Ահա՛ ծաղկեցան ծաղիկք, տունկք և ծառք,
Լըսելի եղեն թռչնոց սուրբ բարբառք,
Գոյն առեալ շողին միշտ ծաղկանց կաճառք,
Փայլին գերափառք,
Կանաչ կերպասիւք,
Պերճացան անտառք,
Իբր եղեն բուրվառք:
Ծաղրաճեմ աղբիւրք և գետք յորդանան,
Ծովք և լիճք ծըփին, բերկրին և խայտան.
Երփնազարդ ցընծալ ծովափն շուշան,
Նարդոս, պալասան
Գունով վառվառին՝
Ըստ արեգական
Գերազանց փայլման:
Տեսլեամբ և հոտով գովեալ մանուշակ,
Մանրաթերթ փըթթեալ և ողջ եռորակ,
Ծիրանի, սպիտակ և խոր կապուտակ,
Յոյժ-յոյժ անուշակ,
Խուռներամ լինին՝
Ուր իցեն վտակ
Եւ լեռնադաշտակ: