Սահմանի վրա
ՍԱՀՄԱՆԻ ՎՐԱ
Իմ թևերի մեջ,
Իմ թևերի մեջ խաղաղատենչ,
Ամբարել եմ ես ուժը դարերի,
Ու նոր օրերի, նոր աստված որպես
Պատրաստ եմ ահա թևածել նորից
Մեր մոլորակի ճանապարհներով։
Պատրաստ եմ նորից
Որպես աշխարհից առաքված դեսպան,
Մոլորակներին հյուր գնալ ծափով,
Պատրաստ եմ ահա
Նոր աշխարհներում կյանք ստեղծել նոր,
Բայց կանգնած այսօր
Միայն մի երկրի սահմանաքարին՝
Ես միտք եմ անում․
— Դարեր են եկել, գնացել դարեր,
Բայց մարդը ահա մեր օրում էլ դեռ
Մի սահմանաքար չի հաղթահարել։
Այդ քարը փոքրիկ, սահմանին դրած,
Ահագնանում է, սպառնում է ինձ,
Ես, որ դարերի ուժն ունեմ իմ մեջ,
Ես, որ տիրել եմ անդամ ատոմին։
Բեռլին, 1964