օղակը ժամանակի ընթացքում ձևափոխվում է, ուստի նպատակահարմար է սիֆոնը հավաքելիս այն փոխարինել նորով։
Խողովակաձև սիֆոնը մաքրելու համար հանում են կափարիչը, կոշտ մետաղալարով մաքրում սիֆոնի ներսի պատերին նստած կեղտը։ Խորհուրդ է տրվում մաքրելու ընթացքում տաք ջրաշիթով լվանալ սիֆոնի ներսը։
Եթե սիֆոնը մաքրելուց հետո ջուրն առաջվա պես դանղաղ է հեռանում, նշանակում է կեղտոտված է կողմնատար խողովակը (լվացակոնքից մինչև կանգնակը), որը մաքրում են պողպատե ճկուն լարով կամ 4-5 մմ տրամագծի՝ փշոտ ծայրով պողպատե ճոպանով (նկ. 12)։
Ողողման բաքի հիմնական անսարքությունը ջրի մշտական հոսքն է բաքից դեպի զուգարանակոնք։ Այս անսարքությունն առաջանում է տանձիկի պատերի ձևափոխման (տանձիկը կիպ չի նստում թամբին) և տանձիկի ձգաձողի արգելակման հետևանքով (նկ. 13)։ Տանձիկի գնդաձև մասը ժամանակի ընթացքում կորցնում է առաձգականությունը։ Այս դեպքում հարկավոր է տանձիկը փոխարինել կամ հին տանձիկը կիպ խծուծել վուշաթելով, պարկագործվածքով կամ առասանով (սինթետիկ մանրաթելից)։ Եթե տանձիկի պատերը ձևափոխված չեն, սակայն հոսարանը չի փակվում, ապա տանձիկը ծանրացնում են՝ ձգաձողին հագցնելով մի քանի խոշոր մանեկ։ Ջրի հոսք կարող է առաջանալ նաև, երբ թամբը քայքայվել (ժանգոտել) է, և տանձիկը կիպ չի նստում թամբին։ Այդ դեպքում պետք է մաքրել թամբի ժանգի շերտը զմռնիտաթղթով կամ հատուկ ժանգազերծիչ միջոցներով։
Ձգաձողի ծռվածության կամ մակերևույթի խիստ քայքայման պատճառով նրա շարժումը կարող Է արգելակվել։ Ծռվածությունը վերացնում են ձգաձողը հանելով և հարթ տախտակի վրա մուրճով ուղղելով։ Քայքայված (ժանգոտած) ձգաձողը հղկում են զմռնիտաթղթով։ Երբեմն ձգաձողը և լողանավոր կափույրի լծակը կպչում են իրար, որի հետևանքով տանձիկը չի նստում թամբին։ Այս դեպքում լողանավոր կափույրի իրանը շրջում են կամ լծակը մի քիչ թեքում։ Ձգաձողը ծռել չի կարելի։
Ջրի հոսք է առաջանում նաև լողանավոր կափույրի վատ կարգավորված լինելու կամ անսարքության (միջադիրի մաշվածություն, թամբի եզրերի խախտում (նկ. 14) հետևանքով։ Բաքի մեջ ջրի լցվելը կարգավորվում է լողանի լծակի ճկումով։ Միջադիրը փոխելու համար կափույրի իրանից հանում են պլաստմասսայե կափարիչը, դուրս քաշում լողանավոր լծակի սռնին և հանում կափույրի կոթը, որի ծայրին ամրացված է ռետինե միջադիրը։ Միջադիրը փոխարինելուց հետո տեղադրում են կոթը, ամրացնում լծակը և հագցնում կափարիչը։ Թամբի թերությունները (փոսերը) վերացնում են նույն եղանակով, ինչ ծորակի կամ վենտիլի դեպքում։
Ջրթող լծակի սխալ դիրքը նույնպես կարող է բաքի հոսարանի վատ փակվելու պատճառ դառնալ։ Այս դեպքում ստուգում են լծակի ամրակապումը՝ բոլոր պտուտակները պետք է լավ ձգած լինեն, քառանկյուն թիթեղը ելուստով պետք է սեղմված լինի բաքի պատի փորվածքի ստորին մասին։ Եթե թիթեղը ճիշտ է տեղադրված, և պտուտակները ձգված են, բայց տանձիկը չի փակում հոսարանը, պետք է դիմել մասնագետի։
ՍԱՌՆԱԽՑԻԿ կենցաղային, նախատեսված է սննդամթերքի արագ սառեցման և այդ վիճակում երկար ժամանակ պահելու համար։ Օրինակ, միսը Ս-ում կարելի է առանց էական որակական փոփոխության պահել 6-8 ամիս, ձուկը՝ 2-3, բանջարեղենն ու միրգը՝ 8-12։
Ս-ի և սեղմումային տեսակի սովորական սառնարանի աշխատանքի սկզբունքը նույնն է. տարբերությունը գլխավորապես Ս-ի զգալիորեն ավելի մեծ սառնարտադրությունն է, որը հնարավորություն է տալիս մթերքը սառեցնել մինչև -25 և պահել -18 °C –ից ոչ բարձր ջերմաստիճաններում։ Ս-ում ստացվող մինուսային ջերմաստիճանի առավելագույն չափը նշվում է դռան արտաքին կողմին (Ս-ի մոդելի անվանման կողքին) կամ սառեցնող խցիկի ներքին դռնակի վրա՝ աստղանիշերով (ձյունափաթիլներով). մեկ աստղիկը նշանակում է –6 °C, երկուսը՝ -12 °C ևն։ Գույնով մյուսներից տարբերվող մեկ մեծ աստղիկը ցույց է տալիս սառեցման այն առավել ցածր ջերմաստիճանը, որը կարելի է ստանալ ցածրջերմաստիճանային բաժանմունքում Ս-ի ուժգնացված ռեժիմով աշխատանքի պայմաններում, այսինքն՝ անընդմեջ աշխատող ճնշակով։
Մթերքը Ս-ում տեղավորելուց առաջ հարկավոր է խնամքով փաթեթավորել անջրանցիկ նյութով (օրինակ, պոլիէթիլենային թաղանթով կամ ծրարով, նրբաթիթեղով, ցելոֆանով), մթերքը սառեցված վիճակում երկար ժամանակ պահելու դեպքում խոնավության սառնախտացումից խուսափելու համար։ Մթերքը ուժեղ սառեցնելու համար նախ անհրաժեշտ է տեղավորել Ս-ի վերին ցածրջերմաստիճանային բաժանմունքում։ Սառչելուց հետո մթերքը տեղափոխում են Ս-ի ներքևի բաժանմունք (դատարկ թողնելով վերևի խցիկը) և սարքը բերում աշխատանքի բնական ռեժիմի։ Սառեցնող խցիկում ջերմաստիճանը կարգավորվում է ջերմակարգավորիչով, որն ունի հաստատուն լարք և ավտոմատ կերպով պահպանում է տրված ջերմաստիճանը։
Ս-ի տեղակայումը և օգտագործման ձևը գործնականում չեն տարբերվում
