Էջ:Թումանյանի ԵԼԺ հ10.djvu/235

Վիքիդարանից՝ ազատ գրադարանից
Jump to navigation Jump to search
Այս էջը հաստատված է




225. ԳԱՐԵԳԻՆ ՀՈՎՍԵՓՅԱՆԻՆ
Էջմիածին

Սուրբ էջմիածնի Գևորգյան ճեմարանի բարձրապատիվ

տեսչին՝

Գարեգին վարդապետին

Հովհաննես Թումանյանից

ԽՆԴԻՐ

Իմ որդի Համլիկը ուսումնական տարվույս կեսից դադարել է հաճախել ճեմարան թոշակն իր ժամանակին չվճարելու պատճառով, որ առաջացել է իմ ամիսներով տանիցս բացակայելուց1։ Այժմ խոնարհաբար խնդրում եմ չվճարված թոշակի խնդիրը ներկայացնել Նորին Վեհափառության բարեհաճ տնօրինությանը, թույլ տալով շարունակել նրան իր ուսումը, որ ընդհատված է վերև հիշած պատճառով։

Հովհ. Թումանյան

10 օգոստոսի, 1915, Ս․ Էջմիածին

226. ՀԱՅՈՑ ԱԶԳԱՅԻՆ ԲՅՈԻՐՈՅԻ ԿԵՆՏՐՈՆԱԿԱՆ ԿՈՄԻՏԵԻՆ

էջմիածին– Թիֆլիս

1915, օգոստոսի 14, Էջմիածին

Ընդհանուր աղետի մեջ առանձնապես սոսկալի է ձգված և որբացած երեխաների վիճակը։ Ճեմարանի ամբողջ շենքը բռնել է որբանոցը, ընդունվածների թիվը անցել է երեք հազարից և նոր որբանոց է բացվում բաց օդում։ Թիֆլիսից և Ալեքսանդրապոլից եկած խմբերը լրացրին աշխատավորների կազմը բավարար չափով։ Անհրաժեշտ է, որ քաղաքները պատրաստվեն ընդունելու երեխաներին մոտիկ օրերս։

Հովհ. Թումանյան