Ինչո՞ւ համար մեր կիները միշտ դեպի Եվրոպա կը վազեն.
— Որովհետև Ասիո մեջ քյուրտերը միշտ հարստահարություն կընեն:
Ինչո՞ւ համար տեր պապաները հիմա պսակդրամը կանխիկ կառնեն.
— Որովհետև ետքի մնա նե՝ կարգվող մարդը տվածդ քեզի ըլլա ըսելով՝ ստակի տեղ առած աղջիկը ետ պիտի տա:
⁂
Ինչո՞ւ համար հին ատենը հայ այրերը իրենք սենյակին վերի ծայըը կը նստեին ու կիները իրենցմե վար կը նստեցնեին.
— Որովհետև այն ատենը տունին տերն էին։
Ինչո՞ւ համար Եվրոպայի մեջ շատ այրեր կիներնին կը նստեցնեն ու իրենք ոտքի վրա կը կենան.
— Որովհետև քովերնին շատ չկայնելով փախչելու միտք ունին։
Ինչո՞ւ համար տերությունը Պոլսո մեջ գիշերները կազ վառելու որոշում կընե.
— Որովհետև հայերը գիշեր ցերեկ լույս կը պոռան։
Ինչո՞ւ համար հայ երիտասարդներուն մեկ մասը մեկ աչքերնին ակնոց կը դնեն.
— Որովհետև մեկ աչքերնին կը տեսնե մեկը չտեսներ։
Ինչո՞ւ համար աղջիկներուն մեկ մասը իրենց մազերը կը կտրեն.
— Որովհետև մազը երկան խելքը կարճ ըսվիլ չեն ուղեր։
Ինչո՞ւ համար հայերը միշտ օտար ազգաց ետևեն երթալ կուզեն.
— Որովհետև իրենք ճամբան չեն գիտեր, ճամբա մալ չեն գիտեր։
Ինչո՞ւ համար մեր երեսփոխանները եվրոպական ազգաց երեսփոխաններուն պես աջակողմյանի ու ձախակողմյանի բաժնված չեն։
— Որովհետև մերիններուն ամեն մեկը մեկ մեկ կողմ բաժնված են։
Ինչո՞ւ համար կիներն ալ Ազգային ժողովո ունկնդիր չեն ըլլար.
— Որովհետև կիները խոսիլ գիտեն, բայց մտիկ ընել չեն գիտեր։
