Էջ:Hagop Baronian, National Bigshots (Յակոբ Պարոնեան, Ազգային Ջոջեր).djvu/46

Վիքիդարանից՝ ազատ գրադարանից
Այս էջը հաստատված է

Իւթիւճեան.—Ես ալ չունիմ:

Տէրոյենց.—Ամեն թերթի մէջ ինծի կ'անպատուէ:

Իւթիւճեան.—Սուտ է,ես բնաւ անպատուած չեմ զինքը. ես ճշմարտութիւնը կը գրեմ. ինքն է որ կ՚անպատուէ զիս դռնամիջեան հերետիկոս անուանելով:

Սրբազան Պատրիարք.—Ինչո՞ւ ատանկ բաներ կը գրես,պատուելի:

Տէրոյենց.—Որովհետեւ Նալբանդեանն ալ դռնամիջեան է, եւ այս Նալբանդեանը համարձակեցաւ օր մը դիւաց գոյութիւնը ուրանալ:

Տ. Ց. Հիւնքեարպէյէնտեան.—Ատկէ բոլոր դռնամիջեաններուն հերետիկոս ըլլալը կը հետե՞ւի:

Տերոյենց.—Չհետեւի՞ր մի եա:

Իւթիւճեան.—Միշտ պապականութիւնը կը պաշտպանէ եւ երբ Հայաստանեայց եկեղևցւոյ դէմ յարձակում տեսնէ՝ ձայն չհաներ:

Տերոյենց.—Հայաստանեայց եկեղեցին պաշտպանութեան պէտք չունի:

Սրբազան Պատրիարք.—Պատուելին ասկէց վերջը Հայաստանեայց եկեղեցին պաշտպանելով այս արատն վրայէն կը ջնջէ:

Տէրոյենց.—Կը պաշտպանեմ.բայց նախ պատիւս տեղը բերէք:

Հիւնքեարպէյէնտեան.—Սակարկութի՞ւն կ՚ընէք պատուելի:

Տէրոյենց.—Ի՞նչ իրաւունքով ինձի եօթանասնամեայ ըսած է Մասիսի մէջ:

Իւթիւճեան.—Եթէ եօթանասնամեայ ըսած ըլլալուս համար հերետիկոս եղած կ՚ըլլամ, բուն տարիքդ զրուցէ, շաբաթ աւուր Մասիսի մէջ հրատարակեմ:

Տէրոյենց.—Միշտ կ՚անպատուէ զիս:

Իւթիւճեան.—Քաւ լիցի. ես խղճի ազատութիւնը կը յարգեմ. եթէ Պատուելին խոստովանի թէ պապական է, այն ատեն բան մը չեմ ըսեր...: