ՏՏՀ/Գիրուց խոզի

ԳԻՐՈՒՑ խոզի, խոզի ենթամաշկի աղ դրած ճարպ։ Օգտագործում են հում՝ բուտերբրոդներ պատրաստելիս, միս և բանջարեղեն տապակելիս, ինչպես նաև որոշ ազգային կերակրատեսակներ (օրինակ, բորշչ) պատրաստելիս։

Գ. դժվար յուրացվող կենդանական ճարպ է, ուստի այն պետք է օգտագործել սահմանափակ քանակությամբ։

Գ. կարելի է պատրաստել տանը. խոզի ենթամաշկի ճարպը (ողնաշարի կամ կողամասի) բաժանել մոտավորապես 2 կգ-անոց ուղղանկյուն կտորների, դանակով զգուշորեն մաքրել, լվանալ սառը ջրով և չորացնել։ Այնուհետև տրորելով ճարպակտորներին քսել մանր աղ (60-70 գ՝ 1 կգ ճարպին)։ Մշակված ճարպը շարել հատակին աղ ցանած փայտե ամանում (արկղում կամ տակառում)՝ շերտերի միջև նույնպես աղ ցանելով (վերևի շարքին ավելի շատ, քան ներքևիններին)։ Ամանը ծածկել կափարիչով կամ հաստ շորով և դնել մութ, չոր, զով տեղ։ 2-3 շաբաթից Գ. պատրաստ կլինի։ Գ. կարելի է պատել չամանով: