Զհաստեալն ի վերայ հիման:
Իսկ գթած տէրըն բարի
Զնա պահեաց առանց սասանման
Եւ յաւել նըմա շնորհ զգալի՝
Տուն շինել նմա տիրական:
Տաճարաց հոգաբարձու
Յաստուծոյ էառ հրաման,
Թէ սովաւ յայտնի լինի
Այս խախտեալ ազգիս ի հիման:
Թէ սա է շինօղ բարի
Լքելոցն յուսահատութեան,
Զմեղօք կործանեալս կանգնէ
Եւ սանէ տաճար տիրական:
Կարծեմ, թէ սա էր ճրագն
Ըստ պետին առաքելական,
Որ ի գիշեր կենցաղոյս
Խաւարչուտ և նսեմական
Ճաճանչ նշուլից փայլեաց
Եւ շաւիղ բանայր նա մարդկան,
Մինչ տիւն լուսաւորի
Արուսեկի մեծի ծագման:
Համրեր սա համբերելով,
Խիղճ մտօք ի գուբ տղմական,
Մինչև լուաւ աղօթից
Արարիչ տէրըն գթական:
Եհան ի կաւէ գրոյն,
Ի վիմին եդ հաստատութեան
Եւ արկ ի բերան նորա
Օրհնութիւն ըստ երգոյն Դաւթեան:
