Էջ:Թումանյանի ԵԼԺ հ9.djvu/35

Եթե լուսանկար<իչ> Փափազյանցն այդտեղ է, Սմբատից փողերն ստացիր³, պատկերդ քաշել տուր և ուղարկիր։

Քո Հովհաննես Թումանյան



14. Մկրտիչ Բարխուդարյան Թիֆլիս―Մոսկվա

<1890>, սեպտեմբեր 24, Թիֆլիս

Մեծարգո պարոն

Ստացա Ձեր նամակը¹։ Շատ շնորհակալ եմ, որ բարեհաճել էիք տեղեկություններ դրել տետրակիս մասին։ Կարծեմ արդեն ստացած կլինեք ուղարկածս հիսուն ռուբլին. ահա դարձյալ ուղարկում եմ քսան ռուբլի։

Ընդունեցեք խորին հարգանացս հավաստիքը, որով և մնամ Ձեզ միշտ բարյացակամ՝

Հ. Թումանյան



15.Օլգա Թումանյան Թիֆլիս—Շուլավեր

<1890, սեպտեմբերի 25, Թիֆլիս>

Օլա ջան, իմ անգին,

Այս երեկո ստացա երկրորդ նամակդ¹, ագահ հայացքով մի քանի անգամ նայեցի էջերին և կարոտով կարդացի։

Սիրտս լցվեցավ մի անսահման հրճվանքով և հպարտությամբ, երբ որ կարդացի այն տողերը, որ գրում ես, թե արտասվել ես իմ չգալուս համար… զարմանո՞ւմ ես, հոգիս, որ քո արտասուքով ուրախացա. զարմանալու ոչինչ չկա, շատ բնական է։ Բայց բոլորովին սխալ է, թե ես կարող