տրվում է ամբողջ անհրաժեշտ տեղեկատվությունը քննություններին պատրաստվելու համար: Հեռակա բաժնում ուսուցման ժամանակ ուսանողները հաճախում են դասախոսությունների կարճ ժամանակով՝ քննություններ հանձնելուց առաջ: Պարտադիր է համարվում քննաշրջանին հաճախելը և բոլոր անհրաժեշտ աշխատանքների ժամանակին հանձնումը:
Հեռակա ուսուցման ուսանողներին սահմանված քննաշրջանի ժամանակ տրվում է միայն անհրաժեշտ նյութը, իսկ մնացածը մնում է ձեռք բերել ինքնուրույն ուսուցմամբ:
Հեռավար ուսուցման ժամանակ, ամբողջ անհրաժեշտ տեղեկատվությունը ուսանողը ստանում է փոստով կամ ինտերնետային ցանցով՝ էլեկտրոնային փոստի օգնությամբ: Ուսուցման այդպիսի ձևի առավելությունը այն է, որ ուսանողը կարող է ինքնուրույն կերպով հսկել իր ուսումնական գործընթացը և պարապել այն ժամանակ, երբ ունի ազատ ժամանակ: Ուսուցման այդպիսի ձևը շատ հարմար է իրենց կրթության մակարդակը բարձրացնել ցանկացող տարիքով մարդկանց համար, ովքեր ժամանակ չունեն հաճախելու դասախոսությունների:
11.1.2. Նախնական մասնագիտական արհեստագործական և միջին մասնագիտական կրթության նպատակը, խնդիրները
Հայաստանի Հանրապետությունում արհեստագործական և միջին մասնագիտական կրթության նպատակը հայաստանյան աշխատաշուկան որակյալ մասնագետներով ապահովելն է:
Հայաստանի Հանրապետությունում արհեստագործական և միջին մասնագիտական կրթության բնագավառում պետական քաղաքականության խնդիրներն են՝
1) արհեստագործական և միջին մասնագիտական կրթության որակի ապահովումը և բարելավման համապատասխան համակարգի ներդրումը,
2) առաջնային և կարևոր բնագավառների համար մասնագետների պատրաստմանը և վերապատրաստմանը աջակցելը,
3) կրթական գործընթացի անընդհատության, շարունակականության, թափանցիկության և հրապարակայնության ապահովումը,
4) արհեստագործական և միջին մասնագիտական կրթության և ուսուցման համակարգի զարգացումը և մրցունակության բարձրացումը,
5) ուսանողի՝ ազգային, բարոյական և համամարդկային արժեքների ոգով դաստիարակումը:
Պետությունն ապահովում է արհեստագործական և միջին մասնագիտական կրթության և ուսուցման զարգացում հետևյալ ձևերով,
1) արհեստագործական և միջին մասնագիտական կրթության և ուսուցման համակարգի կատարելագործում և արդիականացում,
2) արհեստագործական և միջին մասնագիտական կրթության և ուսուցման զարգացման պետական ծրագրերի մշակում և իրականացում,
3) արհեստագործական և միջին մասնագիտական կրթական ծրագրերի համապատասխաննցում աշխատանքային շուկայի պահանջներին,
4) արհեստագործական և միջին մասնագիտական կրթության և ուսուցման ֆինանսավորում՝ պետության պահանջներից ելնելով,
5) սահմանված կարգով արհեստագործական և միջին մասնագիտական կրթության և ուսուցման համակարգի ուսանողներին և ունկնդիրներին պետական ֆինանսական օժանդակություն (կրթաթոշակներ, ուսանողական նպաստներ, ուսման վարձի փոխհատուցում (լրիվ կամ մասնակի (զեղչ), կրթական դրամաշնորհներ, վարկեր),
6) արհեստագործական և միջին մասնագիտական կրթության համակարգում գիտելիքների ստուգման, ուսուցման կազմակերպման նոր ձևերի, ներառյալ՝ կրեդիտային համակարգի ներդրում,
7) կրթական նոր հայեցակարգերի և տեխնոլոգիաների ներդրում:
