Մարդահաճութեան ախտիւ
Առերեսս առաքինեցայ
Եւ յառանձնական պահուն
Նաև ոչ մատամբ հպեցայ:
Յարբանեկութիւն սրբոց
Ի ծնօղաց ես ընծայեցայ,
Միշտ ի սրբութեան տեղիք
Առընթեր սրբոց սնուցայ:
Հիւծեալ հոգով և մարմնով
Տղմասիգ գուբըս փակեցայ,
Փոխան շնորհընկալութեան
Յօրհնելոց զանեծս ընկալայ:
Սուրբ վկայարանս կալով
Մանաւանդ յորըս շրջեցայ,
Գործեալ զանհաճոյս սոցա,
Վասն որոյ ես ոչ սրբեցայ:
Նստելով ի տաճարի
Մեծամեծս բարբառեցայ,
Դատեալ ի բանից իմոց
Աւելի դատապարտեցայ:
Փոքրիկ մին գայթակղելու
Խոր ի ծովս հրաւիրեցայ,
Իսկ ես բիւրոց կործանիչ,
Որ մեծ պատժոց գրեցայ:
Անառակ և թիւր գործովք
Ի յարկի տեառն բազմեցայ,
Այն պղծոյն անապատի
Արդարև յոյժ նմանեցայ:
Շինեաց զերդ միեղջերու,
