Հինգ օրէ ի վեր Գատըգիւղ փոխադրուած ենք. կահ կարասիներէն փոքրիկ մաս մը միայն հետերնիս բերելով Մօտա տուն մը վարձեցինք:
Այսօր քրոջս հազը քիչ մը թեթեւցաւ, բժիշկները կը շարունակեն դարմանել կատարելապէս եւ ապաքինելու մեծ լոյս կու տան:
Երկու օրէ ի վեր գիւղին բարձր դասին պատկանող հիւրերու այցելութիւնը կը վայելեմ. շատերուն հետ ծանօթացայ որոնց անունները միայն լսեր էի: Հայրս գրեթէ չճանչցող չկայ: Ազգ. պաշտօններու մէջ գտնուիլը եւ ճեմարանին հոգաբարձութեան պաշտօնը զինքը շատերուն ծանօթ կ՚ընծայէ, մանաւանդ իր ալեւոր, երկար, վայելուչ մօրուքը եւ լուրջ դէմքը ամենուն պատկառանք եւ համակրանք կ՚ազդէ:
Քոյրս ալ այս այցելութիւններով բաւական իր ցաւը կը մոռնայ. նորանոր դէմքերու եւ ազնիւ հոգիներու ծանօթանալով կը մխիթարուի: Վաղը իրեն Կէօթէի Վերթերը պիտի կարդամ. սիրային վէպերը շատ կը սիրէ, իւթօբիներով կ՚ապրի:
Եղբայրներս Գատըգիւղի Ազգ. վարժարանը սկսան յաճախել. մէկը գալ տարի շրջանաւարտ պիտի կրնայ ելլել:
Այսօր ուրախութիւնս չափազանց է. քոյրս սենեակին մէջ պտտիլ սկսաւ, ախորժակն ալ բացուած է:
Մեր դրացիներէն Ս...եան ֆ...եան և Ա...եան ընտանիքները խիստ ազնիւ են. իրենց յաճախակի այցելութիւններով մեր մխիթարիչները եղած են. քոյրս եւ ես իրենցմէ շատ կ՚ախորժինք:
Երէկուան Սկիւտարի հրդեհէն մեր տունն ալ
