Էջ:Թումանյանի ԵԼԺ հ9.djvu/377

չկարողացավ։ Բայց, ափսոս, էլ տեղ չկա, հետո կխոսենք։

Համբուրում եմ՝

Քո Օհանես

223. ՕԼԳԱ ԹՈԻՄԱՆՅԱՆԻՆ

Աբասթուման-Թիֆլիս

<1902> , 20 նոյեմբերի, Աբասթուման

Քեզ մյուս փոստին նամակ կգրեմ։ Ամսի մեկին կամ երկուսին դուրս կգամ։ Ես լավ եմ։

Мmе Олге Васильевне Туманян

Тифлис,

Бебутовская № 50

224. ՕԼԳԱ ԹՈԻՄԱՆՅԱՆԻՆ

Աբասթուման-Թիֆլիս

<1902>, 22 նոյեմբերի, Աբասթուման

Օլյա ջան,

Մի ժամանակ կարգին ամեն փոստի նամակ էիր գրում, վերջերս չգիտեմ ինչու ես ծուլացել։

Ասում ես՝ մի երկու նամակ էլ հազիվ գրեմ¹։ Այո՛, մինչև գալս ամենաշատը երեք նամակ պետք է գրես, այսքան նեղությունն էլ քաշիր։ Ես, ինչպես գրել եմ, ամսի 2-ին դուրս կգամ²։

Բժշկի կնոջից նամակ ունեի, այսօր պատասխանեցի³։ Իշխանուհուց էլ հենց նոր ստացա⁴։ Ռուստեմն այսօր պետք էր Թիֆլիս գար։ Մի՛ վախենար, ոչ մի ֆրանսուհի չի ուղարկել, այնպես որ չփախչես… Իսկ իմ սիմպատիան շատ մազալու մարդ դուրս եկավ⁵։ Բայց և այնպես, ավելի լավ է այդպես տարօրինակ լինել, քան թե ուրիշ տեսակ։ Մի աղջիկ, որ իր եղբորը երեք տարին մի նամակ է գրում, նրանից ես ինչ պահանջեմ։ Իսկ քեզ մոտ երևի նրա համար