Ձախորդ փիսոն

Վիքիդարանից՝ ազատ գրադարանից
Jump to navigation Jump to search
Ձախորդ փիսոն

Հակոբ Աղաբաբ


Ձախորդ փիսոն


Փիսոն-փիսոն փափկամազ,
Տանից փախավ վազե-վազ,
Ուզեց մտնի ամբարը՝
Ետքից հասավ Չամբարը։
Կռիվն ընկավ նրանց մեջ։
Վեր տնկեցին պոչ ու մեջք,
Փիսոն արավ փիֆ, փաֆ, փաֆ
Չամբարն արավ՝ հաֆ, հաֆ, հաֆ։
Փիսոն փախավ մառանը,
Հենց մառանի դռանը՝
Առաջն ելավ Սահակը
Ձեռքին բռնած մահակը։
Վերջը սոված ու ծարավ
Խեղճը դեպի գոմ փախավ,
Էդ գոմի էլ դռանը՝
Քացի խփեց Ծիրանը։