ԲԱՐԽՈՒԴԱՐ. (Ձայնը բարձրացնելով): Ի՞նչ էր անում նա այստեղ։
ՍՈՒՍԱՆ. (Ուզում է պատասխանել, լեզուն կաշկանդվում է):
ԲԱՐԽՈՒԴԱՐ. Ես քեզ հարցնում եմ, ի՞նչ գործ ուներ այդ լակոտն այստեղ։
ՍՈՒՍԱՆ. (Դողդոջուն ձայնով): Եկել էր քեզ տեսնելու։
ԲԱՐԽՈՒԴԱՐ. (Դառն հեգնությամբ): Հաա՞, շատ շնորհակալ եմ։ Անառակ։
ՍՈՒՍԱՆ. (Ձեռներն իրար գցելով, աղերսական): Մեղա աստծու, հայր, մեղա աստծու։
ԲԱՐԽՈՒԴԱՐ. (Բռնում է Սուսանի թևից և քաշելով նրան, տանում է դեպի ձախ կողմի դուռը): Եկ այստեղ, եկ, ես քեզ ցույց կտամ, թե դու ում աղջիկն ես։
ՍՈՒՍԱՆ. Խնայիր, ներիր։ (Հետևում է հորն և գնում մյուս սենյակ, ու ճչում է):
ՏԵՍԻԼ 6
ԳՅՈՒԼՆԱԶ և ՍՄԲԱՏ
ԳՅՈՒԼՆԱԶ. (Գալիս է խորքի դռնով: Չմուշկները հանում է դռան մոտ, չարշովը վերցնում է և ծալում): Ախր դու ի՞նչ գործ ունես նրանց հետ։
ՍՄԲԱՏ. (Գալիս է մոր հետ խորքի դռնով: Քսանումեկ տարեկան երիտասարդ է: Հագած է սև սատինից արխալուղ, վրան կարճ թևերով չուխա վազմաներով: Գլխին կլոր գդակ, ոտներին եվրոպական կոշիկներ): Նրանք թափվեցին մեզ վրա ծեծելու։ Ես ու Սեյրանը փայտերով հարձակվեցինք նրանց վրա և մի լավ խրատեցինք։
ԳՅՈՒԼՆԱԶ. (Գալիս է բեմի կենտրոնը, լսում է Սուսանի ձայնը): Այդ ի՞նչ է պատահել երեխայիս։ (Չարշովը մի կողմ շպրտելով վազում է դեպի ձախ կողմի դուռը) Ամա՜ն։
ՍՄԲԱՏ. Հայրիկը ծեծում է նրան։ (Տրտմությամբ): Ա՜հ: (Վրդովված անցուդարձ է անում):
