Ազատութիւնից զրկուեց նաև Դրիասի որդին, Թրակիայի արքայ անզուսպ Լիկուրգը, որին Դիօնիսիոս աստուածը փակեց քարէ բանտի մէջ ի պատիժ նրա անպատկառութեան։ Այնտեղ հետզհետէ հանդարտուեց նրա մոլեգնութիւնը, որ հասել էր ծայրայեղ չափի։ Նա ստիպուեց խոստովանել, որ իր խելագարութեան մէջ անարգում էր աստծուն ամբարտաւան լեզուով և արգելում ջահեր վառել Բաքոսի խորհրդատօներին, որով գրգռում էր զայրոյթը սրնգասէր մուսաների:
Այնտեղ, ուր ջրաբաժանն է երկու ծովերի, Սև ժայռերի մօտ, Թրակեան Բոսֆորի ափին, անհիւրընկալ Սալմիդէսում, մերձաբնակ Արէսը տեսաւ մի օր Ֆինէասի երկու այլանդակուած որդիներին, որոնց կուրացրել էր իրանց սևահոգի խորթ մայրը։ Արիւնլուայ եղունգներով և սուր կկոցով հանած աչքերը վրէժ էին հայցում:
Սգալով իրանց սև բախտը, հիւծւում էին այդպէս իրանց մօր տխուր ամուսնութեան այդ երկու թշուառ ծնունդները։ Եւ սակայն նրանց մայրը պատկանում էր Երեքթեան հինաւուրց տոհմին և սերում էր աստուածներից, որովհետև Բորէասի [1] դուստրն էր, մեծացել էր գահավէժ ժայռերի լանջին, հեռաւոր քարանձաւներում, իր հօր հողմերի մէջին, և արագավազ էր, ինչպէս մի նժոյգ: Բայց նրան էլ, սիրելի որդեակ, խորտակեցին ճակատագրի պառաւ դիցուհիք։
(Երաժշտությունը դադարում է։ Ալեւորները վերադառնում են իրանց առաջուան տեղը, հրաժեշտ տալով Անտիգոնէին ձեռների այնպիսի շարժումով, որ օրհնութիւն է նշանակում)։
ՎԵՑԵՐՈՐԴ ԱՐԱՐՈՒԱԾ
ԱՌԱՋԻՆ ՏԵՍԱՐԱՆ
ՊԱՐԸ, ԿՐԷՕն ԵՒ ՏԻՐԵՍԻԱՍ
(Լռում է սկզբում հեռուից, յետոյ աւելի ու աւելի մօտիկից քարքարոտ գետնին դիպչող գաւազանի ձայն։ Վերջապես երեւում է կոյր ծերուկ Տիրեսիասը մի ուղեցոյց տղայի հետ)։
Տիրեսիաս.(ալեւորների խմբին դիմելով) Իշխանք Թեբացոց.
- ↑ Հիւսիսային հողմերի աստուծաը։ Նրա աղջիկը Կլէօպատրա անունով ամուսնացել էր ՖինԷաս թագաւորի հետ։ Սա արձակեց ու բանտարկեց իր կնոջը Կլէօպատրային, որից երկու տղայ ունէր, և ամուսնացաւ Սկիւթացոց արքայի աղջկայ Իդէայի հետ, որ կուրացրեց իր խորթ զաւակներին:
