Այս էջը հաստատված է
<1915, մայիսի 28, 29, Թիֆլիս>
Ողջունելով Բաքվի հայ գրասերների ընկերության ծնունդը, Կովկասի հայ գրողների ընկերության վարչությունը խնդրում է Ձեզ՝ նրա ուրախալի զգացմունքների ու բարի ցանկությունների արտահայտիչը լինել։ Կեցցե՛ Բաքվի հայ ինտելիգենցիայի գաղափարային նոր ձեռնարկությունը։
Հովհ. Թումանյան
<1915, հունիսի 11, Բայազեդ աղա>
Նոր ենք վեր կացել, ամսի 11-ն է, Աբաղայի դաշտումն ենք, Բայազեգ աղա գյուղում, ավելի ճիշտը, կողքին, որովհետև գյուղն ավերած է։ Վաղը կհասնենք Վան։ Իհարկե շատ հետաքրքրական են թե երկիրը, թե ամեն բան, ինչ որ կատարվում է։ Ոչ մի կենդանի գյուղ չկա—իրար կոտորում են ու կոտորել են քուրդ ու հայ։
Բուսական ճոխության մասին մի գաղափար տալու համար ուղարկում եմ կակաչի թերթերից ծրարիս մեջ։ Իսկ թե տեսնեք ինչ մեծության հիրիկներ ու հակինթներ կան, կզարմանաք, վայրենի, իհարկե։
հայրիկից
