Որպես մի ցնդած պոետ

Վիքիդարանից՝ ազատ գրադարանից
Jump to navigation Jump to search
Որպես մի ցնդած պոետ

Եղիշե Չարենց

Որպես մի ցնդած պոետ


Որպես մի ցնդած պոետ՝
Ես այսօր կուզեմ երգել
Էմալե պրոֆիլը Ձեր —
Եվ երգով լինել Ձեզ հետ:
Կուզեի հույսով արեգ,
Աչքերում Ձեր բիլ ու խոր
Գուշակել երգերը, որ
Դուք մի օր պիտի գրեք:
Ձեր կապույտ հրով վառված՝
Կուզեի լսել ես հար
Ձեր վճիտ երգերը վառ,
Որ այսօր դեռ չեն գրված:
Եվ որպես ցնդած պոետ . —
Կուզեի անվերջ խմել
Լազուրե երգերը Ձեր —
Եվ երգո՛վ լինել Ձեզ հետ: