Մարել ես արդեն, մեռել ես հավետ

Վիքիդարանից՝ ազատ գրադարանից
Մարել ես արդեն, մեռել ես հավետ

Վահան Տերյան


ՄԱՐԵԼ ԵՍ ԱՐԴԵՆ, ՄԵՌԵԼ ԵՍ ՀԱՎԵՏ...


Մարել ես արդեն, մեռել ես հավետ,
Հեռավոր կյանքի երազների բոց,—
Խավարն է գրկել հոգիս ալեկոծ,
Եվ դեպի լույսը չըկա արահետ…

Անդարձ օրերի ցնորական երգ,
Դու վաղ ես լռել իմ ցաված հոգում.—
Ես ինձ եմ թաղում և չեմ հեկեկում. —
Տանջանքի գիշե՜ր — և չըկա եզերք։

Իջել են մթին խոհերը վրաս,
Սառն է հիմա իմ գիշերը անափ,—
Էլ չկա ոչ մի լուսեղեն տագնապ,
Եվ ոչ մի երազ, և ոչ մի երազ…