ՏՏՀ/Պոլլինոզ
ՊՈԼԼԻՆՈԶ, բույսերի ծաղկափոշուց առաջացած ալերգիական հիվանդություն։ Ի հայտ է գալիս բույսերի ծաղկման շրջանում։ Առավել հաճախ արտահայտվում է հարբուխով, արցունքահոսությամբ, երբեմն շնչահեղձության նոպաներով։ Հիվանդության առավել զանգվածային բռնկումներն առաջանում են քամու միջոցով փոշոտվող բույսերի ծաղկափոշուց, որը մեծ քանակությամբ պարունակվում է օդում։ Ընկնելով քթի լորձաթաղանթի կամ աչքի շաղկապենու վրա՝ ծաղկափոշին առաջացնում է օրգանիզմի ալերգիական ռեակցիա (տես Ալերգիա): Յուրաքանչյուր կլիմայաաշխարհագրական շրջանում աճում են որոշակի տեսակի բույսեր, որոնց ծաղկափոշին Պ-ի առաջացման առավել հաճախ հանդիպող պատճառներից է։
Այդ բույսերից են ամբրոսիան, մարգագետնային սիզախոտը, մարգագետնային շյուղախոտը, օշինդրը, վայրի կանեփը, ընկուզենին, լորենին, ուռին, բարդին, սոսին, որոշ հացազգիներ և այլն։
Պ-ի բուժումը կազմակերպում է բժիշկ-ալերգիաբանը. ծաղկափոշու տեսակի հայտնաբերում, դրա հանդեպ օրգանիզմի զգայունության իջեցում, հակաալերգիական դեղանյութեր։
Բույսերի ծաղկման շրջանում հիվանդները պիտի խուսափեն ծաղկափոշին շնչուղիներ ընկնելուց (հնարավորության դեպքում կրել թանզիֆե դիմակ), աչքերը պաշտպանեն ակնոցով։ Պ-ի ծանր դեպքերում հարկավոր է փոխել բնակավայրը։