Կապույտ ծածկոցն իջավ ցած

Վիքիդարանից՝ ազատ գրադարանից
Jump to navigation Jump to search
Կապույտ ծածկոցն իջավ ցած

Վահան Տերյան


ԿԱՊՈՒՅՏ ԾԱԾԿՈՑՆ ԻՋԱՎ ՑԱԾ



Կապույտ ծածկոցն իջավ ցած, —
Մեղմ ու անուշ իրիկո՛ւն,
Վառիր լույսըդ, վաղ անցած,
Լուսե ցնորք, իմ հոգում։

Ամայացած իմ սրտում,
Մենության մեջ իմ սև տան,
Փռիր քնքուշ ու տրտում
Ժպիտը քո խնդության։

Թույլ տուր նորից սիրելու
Առօրյական աշխարհում,
Արշալույսը քո հեռու,
Հայտնությունըդ հմայուն։