Օր. Պ. Պ.-ին

Վիքիդարանից՝ ազատ գրադարանից
Ավերակում Օր. Պ. Պ.-ին

Հովհաննես Թումանյան

Parodia



ՕՐ. Պ. Պ.-ԻՆ



Քույրիկ, այդքան որ սիրում ես
Հայի հնչյուն, հայի տաղ,
Որ սրտալի մեծարում ես
Ազգիդ երգչին դեռ մատաղ,

Ներշնչում ես նորա հոգուն
Հզոր թռիչք և եռանդ,
Եվ հիշում է նա յուր մտքում
Յուր պաշտոնը երկնավանդ,

Այս հարազատ ներշնչանքի

Փոխարենը ընդունիր
Նորա սիրո և տանջանքի
Անվարժ տողերն ինքնագիր։


1909