՃԾԹ
²⁵ Սա՛ արար զսեղանն ոսկիապատ յանփուտ փայտից, 'ի հինգ կանգնոյ զերկայնութիւն նորա, և 'ի հինգ կանգնոյ զլայնութիւն նորա, չորեքկուսի. և յերից կանգնոց զբարձրութիւն նորա, և զեղջևրս նորա անդստին 'ի նմանէ:
²⁶ Եւ պատեաց զնա ոսկւով սրբով. և զյարկս նորա, և զկողմանս նորա շուրջանակի, և զեղջևրս նորա:
²⁷ Եւ արա՛ր նմա ծնօտս ոսկիս շուրջանակի. և երկուս օղամանեակս ոսկիս ընդ ծնօտիւք նորա առ 'ի կողմանէ ընդ երկոքումբք կողմամբք նորա՝ յագոյցս լծակացն, առ 'ի բառնալոյ զնա նոքօք:
²⁸ Եւ արար զլծակսն յանփուտ փայտից, և պատեաց զնոսա ոսկւով: ՃԿ
²⁹ Սա՛ արար զևղն օծութեան զսուրբ, և զհանդերձանս խնկոցն. գործ մաքուր իւղագործաց:

Գլուխ 38

¹ Եւ արար զսեղանն պղնձապատ 'ի բուրուառացն պղնձեաց՝ որ էին 'ի ձեռս արանցն ապստամբաց հանդերձ ժողովրդեամբն Կորխայ, յանփուտ փայտից. 'ի հինգ կանգնոյ զերկայնութիւն նորա, և 'ի հինգ կանգնոյ զլայնութիւն նորա. չորեքկուսի. և յերից կանգնոց բարձրութիւն նորա:
² Արա՛ր և զեղջևրս նորա 'ի վերայ չորեցունց անկեանց նորա. անդստին 'ի նմանէ էին եղջևրք նորա, և պատեաց զնոսա պղնձով:
³ Սա՛ արար զամենայն կահ սեղանոյն, զխարիսխսն, և զբլշակն, և զտաշտսն, և զմսահանսն, և զբուրուառսն: և զամենայն կահս նորա արար պղնձի:
⁴ Սա՛ արար զգահաւորակս սեղանոյն. գո՛րծ վանդակագործ պղնձի՝ 'ի բուրուառացն. 'ի ներքուստ մինչև ցմէջս.
⁵ ե՛դ 'ի նմա չորս օղամանեակս պղնձիս 'ի չորեցունց կողմանց գահաւորակի սեղանոյն՝ ագոյցս նգացն:
⁶ Եւ արար զլծակսն յանփո՛ւտ փայտից, և պատեա՛ց զնոսա պղնձով:
⁷ Եւ ագուցին զլծակսն յօղամանեակսն 'ի կողմանս սեղանոյն, բառնալ զսեղանն նոքօք: բովանդակ տախտակամա՛ծ գործեաց զնա: ՃԿԲ
⁸ Եւ արար զաւազանն պղնձի, և զխարիսխս նորա պղնձի, 'ի հայելեաց կանանց ուխտաւորաց. որք պահեցին պահս առ դրան խորանին վկայութեան, յաւուր յորում եհար զխորանն: ՃԿԳ
⁹ Եւ արար զսրահն որ հայէր ընդ հարաւ. և զառագաստ սրահին 'ի բեհեզոյ մանելոյ հարիւր առ հարիւր:
¹⁰ Եւ սիւնք նոցա քսան, և խարիսխք նոցա պղնձիք քսան. և զարդք սեանցն և խոյակք նոցա արծաթիք:
¹¹ Եւ ընդ կողմն հիւսւսոյ հարևր առ հարևր. և սիւնք նոցա քսան, և խարիսխք նոցա պղնձիք քսան. և զարդք սեանցն և դրուագք նոցա արծաթիք:
¹² Եւ ընդ ծովակողմն սրահք 'ի յիսուն կանգնոյ. և սիւնք նոցա տասն, և խարիսխք նոցա տասն. և զարդք սեանցն և դրուագք նոցա արծաթիք:
¹³ Եւ ընդ կողմն արևելից 'ի յիսուն կանգնոյ: Եւ առագաստքն
¹⁴ ’ի հնգետասան կանգնոյ 'ի թիկանց. և սիւնք նոցա երեք, և խարիսխք նոցա երեք:
¹⁵ Եւ յերկրորդ թիկունսն առ դրամբք սրահին, սրահք 'ի հնգետասան կանգնոյ. և սիւնք նոցա երեք, և խարիսխք նոցա երեք:
¹⁶ Ամենայն սրահք խորանին շուրջանակի 'ի բեհեզոյ մանելոյ.
¹⁷ և խարիսխք նոցա պղնձիք. և դրուագք սեանցն և խոյաւղք նոցա արծաթիք, և խոյակք նոցա արծաթապատք, և սիւնքն արծաթապատք:
¹⁸ և ամենայն սիւնք սրահակին: Եւ սրահակք դրան սրահին, գործ նկարակերպ 'ի կապուտակէ, և 'ի ծիրանւոյ, և 'ի կարմրոյ մանելոյ. և 'ի բեհեզոյ նիւթելոյ. 'ի քսան կանգնոյ երկայնութիւն, և 'ի հնգետասան կանգնոյ բարձրութիւն, և լայնութիւն հասարակ ըստ առագաստից սրահին:
¹⁹ Եւ սիւնք նոցա չորք, և խարիսխք նոցա պղնձիք չորք՝ և խոյաւղք նոցա արծաթիք չորք. և խոյակք նոցա արծաթապատք.
²⁰ և ամենայն ցիցք սրահին և խորանին շուրջանակի պղնձիք:
²¹ Եւ ա՛յս էր պայման խորանին վկայութեան. որպէս հրաման ետ Մովսիսի կազմել զպաշտօնն Ղևտացւոցն 'ի ձեռն Իթամարայ որդւոյ Ահարոնի քահանայի:
²² Եւ Բեսելիէլ Ուրիեան որդի Ովրայ յազգէ Յուդայ արա՛ր որպէս հրաման ետ Տէր Մովսիսի:
²³ Եւ ապա Եղիաբ Աքիսամայ յազգէ Դանայ. որ ճարտարապետէ՛ր զոստայնանկութիւն, և զասղնագործութիւն, և զնկարակերտութիւն. 'ի կապուտակէ, և 'ի ծիրանւոյ, և 'ի կարմրոյ մանելոյ, և 'ի բեհեզոյ նիւթելոյ:
²⁴ Ամենայն ոսկւոյն՝ որ գործեցաւ 'ի գործն, ըստ ամենայն գործոյ սրբութեանն, եղև կշիռ ոսկւոյն նուիրացն քսան և ինն տաղանդ, և եւթն հարիւր և երեսուն սկիղ՝ ըստ սրբութեան սկեղն:
²⁵ Եւ արծաթոյ նուէրք՝ յանցելոց արանց ժողովրդեանն 'ի հանդիսի՝ հարևր տաղանդ, և հազար և եւթն հարևր և եւթանասուն և հինգ սիկղ՝ ըստ սրբութեան սկեղն. դրա՛մ մի առ գլուխ՝ կէս սկեղ ըստ սրբութեան սկեղն. ամենայն որ անցանէր 'ի հանդիսի անդ 'ի քսանամենից և 'ի վեր, վեց հարևրհազար և երեք հազարք և հինգ հարևր և յիսուն:
²⁶ Եւ եղև հարևր տաղանդ արծաթոյն՝ 'ի ձոյլ հարևր խոյակաց խորանին, և 'ի խոյակս վարագուրին. հարևր տաղանդ՝
²⁷ ’ի հարևր խոյակ. տաղանդ մի առ խոյակ:
²⁸ Եւ զհազար և զեւթն հարևր և զեւթանասուն և հինգ սիկղն, գործեաց 'ի խոյաւղս սեանցն, և պատեաց ոսկւով զխոյակս նոցա, և զարդարեաց զնոսա:
²⁹ Եւ պղինձ նուիրացն՝ եւթանասուն տաղանդ, և երկու հազար և չորք հարևր սիկղ:
³⁰ Եւ արարին անտի զխարիսխս դրան խորանին վկայութեան. և զսեղանն պղնձի, և զգահաւորակ սեղանոյն պղնձի, և զամենայն սպաս սեղանոյն,
³¹ և զխարիսխս սրահին շուրջանակի. և զխարիսխս դրան սրահին. և զամենայն ցիցս խորանին, և զամենայն ցիցս սրահին շուրջանակի. և զապարումսն 'ի կապուտակէ, և 'ի ծիրանւոյ, և 'ի կարմրոյ մանելոյ, և 'ի բեհեզոյ նիւթելոյ:

Գլուխ 39

¹ Եւ արար պատմուճանս պաշտամանն, պաշտե՛լ նոքօք 'ի սրբութեանն: և արար պատմուճան սրբութեանցն որ իցեն Ահարոնի քահանայի. որպէս հրամայեաց Տէր Մովսիսի:
² Եւ արարին զվակասն յոսկւոյ, և 'ի ծիրանւոյ, և 'ի կապուտակէ, և 'ի կարմրոյ մանելոյ, և 'ի բեհեզոյ նիւթելոյ:
³ Եւ հատանէին թիթղունս ոսկիս. թե՛լս թելս անկանել ընդ կապուտակին՝ և ընդ ծիրանւոյն, և ընդ կարմրոյ մանելոյ, և ընդ բեհեզոյ նիւթելոյ. գո՛րծ անկուածոյ վակասի գործեցին զնա,
⁴ խառնեալ յերկոցունց կողմանց ընդ միմեանս հիւսկէն. գո՛րծ անկուածոյ 'ի միմեանս: 'ի նոյն
⁵ և 'ի նմանէ գործեցին ըստ իւրում գործուածոյ, յոսկւոյ, և 'ի կապուտակէ, և 'ի ծիրանւոյ, և 'ի կարմրոյ մանելոյ, և 'ի բեհեզոյ նիւթելոյ. որպէս և հրամայեաց Տէր Մովսիսի:
⁶ Եւ գործեաց զերկոսին ականսն զըմրուխտս՝ ժապաւինեալս և ընդելուզեալս ոսկւով, քանդակեալս և մածեալս 'ի քանդակ կնքոյ. յանուանց որդւոցն Իսրայէլի:
⁷ Եւ հաստատեաց զնա 'ի վերայ ուսոց վակասին, ականս յիշատակի որդւոցն Իսրայէլի. որպէս և հրամայեաց Տէր Մովսիսի:
⁸ Եւ արար զտախտակն գործ անկուածոյ նկարակերպ ըստ գործոյ վակասին, յոսկւոյ, և 'ի կապուտակէ, և 'ի ծիրանւոյ, և 'ի կարմրոյ մանելոյ, և 'ի բեհեզոյ նիւթելոյ:
⁹ Չորեքկուսի, և կրկին գործեաց զտախտակն. թզա՛ւ յերկայնութիւն՝ և թզա՛ւ 'ի լայնութիւն:
¹⁰ Եւ անկանէր ընդ նմին անկուած ականակապ չորեքկարգեան ականց: Կարգն առաջին՝ սարդիոն, և տպազիոն, և զըմրուխտ, կարգ մի:
¹¹ Եւ կարգն երկրորդ, կարկեհան, և շափիղա, և յասպիս:
¹² Եւ կարգն երրորդ, սուտակ, և գոճազմ, և ակատ:
¹³ Եւ կարգն չորրորդ, ոսկեա՛կն, և եղունգն, և բիւրեղ. պատեալ և ընդելուզեալ ոսկւով:
¹⁴ Եւ ականքն ըստ անուանց որդւոցն Իսրայէլի էին. երկոտասանք յանուանց նոցա գրեալք և քանդակեալք. ըստ իւրաքանչիւր անուանց ազգացն երկոտասանից:
¹⁵ Եւ արարին ընդ տախտակաւն վերջս փողփողեալս 'ի վերայ երկուց օղոցն. գործ հիւսկէն յոսկւոյ սրբոյ:
¹⁶ Եւ արարին երկու վահա՛նակս ոսկիս, և երկուս օղս ոսկիս. և եդին զերկու օղսն ոսկիս յերկոսին առաջս տախտակին:
¹⁷ Եւ եդին զվերջսն փողփողեալս 'ի վերայ երկուց օղոցն յերկոսին կողմանս տախտակին. և յերկոսին խառնուածսն զերկուս վերջս փողփողեալս. և եդին 'ի վերայ երկուց վահանակացն, և զնոսա եդին 'ի վերայ ուսոց վակասին
¹⁸ դէ՛մ յանդիման յերեսաց կողմանէ: Եւ արարին երկուս օղս ոսկիս, և եդին 'ի վերայ երկոցունց թևոցն 'ի ծայրս տախտակին, 'ի գլուխ թիկանց վակասին 'ի ներքոյ կողմանէ: Եւ արարին երկուս օղս ոսկիս, և եդին 'ի վերայ երկոցունց ուսոց վակասին 'ի ներքոյ կողմանէ յերեսաց նորա՝ ըստ վերնոյ խառնուածոյն անկուածոյ վակասին:
¹⁹ Եւ պնդեցին զտախտակն յօղից նորա մինչև ցօղս վակասին, խառնեալ ընդ միմեանս, 'ի կապուտակէ. հիւսեալս ընդ միմեանս յանկուած վակասին, զի մի՛ զերծանիցի տախտակն 'ի վակասէ անտի. որպէս հրամայեաց Տէր Մովսիսի: ՃԿԶ
²⁰ Եւ արարին զվտաւակն 'ի վերայ վակասին, գո՛րծ անկուածոյ համակ կապուտակ.
²¹ և օձիք վտաւակացն անդէն 'ի նորին 'ի միջի անկուածոյ հիւսկէն՝ գրապանաւ օձիքն շուրջանակի անքակ:
²² Եւ արարին առ ստորոտով վտաւակացն իբրև ծաղկեալս նռնաձևս 'ի կապուտակէ, և 'ի ծիրանւոյ, և 'ի կարմրոյ մանելոյ, և 'ի բեհեզոյ նիւթելոյ:
²³ Եւ արարին զանգակս յոսկւոյ սրբոյ. և եդին զզանգակսն 'ի մէջ նռնաձևացն առ ստորոտով վտաւակացն շուրջանակի.
²⁴ ’ի մէջ նռնաձևացն զանգակս ոսկիս և նռնաձև. զանգակ և նռնաձև, առ ստորոտով վտաւակացն շուրջանակի 'ի սպաս պաշտամանն. որպէս և հրամայեաց Տէր Մովսիսի: ՃԿԷ
²⁵ Եւ արարին պատմուճանս բեհեզեղէնս գո՛րծ անկուածոյ, Ահարոնի և որդւոց նորա:
²⁶ Եւ զապարաւշսն 'ի բեհեզոյ. և զխոյրն 'ի բեհեզոյ:
²⁷ և զանդրավարտիսն տաբատ՝ 'ի նիւթոյ բեհեզոյ:
²⁸ Եւ զկամարս նոցա 'ի բեհեզոյ նիւթելոյ, և 'ի կապուտակէ, և 'ի ծիրանւոյ, և 'ի կարմրոյ մանելոյ, գո՛րծ նկարուց. զորօրինակ հրամայեաց Տէր Մովսիսի:
²⁹ Եւ արարին զթիթեղն ոսկի նուէ՛ր սրբութեանն յոսկւոյ սրբոյ. և գրեցին 'ի նմա գիր դրոշմեալ քանդակաւ, Սրբութիւն Տեառն:
³⁰ Եւ եդին առ կապուտակեայ ժապաւինեաւն. զի կացցէ 'ի խուրին 'ի վերոյ կողմանէ. զոր օրինակ հրամայեաց Տէր Մովսիսի: ՃԿԸ
³¹ Եւ կատարեցաւ ամենայն գործ խորանին՝ յարկի վկայութեան: և արարին որդիքն Իսրայէլի ըստ ամենայնի որպէս և հրամայեաց Տէր Մովսիսի, նո՛յնպէս և արարին: Եւ զաւելորդ զոսկի նուիրացն՝ արարին կահ պաշտելոյ նոքօք առաջի Տեառն:
³² Եւ բերին զպատմուճանսն առ Մովսէս 'ի խորանն. և զյարկն՝ և զամենայն զկահ նորա. զառանցսն և զտախտակս նորա. և զպարզունակս նորա. և զսիւնակս նորա. և զխարիսխս նորա:
³³ Եւ զմաշկսն. և զմորթս խոյոց ներկեալս կարմրով. և զվիժակսն կապուտակեայս:
³⁴ և զսրահակն որ ծածկէր զտապանակ կտակարանացն. և զլծակսն.
³⁵ և զքաւութիւնն. և զսեղանն զառաջաւոր, և զամենայն զկահ նորա. և զհացն երեսաց:
³⁶ Եւ զաշտանակն սուրբ. և զճրագարանս նորա, և զճրագունսն այրելոյ՝ և զամենայն կահ նորա. և զևղն լուսոյ:
³⁷ և զսեղանն ոսկի. և զևղն օծութեան. և զխունկսն հանդերձանաց:
³⁸ Եւ զսրահակս դրանն, և զխորանն.
³⁹ և զսեղանն պղնձի՝ և զլծակս նորա, և զամենայն կահ նորա. և զաւազանն, և զխարիսխս նորա՝ և զառագաստ սրահին, և զսիւնակս նորա, և զխարիսխս նորա:
⁴⁰ Եւ զվարագոյր դրան խորանին, և զդրան սրահին. և զապաւանդակս նորա, և զցիցս նորա. և զամենայն զկահ խորանին յարկի վկայութեանն:
⁴¹ Եւ զպատմուճանսն պաշտաման պաշտել 'ի սրբութիւնսն. և զպատմուճան սրբութեանն որ իցեն Ահարոնի քահանայի. և զպատմուճանս որդւոցն նորա 'ի քահանայութիւն:
⁴² Ըստ ամենայնի զոր միանգամ պատուիրեաց Տէր՝ Մովսիսի. նո՛յնպէս և արարին որդիքն Իսրայէլի զամենայն զկազմածն:
⁴³ Եւ ետես Մովսէս զամենայն գործն. և է՛ր գործեալ ըստ օրինակին՝ որպէս հրամայեաց Տէր Մովսիսի, նո՛յնպէս և արարին. և օրհնեաց զնոսա Մովսէս:

Գլուխ 40

¹ Եւ խօսեցաւ Տէր ընդ Մովսիսի՝ և ասէ.
² Յամսեանն առաջնում յամսամտի ամսոյն, կանգնեսցե՛ս զխորանն զյա՛րկ վկայութեանն:
³ Եւ դիցե՛ս անդ զտապանակն վկայութեան. և ծածկեսցե՛ս զտապանակն վարագուրաւն:
⁴ Եւ տարցի՛ս 'ի ներքս զսեղանն, և յօրինեսցե՛ս զհացն 'ի վերայ նորա. և տարցի՛ս 'ի ներքս զաշտանակն, և դիցե՛ս 'ի վերայ նորա զճրագարանսն:
⁵ Եւ դիցե՛ս զսեղանն ոսկի՝ արկանել խունկս առաջի տապանակի վկայութեանն: և ձգեսցե՛ս զպատրուակ վարագուրին 'ի դրան խորանին վկայութեան:
⁶ Եւ դիցե՛ս զսեղան ողջակիզացն՝ առ դրան խորանին յարկի վկայութեանն: և օծցես շուրջ զխորանն. և զամենայն ինչ որ 'ի նմա իցեն՝ սրբեսցե՛ս շուրջանակի:
⁷ Եւ դիցես զաւազանն ընդ խորա՛նն վկայութեան՝ և ընդ սեղանն. և արկցե՛ս անդ ջուր:
⁸ Եւ օծցե՛ս զսրահն շուրջանակի. և ձգեսցե՛ս զսրահակ դրան սրահին:
⁹ Եւ առցե՛ս զևղն օծութեան՝ և օծցես զխորանն՝ և զամենայն որ ինչ 'ի նմա է. և սրբեսցե՛ս զնա, և զամենայն կահ նորա. և եղիցին սրբութիւնք:
¹⁰ Եւ օծցե՛ս զսեղանն ողջակիզաց՝ և զամենայն կահ նորա:
¹¹ և սրբեսցե՛ս զսեղանն, և եղիցի սեղանն՝ սուրբ սրբութեանց: և օծցե՛ս զաւազանն, և զխարիսխս նորա, և սրբեսցե՛ս զնա:
¹² Եւ մատուսցես զԱհարոն և զորդիս նորա 'ի դուռն խորանին վկայութեան. և լուասցես զնոսա ջրով:
¹³ Եւ զգեցուսցե՛ս Ահարոնի զպատմուճանն սուրբ. և օծցե՛ս զնա, և սրբեսցե՛ս զնա, և քահանայասցի՛ ինձ: Եւ մատուսցե՛ս զորդիս նորա, և զգեցուսցե՛ս նոցա պատմուճան. և օծցե՛ս զնոսա զորօրինակ օծեր զհայրն նոցա, և քահանայասցի՛ն ինձ. և եղիցի նոցա օծումն քահանայութեան յաւիտեան յազգս նոցա: ՃՀ
¹⁴ Եւ արա՛ր Մովսէս ըստ ամենայնի, զոր միանգամ պատուիրեաց նմա Տէր, նո՛յնպէս և արար:
¹⁵ Եւ եղև յամսեանն առաջնում յամի երկրորդի ելանելոյ նոցա յերկրէն Եգիպտացւոց, յամսամտին, կանգնեցա՛ւ խորանն:
¹⁶ Եւ կանգնեա՛ց Մովսէս զխորանն, և եդ զխարիսխս նորա, և կանգնեաց զսիւնս նորա. և ե՛դ 'ի վերայ զխոյակս նորա:
¹⁷ և պարզեաց զպարզունակս նորա. և տարածեաց զվերնափեղկսն 'ի վերայ խորանին. Եւ ա՛րկ զվիժակս խորանին 'ի վերայ նորա 'ի վերուստ: և յօրինեաց զարտախուրակս նորա. որպէս հրամայեաց Տէր Մովսիսի:
¹⁸ Եւ ա՛ռ զվկայութիւնսն՝ և ե՛դ 'ի տապանակի անդ. և ե՛դ զնիգսն ընդ տապանակաւն. և ե՛դ զքաւութիւնն 'ի վերայ տապանակին 'ի վերուստ:
¹⁹ Եւ տարա՛ւ 'ի ներքս զտապանակն 'ի խորանն. և ձգեա՛ց զպատրուակ վարագուրին, և ծածկեա՛ց զտապանակն վկայութեան՝ զորօրինակ հրամայեաց Տէր Մովսիսի:
²⁰ Եւ ե՛դ զսեղանն 'ի խորանին վկայութեան 'ի հիւսւսոյ կողմանէ խորանին, արտաքոյ վարագուրին 'ի խորանին:
²¹ Եւ յօրինեաց 'ի վերայ նորա զհացն երեսաց առաջի Տեառն, զորօրինակ հրամայեաց Տէր Մովսիսի:
²² Եւ ե՛դ զաշտանակն 'ի խորանին վկայութեան յանդիման սեղանոյն, 'ի հարաւոյ կողմանէ խորանին:
²³ Եւ ե՛դ զճրագարանսն 'ի վերայ նորա առաջի Տեառն, զորօրինակ հրամայեաց Տէր Մովսիսի:
²⁴ Եւ ե՛դ զսեղանն ոսկի 'ի խորանին վկայութեան՝ յանդիման Բազումք. Վարագուրիւն:
²⁵ և արկ խունկ 'ի վերայ նորա 'ի խնկոցն հանդերձանաց, որպէս հրամայեա՛ց Տէր Մովսիսի.
²⁶ և ձգեաց զսրահակ դրան խորանին:
²⁷ Եւ ե՛դ զսեղանն ողջակիզաց առ դրան խորանին յարկի վկայութեանն. և եհան 'ի վերայ նորա ողջակէզս և զոհս, որպէս պատուիրեաց Տէր Մովսիսի:
²⁸ Եւ ե՛դ զաւազանն ընդ խորանն վկայութեան և ընդ սեղանն, և արկ 'ի նա ջուր.
²⁹ զի լուասցեն 'ի նմանէ Մովսէս և Ահարոն, և որդիք նորա զձեռս և զոտս իւրեանց,
³⁰ յորժամ մտանիցեն 'ի խորանն վկայութեան, կամ յորժամ մերձենայցեն 'ի սեղանն պաշտել: և լուանային 'ի նմանէ, որպէս և հրամայեաց Տէր Մովսիսի:
³¹ Եւ կանգնեաց զսրահն շուրջ զխորանաւն և զսեղանաւն. և ձգեաց զսրահակ դրան սրահին: և կատարեաց Մովսէս զամենայն զգործն:
³² Եւ ծածկեաց ամպն զխորանն վկայութեան. և լի՛ եղև փառօք Տեառն խորանն:
³³ Եւ ո՛չ կարէր Մովսէս մտանել 'ի խորանն վկայութեան, զի ծածկեաց զնա ամպն, և լի՛ եղև խորանն փառօք Տեառն:
³⁴ Յորժամ վերանայր ամպն 'ի խորանէ անտի, չուէին որդիքն Իսրայէլի հանդերձ ամենայն աղխիւ իւրեանց:
³⁵ Եւ եթէ ո՛չ վերանայր ամպն՝ ո՛չ չուէին մինչև ցօրն վերանալոյ:
³⁶ Զի ամպն Տեառն է՛ր 'ի վերայ խորանին 'ի տուէ. և հո՛ւր կայր 'ի վերայ նորա 'ի գիշերի. առաջի ամենայն որդւոցն Իսրայէլի, յամենայն 'ի չուս իւրեանց: