ՏՏՀ/Միաքլորամին

ՄԻԱՔԼՈՐԱՄԻՆ, քլորամին, քլորի թույլ հոտով սպիտակ կամ դեղնավուն բյուրեղափոշի։ Լուծվում է ջրում և սպիրտում։ 0,1-5 %-անոց լուծույթը գործածվում է իբրև վարակազերծիչ միջոց բնակարանը մաքրելիս, սպիտակեղենը, ամանեղենը, մանկական խաղալիքները, լոգնոցը, լվացարանը և զուգարանը ախտահանելիս։ Սպիտակեղենը և ամանեղենը հարկավոր է 1 ժամ պահել Մ-ի լուծույթի մեջ, ապա պարզաջրել։ Յուղաներկով ներկված, խեցասալիկներով կամ պլաստիկով պատված հատակը, պատերը, ինչպես նաև լվացարանը, լոգնոցը և զուգակոնքը հարկավոր է լվանալ Մ-ի լուծույթով թրջած շորով։ Մ. անհրաժեշտ է պահել պինդ փակվող մուգ ամանում։