⁂
Խոսել մի՛ տար զիս, ընթերցող, որովհետև բնության մեջ ալ այլանդակ բաներ տեսնե, սկսա:
Ի՞նչ հարկ կա ականջ տալ այն մարդուն՝ որուն խոսելու պաշտոն ավեր է բնությունը, ի՞նչ հարկ կա լեզու տալ այն մարդուն՝ որուն լսելու պաշտոնը տվեր է բնությունը։
Գլուխը մարդուս ջրամբարն է, որուն ծորակն է լեզուն։ Ո՞վ բնություն, ինչո՞ւ ծորակ դրեր ես այդ ջրամբարին՝ որուն մեջ ջուր լեցուցած չես։
Այդ տեսակ մարդիկ կը նմանին աղբյուրի մը, որ ծորակ ունին և ջուր չունին։ Այդ տեսակ մարդիկ ըստ իս զարդի համար ստեղծված են, և կը նմանին հայկական այն բառերուն՝ որք զարդի համար միայն կը գործածվին պերճախոսության մեջ։
Ո՜վ Մանզումե, եկո՞ւր իմ զվարճական պերճախոսությունս քիչ մը զարդարելու...
⁂
Կիմացունեն մեզ, թե Խասգեղի 3 թիվ շոգենավը յուր ղեկին դեմ ապստամբելով իրեն ուզած տեղը կերթա կոր եղեր։
Ահա տրամաբան շոգենավ մը։ Եվ ի՞նչ է ղեկը։
— Առաջնորդ մը, որ ետևեն կուգա։
Խասդեղցիք նկատողության առնելով այս շոգենավին ապստամբությունը իրավացի դատեր են, և որոշեր են Խալըճի-օղլուեն չվանով քաշել հիշյալ շոգենավը, մինչև որ ղեկը հանձն առնու շոգենավին առջևի կողմը կայնելով առաջնորդություն ընելու։
⁂
— Հառաջիկա ուրբաթ ավուր Երեսփոխանական ժողովին ո՞վ պիտի Նախագահե։
— Հայր արդարությունը։
⁂
Կըսվի, թե՝ այս օրերս եկած հորդառատ անձրևներու պատճառով Սկյուար բանող շոգենավներուն մեջ նավակ բանիլ սկսեր է։