⁂
Ամեն մարդ գիտցածը կըսե, Փունջ ալ ուզածը կըսե։
Պատրիարքը, կըսե Փունջ, կուզե հրաժարի, կուզե չհրաժարի, պարտավոր է երեսփոխանության դռները բռնաբարողները պատժել, եթե կուզե պատվով հրաժարիլ։
Ահա մարդ մը, որ կախաղան ելած կախվելու վրա է. Փունջը այս մարդուն քղանցքեն կը քաշե ու կըսե.
— Գոնե ֆեսիդ բյուսկյուլը շտկեիր ու անանկ կախվեիր...
⁂
Քանի որ շըմենտըֆերը անցած տեղերեն անոր ասոր գլուխը կը կտրե, և քանի որ պարոն էբշթեյն ալ գլուխ կը կտրե կոր և դարձյալ տեղը կը դնե կոր, կառաջարկենք, որ պարոն էբշթեյն կտվելու գործը շըմենտըֆերի թողու և ինքը միայն կտրված գլուխը տեղը դնելու պաշտոնը ստանձնե։
⁂
— Երկու անգղիացի իրարու հետ խոսած ատեննին մտքեդ ի՞նչ կանցնի։
— Արտասանության դժվարությունը տեսնելով կիսեմ, թե Աստված ուզելով, որ անգղիացիք շատ չխոսին, անոնց ասանկ դժվարաթավալ լեզու մը տվեր է, ինչպես որ իտալացվոց ալ սահուն լեզու մը։
— Է՜յ, այդ լեզվին դժվար արտասանութենեն մեր ազգին համար օգուտ չկրցի՞ր քաղել։
— Կը փափագեի, որ շատ խոսողներուն ի պատիժ այս լեզուն սորվեցնեն։
— Հասկցա՛, Պեկյան էֆենտին կակնարկես...
⁂
— Լուսնին երեսը ինչո՞ւ համար խավարեցավ առջի գիշերը.
— Փափազյանին երեսին վրա բոլոր աշխարհի գաղափար մը տալու համար։
