նարկների, ստեղծագործ․ միությունների, հրատարակչությունների, հայ պարբ․ մամուլի մոտ 200 տարվա պատմության ու մամուլի խմբագրությունների գործունեությանն առնչվող փաստաթղթեր, դրանց հավաքածուներ, անձն․ ծագման փաստաթղթեր։ Արխիվի ֆոնդերի թիվը (1999) մոտ 270 է՝ 80037 միավորով։ Արխիվի հիմնադիր տնօրենն է Ա․ Բեհբությանը։
6․ Հայաստանի Հանրապետության գիտատեխնիկական փաստաթղթերի կենտրոնական պետական արխիվ (ՀՀ ԳՏՓԿՊԱ), ստեղծվել է ՀԽՍՀ կառավարության 1979-ի նոյեմբ․ 5-ի որոշմամբ՝ ՀԽՍՀ Հոկտեմբերյան հեղափոխության և սոցիալիստական շինարարության ՊԿԱ-ում 1975-ից գործող գիտատեխ․ փաստաթղթերի բաժնի հիման վրա, ՀԽՍՀ կառավարությանը կից, Երևանում։ Գործում է 1980-ի հունվ․ 1-ից։ Արխիվի կազմի մեջ մտնում են․ ԳՀ, տեխնոլոգ․ նախագծային հիմնարկությունների, գիտաարտադր․ միավորների գործունեությամբ առաջացած և անձն․ ծագման փաստաթղթեր, որոնք համարվում են Հայաստանի ազգ․ արխիվային ֆոնդի (ՀԱԱՖ) անբաժանելի մաս։ Արխիվի ֆոնդերի թիվը (1996) 81 է՝ 91․870 միավորով։ Պահվում են նաև 23․000-ից ավելի լուսանկար և 15 անձն․ արխիվ՝ 2476 միավորով։ Արխիվի հիմնադիր տնօրենն է Գ․ Մկրտչյանը։
Գրկ․ Հայաստանի պետական արխիվները, Ե․, 1983։
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿՐՈՆԻ ԳՈՐԾԵՐԻ ՊԵՏԱԿԱՆ ԽՈՐՀՈՒՐԴ կառավարությանն առընթեր, կրոնական կազմակերպությունների նկատմամբ պետական քաղաքականությունն իրականացնող մարմին։ Ստեղծվել է 1943-ին։ Հսկում է ՀՀ սահմանադրությամբ խղճի ազատությունը երաշխավորող օրենքների կիրառումը։ «Խղճի ազատության և կրոնական կազմակերպությունների մասին» ՀՀ օրենքի համաձայն, գրանցում, օրինական գործելու արտոնագիր է տալիս կրոն․, կրոնա-բարեգործական կազմակերպություններին, ընդունում նրանց գործունեությունը կասեցնելու որոշումներ, իրագործում կապը պետության և կրոն․ կազմակերպությունների միջև, միջնորդում նրանց միջև ծագած խնդիրների լուծմանը, աջակցում կրոն․ կառույցների նորոգման աշխատանքներին ևն։
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ՊԱՐԳԵՎՆԵՐ, սահմանվել են ՀՀ 1993-ի հուլիսի 26-ի օրենքով։ Հայաստանի Հանրապետության բարձրագույն պետ․ պարգևն է Հայաստանի ազգային հերոս կոչումը։ Այն շնորհվում է Հայաստանի Հանրապետությանը մատուցած բացառիկ ծառայությունների համար։ «Հայաստանի ազգային հերոս» կոչման արժանացածներին հանձնվում է Հայրենիքի շքանշան և ՀՀ նախագահի պատվոգիր։
Մարտական խաչ շքանշանը շնորհվում է հայրենիքի պաշտպանության և անվտանգության գործում ցուցաբերած բացառիկ արիության, անձնուրացության համար։ Մարտական խաչ շքանշանն ունի երկու աստիճան՝ առաջին և երկրորդ։
Սուրբ Մեսրոպ Մաշտոցի շքանշանը շնորհվում է ՀՀ տնտեսության զարգացման, բնական և հաս․ գիտությունների, գյուղատնտեսության, մշակույթի, կրթության, առողջապահության, հաս․ գործունեության ասպարեզներում ձեռք բերած ակնառու նվաճումների, նաև արտասահմ․ երկրների հետ գիտատեխ․, տնտ․ և մշակութ․ համագործակցության զարգացմանը նպաստող գործունեության համար։
Արիության մեդալը շնորհվում է հայրենիքի պաշտպանության գործում ցուցաբերած անձն․ խիզախության, կյանքին սպառնացող վտանգի պայմաններում ծառայողական կամ քաղաքաց․ պարտքը կատարելու համար։ Պարգևատրվում են ՀՀ զինված ուժերի, ներքին գործերի և ազգ․ անվտանգության նախարարության, արտակարգ իրավիճակների պետ․ վարչության ծառայողներն ու այլ անձինք։
Մարտական ծառայության մեդալը շնորհվում է մարտական առաջադրանքների կատարմանը նպաստող հմուտ, նախաձեռնող, համարձակ գործողությունների, երկրի սահմանները պաշտպանելիս ցուցաբերած ծառայությունների համար։
Մխիթար Գոշի մեդալը շնորհվում է ակնառու պետ․ և հաս-քաղ․ գործունեության, նաև դիվանագիտության, իրավագիտության և քաղաքագիտության ասպարեզներում ունեցած նշանակալի ծառայությունների համար։
Մխիթար Հերացու մեդալը շնորհվում է ՀՀ առողջապահության զարգացմանը մատուցած ծառայությունների, բարձր մասնագիտական, գործնական աշխատանքի, ինչպես նաև բարեգործ․ գործունեության համար։
Անանիա Շիրակացու մեդալը շնորհվում է արդ-յան, ճարտարագիտության, ճարտարվեստի, գիտության և տեխնիկայի բնագավառում ակնառու գործունեության, նշանակալի գյուտերի և հայտնագործությունների համար։
Մովսես Խորենացու մեդալը շնորհվում է մշակույթի, գրակ-յան, հումանիտար գիտությունների, արվեստի բնագավառում ունեցած ստեղծագործ․ ակնառու նվաճումների համար։
Յուրաքանչյուր շքանշան և մեդալ ունի փոխարինող շերտաձողիկ։
ՀՀ բարձրագույն պարգևը շնորհում, ՀՀ շքանշաններով և մեդալներով պարգևատրում է ՀՀ նախագահը, որն այդ մասին հրապարակում է հրամանագիր։
ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ 1918_20, պետություն, հռչակվել է 1918-ի մայիսի 28-ին։ Տարած․ 58 հզ․ կմ 2
