Էջ:Raffi, Collected works, vol. 6 (Րաֆֆի, Երկերի ժողովածու, հատոր 6-րդ).djvu/276

Վիքիդարանից՝ ազատ գրադարանից
Jump to navigation Jump to search
Այս էջը հաստատված է


սարսափը, որ նա կտարածե թշնամիների վրա։ Իսկ թշնամուն սարսափի մեջ ձգելու համար, գոնե սկզբում այս տեսակ անգթություններ պետք են։ Եվ Բեկը այդ անհրաժեշտությունը շատ լավ հասկանում։ Գազանների հետ բարեսրտությամբ ոչինչ չես կարող շինել։

— Մի բան էլ կա,— առաջ տարավ սրբազանը.— Բեկի այս տեսակ գործողությունները ոչ միայն մեծ սարսափ կտարածեն մահմեդականների վրա, այլ սաստիկ ազդեցություն կունենան նույնիսկ հայերի վրա, որոնք առանց առաջնորդի, առանց ուղեցույցի միշտ դժվարանում են գտնել ուղիղ և անմոլոր ճանապարհը։ Նա իր հաղթություններով նպաստեց և մեր նպատակներին։ Ես մեծ վստահություն չէի ունենալ, թե իմ նամակներով, թե իմ հրավերքով հայոց իշխանները կհավաքվեին այստեղ և կմիանային Բեկի հետ, եթե նա այդ հրաշքները գործած չլիներ։ Համարյա մեկ շաբաթվա մեջ նա կատարեց չորս փառավոր հաղթություններ, ինչպես են'՝ Ուչ-թեփեի, Շընհերի, Ջիվանշիրների և Կուրթլարի ճակատամարտը, և այդ բոլորը սկսեց նա քառասուն հոգով։

— Վերջին տեղեկությունները նույնպես Ստեփաննոս իշխա՞նն է հաղորղել ձեզ, սրբազան, — հարցրեց Խորեն հայր սուրբը։

— Նա է հաղորդել։ Բայց մենք ուշանում ենք, Խորեն հայր սուրբ,— խոսքը փոխեց սրբազանը, նամակների ծրարները գրասեղանի վրայից առնելով և նրան տալով։— Այս նամակները հենց այս առավոտ պետք է ուղարկվեն։ Շուտով կկատարվի սուրբ Վարդանանց նահատակների հոգեհանգիստը։ Ես իմ նամակների մեջ նաշնակել եմ, որ այդ հանդիսավոր տոնին բոլորը այստեղ գտնվեն, որպեսզի այդ խորհրդավոր օրում կնքվի և խորհրդավոր գործի ուխտը։

— Նամակները ես ինքս կտանեմ, — ասաց Խորեն հայր սուրբը։

— Դուք նոր եկաք ճանապարհից, բավական հոգնած կլինեք,— պատասխանեց սրբազանը։

— Ձեր հաղորդած ուրախալի տեղեկությունները բոլորովին կազդուրեցին իմ հոգնածությունը։ Այդ նամակների հետ նշանակություն ունի և կենդանի խոսքը։ Թույլ տվեցեք, սրբազան, որ այդ ցանկալի դեսպանախոսությունը ես կատարեմ։

— Օրհնյալ լինիք, որդի,— ասաց սրբազանը։ Իսկ Խորեն հայր սուրբը, տոնելով նամակների ծրարները, համբուրեց իր մեծավորի աջը և հեռացավ։