ՏՏՀ/Ինհալացիա
ԻՆՀԱԼԱՑԻԱ, տարբերում են բնական Ի. (իոններով և օզոնով հարուստ լեռնային օդի, աղերով և խոնավությամբ հարուստ ծովային օդի, բալասանի գոլորշիներով և օզոնով հարուստ փշատերև անտառի օդի շնչառումը) և արհեստական Ի., որը կատարում են հատուկ սարքերի (ինհալյատոր) օգնությամբ։ Գոլորշու կամ խտացրած օդի շիթով մանրացրած դեղանյութերը ինհալյատորից անցնում են հիվանդի շնչառական ուղիներ։ Ի. կիրառվում է միայն բժշկի խորհրդով քիթըմպանի, բրոնխների, թոքերի և այլ հիվանդությունների բուժման և կանխարգելման նպատակով։
Անհատական օգտագործման համար արտադրվում են տարբեր կառուցվածքի գրպանի ինհալյատորներ, դրանց մի մասը լցված է պատրաստի դեղորայքային խառնուրդով։ Օրինակ, Մախոլդի ինհալյատորը, որն օգտագործելուց առաջ լցնում են անհրաժեշտ դեղորայքի խառնուրդով։ Ի-ի տևողությունը 1-3 րոպե է, հաճախականությունը՝ օրը 3-5 անգամ։
Վերին շնչուղիների՝ կոկորդի չորությամբ ուղեկցվող որոշ հիվանդությունների ժամանակ կարելի է տանը (բժշկի նշանակմամբ) կատարել գոլորշու Ի.՝ եռացող ջրով լցված կաթսայի մեջ ավելացնել բժշկի նշանակած դեղորայքը (45 բաժակի հաշվով)։ Օրինակ, 5-10 կաթիլ յոդի թուրմ կամ 5-10 կաթիլ անուշադրի սպիրտ, նվենու մանր ծեծած տերևներ, փշատերևի մզվածքի մամլած բրիկետի մի կտոր, 10-15 կաթիլ մենթոլային կամ կամֆորային սպիրտ, 1/2 կամ 1 թեյի գդալ մենթոլի, թիմոլի, նվենու կամ այլ յուղ։ Կարելի է ավելացնել 1 թեյի գդալ սխտորի կամ սոխի հյութ (սխտորը կամ սոխը քերում են, քամում երեք շերտ թանզիֆով)։ Կարելի է շնչել նաև կեղևով եփվող կարտոֆիլի գոլորշիները։ հ-ի համար օգտագործում են հաստ թղթից պատրաստած ձագար, որի լայն մասով ծածկում են կաթսան, նեղ լ ուսանցքով շնչում գոլորշին։ Ի. կարելի է կատարել նաև առանց ձագարի՝ գլուխը սրբիչով կամ սավանով ծածկելով։ Ի-ի տևողությունը 1-3 րոպե է։
Երեխաներին (մեծերի հսկողությամբ) խորհուրդ է տրվում Ի. կատարել ոչ թե կաթսայի, այլ փոքրիկ թեյնիկի կամ ջեռակի օգնությամբ։ Այրվածքներից խուսափելու համար հարկավոր է ջրով լցնել անոթի 1/3-ը։ Թեյնիկը հարկավոր է դնել հորիզոնական ամուր մակերևույթի վրա (օրինակ, սեղանին), ծորակին հագցնել կտրած ծայրով ծծակ կամ ռետինե խողովակ, որի միջոցով երեխան պետք է շնչի գոլորշին։ Այդ ընթացքում ոչ մի դեպքում չի կարելի թեքել թեյնիկը։