— Չկրնա՜ր ըլլալ, որ սպասավորներս ալ առջևս բարև բռնած հանենք։
— Շատ աղեկ կըլլա։
— Իբա՜վ կըսեք։
— Այո՛։
— Օրինակի համար ես ագարակներ ալ ունիմ, որոց մեք
շատ մը կովեր, ոչխարներ, ձիեր, սագեր, բադեր կան, անոնք
ալ կարելի չէ՜ պատկերին մեկ կողմը դնել։
— Ատոնք կարելի չէ, բայց սպասավորներդ կրնաս առնել,
այնպես չէ՜, պարոն Դերենիկ։
— Այո՛, այնպես է, պատասխաներ պատկերահանը։
— Չկրնա՜ր ըլլալ որ, հարցուր նորեն Աբիսողոմ աղան,
պատկերին տակը գրվի, որ այս մարդն ագարակներ, ձիեր,
կովեր, էշեր ունի։
— Ատ չգրվիր՝ կրնա գրվիլ, բայց մինչև այսօր սովորություն
եղած չէ։ Սակայն ի՞նչ հարկ կա զանոնք գրելու, արդեն
ամեն մարդ շուտով կ՝իմանա։
— Ձիու վրա նստած կրնա՜ք հանել:
— Այո՛, պատասխանեց Դերենիկը։
— Չին վազցունելով սակայն։
— Ատ դժվար է։
— Շատ լավ, վաղը կը նայինք։
— Եթե կուզեք, մեքենան հոս բերեմ վաղը։
— Այո՛, այո՛, հոս բերե՛ք, կրկներ Մանուկ աղան, վասնզի
չվայլեր, որ Աբիսողոմ աղան ձեր սենյակը գա։ Մեծ
մարդերը միշտ իրենց տուներուն մեջ քաշել կուտան պատկերնին։
— Գլխուս վրա, ըսավ Դերենիկն և ձեռները շփել սկսելով՝
ոտքի վրա ելավ և կոտրվիլ սկսավ այնպես, որ խոսք մը
ըսել կ՝ուզեր և կը քաշվեր։
Հայտնի է, թե այն մարդն, որ բան մը ըսել կ՝ուզե և կը
քաշվի, անպատճառ ստակ պիտի ուզե։
— Վաղը մեքենան հոս բե՛ր, ըսավ Աբիսողոմ աղան։
— Շատ լավ, պատասխաներ պատկերահանը միշտ կոտրտվելով
և ձեռները շփելով։