Էջ:Ghazaros Aghayan, Collected works, vol. 4 (Ղազարոս Աղայան, Երկերի ժողովածու, հատոր 4-րդ).djvu/568

Վանքը բոլորովին առանձնացած է մի խոր ձորում բարձր սարալանջի վրա, շրջապատված խիտ անտառով։ Ունի երկու հատ հորդաբուխ աղբյուր, որոնց ջուրը կարելի է անմահական համարել։ Պետք է զարմանալ Խորեն սրբազանի համբերության վրա, թե ինչպե՞ս է դիմանում այդ վայրենի անապատում, քանի որ այդ տեսակ կյանքի հարմար չէ ոչ իր բնավորությունը և ոչ կրթությունը։

39. ՀՈՎՀԱՆՆԵՍ ԹՈԻՄԱՆՅԱՆԻՆ

(Թեոդոսիայից - Թիֆլիս)

1899 թ., սեպտեմբեր 20

Թեոդոսիա, ուր այսօր տեղափոխվեցանք։ Այսուհետրև մեր հասցեն կլինի Феодосия, Агаянцу, ուրիշ ոչինչ, թե նամակ լինի և թե՛ հեռագիր։ Նամակներդ ստացել եմ. երկար գրելու դեռ ժամանակ չունիմ։ Շնորհավորում եմ յոթերորդ զավակիդ լույս աշխարհ գալը։ Մարմնավոր բեղմնավորությունը առաջ կբերի և մտավոր։ Դու մեկ երկար նամակ գրի. չմոռանաս և տեր Օսեփի մասին գրել…

Քո Աղայանց

Այս հասցես տուր Աղաբեկին և «Տարազ»-ին։

40. ՀՈՎՀԱՆՆԵՍ ԹՈԻՄԱՆՅԱՆԻՆ

(Թեոդոսիայից - Թիֆլիս)

1899 թ., հոկտեմբեր 25, Թեոդոսիա

Սիրելի իմ Ասլան-Բալա.

Գալու օրերս մոտենում են, դրա հետ միասին նեղ օրեր են գալիս, ոչ ծախսելու և ոչ ճամփի փող չունիմ. անակնկալ ծախսեր ունեցանք։ Աղաբեկին դրել եմ, քեզ տեսնի վարդապետից փող ստանալու համար։ Եթե դու առել և ծախսել

568