Աշուն («Մեգ է, անձրև ու մշուշ»)

Վիքիդարանից՝ ազատ գրադարանից
Jump to navigation Jump to search
Մոռացված ուղի Աշուն («Մեգ է, անձրև ու մշուշ»)

Վահան Տերյան

Փողոցի երգը


Աշուն


Մեգ է, անձրև ու մշուշ
Իմ այգում մերկ.
Դառը թախիծ ու վերհուշ —
Անվախճա՜ն երգ։

Հողմն է լալիս թփերում
Մերկ ու վտիտ.
Ցուրտ է, խավար է հեռուն
Եվ անժպիտ։

Սիրտըս թախծոտ ու խոցոտ,
Հոգիս հիվանդ,—
Ո՞վ արևոտ ու բոցոտ
Կըվառե խանդ։

Տունըս ավեր ու խավար.
Օրըս անլույս,
Ո՞վ կըվառե ոսկեվառ
Երազ ու հույս...