— Եպիսկոպոս ըլլալու համար կերթամ կոր, ըսած էր։
— Ատիկա մեզի խաբած է, եպիսկոպոս պիտի ըլլամ ըսելով գնաց, կաթողիկոս եղավ եկավ։
— Ի՞նչ կըսեք։
— Այո՛, ինքզինքը քահանայապետ կ՛անվանե կոր, լսածնուս նայելով գալ շաբթու ալ Ամբրոսիոս վարդապետին եպիսկոպոսության աստիճան պիտի տա եղեր։
— Աստված շնորհք տա։
⁂
Քրաաթխանեի մը առջև
— Հայրիկ այս ո՞ր չափ քալեմ օտասի կա։
— Տղաս, ասիկա ընթերցարան է, քալեմ օտասի չէ։
— Հապա առջի օրը քալեմ օտասի գացինք նե՝ հոն ալ ասանկ ամեն մարդ սիկառնին վառած, ձեռքերնին մեյ մեկ լրագիր առած կը կարդային կոր։
⁂
Սենյակի մը դռան վրա սապես գրված է։
Գործ չունեցողը ներս չկրնար մտնալ:
Մարգար աղան հիշյալ սենյակին մեջ քանի մը երիտասարդներու քնանալը տեսնելով․
— Օ՜հ, ըսավ, եթե քնանալու համար ալ ամսական կը տրվի, մեր Ուսումնական խորհրդին ինչո՞ւ ամսական մը չեն կապեր կոր։
⁂
— Հելվաճի՛, աղվոր թայըն հելվասի ունի՞ս։
— Հելվա ունիմ, բայց թազե է, քանի մը օրեն եկուր պայաթլամիշ ըլլա ու առնես։ — Դուն ալ Մեճմուա մի՛ կտրիր գլխուս։
— Ինչո՞ւ։
— Ան ալ անանկ կ՝ըսե, թազե լուրեր ունինք, բայց մինչև որ պայաթլամիշ չըլլան չենք կրնար տալ։