Շիրվանզադեի նամակները Դավիթ Անանունին

Վիքիդարանից՝ ազատ գրադարանից
Jump to navigation Jump to search
Նամակներ Դավիթ Անանունին

Շիրվանզադե

4 օգոստ. 16թ., Թիֆլիս

Մեծարգո պարոն Դ․ Անանուն

Համաձայն Ձեր առաջարկի՝ հայտնում եմ Ձեզ «Գործի» խմբագրությանը հաղորդելու համար այն պայմանները, որոնք կարող են միայն ինձ միջոց տալ այդ ամսագրին աշխատակցելու․․․

Դրաման լիովին պատրաստ ու արտագրված է, կարող եմ ուղարկել երբ պահանջվի։ Վեպը ծրագրված է և կլինի պատրաստ մինչև դեկտեմբեր։

Դրաման, որ 4 արարով և 6 պատկերով է, թուրքահայերի այժմյան կյանքից է՝ կամավորական շարժման հետ կապված։

Վեպը ժամանակակից կյանքից է և պատերազմի հետ կապ չունի։

Բայց իմ ամենագլխավոր պայմանն է․ անաղարտ տպագրություն իմ երկերի։ Ոչ կրճատում և ոչ նույնիսկ մի որևէ բառի կամ կետի փոփոխություն․․․

«Գործ»-ին աշխատակցելը լայն կանեմ միայն դեպքում, երբ կունենամ ապացույց, որ ամսագիրը այդ իմ աշխատակցության կարիքը զգում է։ Կանխավ մերժում եմ ամեն մի զիջում, որի կարիքը ես չեմ զգում։

Հարգանքներով՝ Շիրվանզադե
6 սեպտ․ 1916թ․, Թիֆլիս

Մեծարգո պ․ Դ․ Անանուն

Ստացա Ձեր պատվիրյալ նամակը։

Նախ կարող եմ ապահովել Ձեզ, որ Ձեր խնդիրը պ․ Տեր-Աստվածատրյանի մասին կկատարվի։ Արդեն խոստումն ունեմ ստացած։

Գալով իմ գործին, բարի եղեք հայտնելու «Գործի» հարգելի խմբագրությանը, որ ես բացեիբաց հրաժարվում եմ նրա որոշած պայմաններով աշխատակցելու։ Սովորաբար իմ աշխատակցելու պայմաններն ես ինքս եմ որոշում և աշխատակցում եմ միայն այն դեպքում, երբ որոշումս ընդունվում է լիովին։

Ինչ վերաբերում է Ձեր՝ «Խմբագրությունը իրեն է վերապահում գրական գործերի ընտրության իրավունքը» դարձվածին, պատիվ ունեմ «Գործի» խմբագրությանը հայտնելու, թե այդ տեսակ դարձվածներ ինձ համար անհասկանալի են։ Այդ տեսակ իրավունք ես ոչ ոքի չեմ տվել երբեք և չեմ կարող տալ․․․

Ցավալի է, որ «Գործն» ևս իր նախորդների պես այդպիսի նյութական ողորմելի պայմաններում է լույս տեսնում․․․

Հարգանքով՝ Շիրվանզադե