Տնականչ

Վարդան Հակոբյան

ՏՆԱԿԱՆՉ

Երթանք, լույս դառնանք Երեք Մանկուքում,
Թախիծը կրկին հասցեն չի փոխել,
Արցախը հուսո դուռն է Աստծո,
Աիդան գնաց - Մշո Անահիտ,
Խաչ հանված, սակայն հառնող Արցախս...

Թարթառը թելն է երկնավոր զանգի,-
Տուր բառը՝ նռնակ տանեմ Ավարայր,
Խաչվեց Խաչենում ճամփան Տարոնի,
Ափիս մեջ Տերը անմեռ հույս դրեց.
Տիարք, այգը մեր առջեւում է դեռ...

Իմ Սոսեն տվեց անունն Աղբյուրի,-
Սիրտս Մեծ քարից կախված զանգակ է,
Սուրբ մանանայի համն առ Քարինգում,
Գնդակ եմ ձուլում ես իմ աչքերից.
Քաշի՛ր, Արցա՛խս, հորովելս, հո...

Արցունքը կաթուկ տվեց շյուղերից,-
Բարեւ... Սա ձիու հետքն է Նժդեհի,
Կարոտս տարեք Թառամնի ջրին,
Իմ զույգ թեւերը թրեր են երկու.
Տուն եկեք, տիարք, որ տունը տո՛ւն գա...